ލ. އަތޮޅު ގަމުގައި ކޮންމެ އަހަރެއްގެ ރަމަޟާން މަހު ބާއްވާ "މަތިވަރު ފުޓްސަލް ޗެލެންޖު" ގައި ކަންމަތި އެސްސީ ބަލިކޮށް ގޯޅި އެސްސީއިން ޗެމްޕިއަންކަން ހޯދައިފިއެވެ.

ބުރާސްފަތި ދުވަހުގެ ރޭ ކުޅުނު ފައިނަލް މެޗު ކަންމަތިއާ ވާދަކޮށް ގޯޅިން މެޗު ކާމިޔާބުކުރީ 1-2 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ހުސެއިން ޝަރީފްއެވެ.

މުބާރާތުގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ ސިކްސް ސެންސެސް ލާމްގެ އަހުމަދު ސޮބާހް އާއި ގޯޅީގެ ޔާމީން މުހައްމަދު އާއި ހުސެއިން ނާޝިދު އާއި ކަންމަތީގެ އިބްރާހިމް އަޝްވަދު އަދި އައުޓް ރީފްގެ އަލީ ފަރްހާންއެވެ.

މުބާރާތުގެ އެންމެ މޮޅު ކުޅުންތެރިޔަކަށް ގޯޅީގެ ޔާމީން މުހައްމަދު ހޮވުނުއިރު، ފެއާ ޕްލޭ ޓީމަކަށް ހޮވުނީ ސިކްސް ސެންސެސް ލާމެވެ. އަދި އެންމެ ގިނަ ލަނޑު ޖެހި ކުޅުންތެރިޔަކަށް ހޮވިފައިވަނީ ސިކްސް ސެންސެސް ލާމްގެ އަހުމަދު ސޮބާހްއެވެ.

މުބާރާތުގައި ކުޅުނު ކޮންމެ މެޗެއްގައި ހޮވި "މޭން އޮފް ދަ މެޗް" އަށް ދީފައިވަނީ ހެލްމެޓެވެ. އަދި މުބާރާތް ހުޅުވުމުގެ ރަސްމިއްޔާތުގައި ޓޫރިޒަމް މިނިސްޓަރ އަލީ ވަހީދު ބައިވެރިވެވަޑައިގެންނެވިއިރު، ނިންމުމުގެ ރަސްމިއްޔާތުގައި ބައިވެރިވެވަޑައިގެންނެވީ ޔޫތު މިނިސްޓަރ އަހުމަދު މަހްލޫފްކަން ފާހަގަކޮށްލެވެއެވެ.

މުބާރާތުގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ދީފައިވާއިރު، ދެވަނަ ޓީމަށް 10،000 ރުފިޔާގެ ފައިސާގެ އިނާމެއް ވަނީ ދީފައެވެ.