ކަރާގެ އަގު ބޮޑުތަނުން ހެޔޮވިއިރު ފެޝަންފުރުޓްގެ އަގު ބޮޑު

ކަރާގެ އަގު ބޮޑުތަނުން ބާޒާރުގައި ހެޔޮވިއިރު ފެޝަން ފުރުޓްގެ އަގު އިންތިހާއަށް ބޮޑުވެއްޖެއެވެ.

ކަރާ ކިލޯއެއްގެ އަގު 18ރ އާއި 20ރ އަށް ވެއްޓިފައިވާއިރު ބާޒާރުގައި ފެޝަން ފުރުޓް ލިބެން ހުރީ ކިލޯއެއް 90ރ އަށެވެ.

ވިޔަފާރިވެރިން ބުނީ ފެޝަން ފުރުޓްގެ އަގު ބޮޑުވެފައިވަނީ ލިބުމަށް ދަތިވުމުން ކަމަށެވެ. ބާޒާރަށް އެކި ޤައުމުތަކުން ފެޝަން ފުރުޓް އެތެރެކުރާއިރު ބައެއް ގޮޅިތަކަށް ލަންކާ އިން ވެސް ފެޝަން ފުރުޓް އެތެރެ ކުރެއެވެ. އެގޮތުން ވިޔަފާރިވެރިއަކު ބުނީ ލަންކާގައި ދިމާވި ޓެރަރިސްޓް ހަމަލާއަށް ފަހު އެތަނުން ފެޝަން ފުރުޓް އެތެރެ ކުރުމުގައި ދަތިތަކާއި ދިމާވާ ކަމަށެވެ.

ރޯދަ މަސް ފެށުނުއިރު ފެޝަން ފުރުޓް ކިލޯއެއްގެ އަގު ހުރީ 60ރ އާއި 75ރ އަށެވެ.

ބާޒާރުގައި ފޭރު ކިލޯއެއްގެ އަގު 65ރ ލިބެންހުރިއިރު އެވަކާޑޯ ލިބެންހުރީ 70ރ އަށް ކިލޯއެކެވެ. އަދި ލުނބޯ ކިލޯއެއް 35ރ ލިބެންހުރިއިރު ކިއުކަންބާ ކިލޯއެއް ލިބެންހުރީ 45ރ އަށް ކިލޯއެކެވެ.

ބާޒާރުގައި ފެޝަން ފުރުޓްގެ އިތުރުން ރޯކަދުރުގެ އަގު ވެސް ވަނީ ބޮޑުވެފައެވެ. އެގޮތުން ރޯ ކަދުރު ކިލޯއެއް ބަޒާރުގައި ލިބެންހުރީ 400ރ އަށެވެ. އަދި ކެރެޓް ކިލޯއެއް 20ރ އަށް ކިލޯ ލިބެންހުރި ބަށި ކިލޯއެއްގެ އަގު އުޅެނީ 45ރ އާއި 65ރ އާ ދޭތެރޭގައެވެ.