މާލެ ސިޓީގައި ދިރާގު ވައިފައި ހޮޓްސްޕޮޓްތައް ތައާރަފުކޮށްފި
26 މެއި 2019 | އާދީއްތަ 08:37މި ރަސްމިއްޔާތު ޝަރަފުވެރިކޮށްދެއްވީ މާލެ ސިޓީ ކައުންސިލްގެ މޭޔަރ ޝިފާ މުހައްމަދު
މާލެ ސިޓީގެ 15 ސަރަހައްދެއްގައި ދިރާގު ވައިފައި ހޮޓްސްޕޮޓްތައް ތައާރަފު ކުރުމުގެ ތެރެއިން
މާލެ ސިޓީގެ 15 ސަރަހައްދެއްގައި ދިރާގު ވައިފައި ހޮޓްސްޕޮޓްތައް ތައާރަފުކޮށްފިއެވެ.
ވައިފައި ހޮޓްސްޕޮޓްތައް ތައާރަފު ކުރުމުގެ ރަސްމިއްޔާތު ބާއްވާފައި ވަނީ އާދިއްތަ ދުވަހު ސަލްޓަންޕާކުގައެވެ. މި ރަސްމިއްޔާތު ޝަރަފުވެރިކޮށްދެއްވީ މާލެ ސިޓީ ކައުންސިލްގެ މޭޔަރ ޝިފާ މުހައްމަދުއެވެ.
ރަސްމިއްޔާތުގައި ވާހަކަ ދައްކަވަމުން ޝިފާ ވިދާޅުވީ އެފަދަ ހިދުމަތްތައް ލިބިގެން ދިޔުމަކީ އުފާ ކުރައްވާ ކަމެއް ކަމަށާއި ދިރާގުން އައު ޓެކްނޮލަޖީތައް ރައްޔިތުންނާއި ހަމައަށް އަބަދުވެސް ފޯރުކޮށްދެމުންދާ ކަމަށެވެ.
ދިރާގު ވައިފައި ލިބޭ ސަރަހައްދުތައް އޮރެންޖް ކުލައިގެ ލައިޓް ބޮކްސްއަކުން ފާހަގަކުރެވިފައިވާއިރު ފޯނު ވައިފައި އަށް ކަނެކްޓް ކޮށްލައިގެން ނަންބަރު ޖެހުމުން އޮޓޯއިން ވައުޗަރ ނަންބަރު އަރާނެ ކަމަށް ދިރާގުން ބުނެއެވެ. އެއާ އެކު ވައިފައި އަށް ކަނެޓް ކުރެވިގެންދާނެއެވެ. ކޮންމެ މީހަކަށް 30 މިނެޓަށް ވައިފައި އަށް ކަނެކްޓް ކުރެވޭނެ ކަމަށާއި ދުވާލެއްގެ މައްޗަށް 100mb އާ ހަމައަށް ހިލޭ ބޭނުން ކުރެވޭނެ ކަމަށް ދިރާގުން ބުންޏެވެ. ދިރާގުން އިތުރަށް ބުނީ އެ އަދަދު ހަމަވުމަށް ފަހު "ދިރާގު ކަސްޓަމަރުންނަށް" އެޑްއޯން ނެގުމުގެ ފުރުސަތު ލިބިގެންދާނެ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން ދިރާގުގެ ސީއީއޯ އަދި މެނޭޖިންގ ޑައިރެކްޓަރ އިސްމާއިލް ރަޝީދު ވިދާޅުވީ މި ޕްރޮގްރާމަކީ ދިރާގު ޑިޖިޓަލް ކެމްޕެއިންގެ ދަށުން ކުރަމުން ގެންދާ މަސައްކަތެއް ކަމަށާއި ރައްޔިތުންނަށް އިންޓަނެޓްގެ ހިދުމަތް ވީހާ ވެސް ފަސޭހަކޮށް ބޭނުންކޮށްލެވޭނެ މަގު ފަހިކޮށްދިނުމަކީ ދިރާގުގެ އަމާޒު ކަމަށެވެ.
