ސިވިލް ކޯޓަށް ދެ ފަނޑިޔާރަކު ހޯދުމަށް ޖޫޑިޝަލް ސާރވިސް ކޮމިޝަން (ޖޭއެސްސީ) އިން އިއުލާންކޮށްފިއެވެ.
ބުރާސްފަތި ދުވަހު ޖޭއެސްސީން ކޮށްފައިވާ އިއުލާނުގައި ބުނެފައިވާ ގޮތުން ފަނޑިޔާރުކަމުގެ ޝަރުތު ތަކަކީ ޝަރީއަތާއި ގާނޫނުގެ ދާއިރާއިން ޑިގްރީއެއް އޮތުމާއި އެކު ފަނޑިޔާރު ކަމުގައި ނުވަތަ ވަކީލު ކަމުގައި މަދުވެގެން ދެ އަހަރުގެ ތަޖްރިބާ ހުރުމެވެ. އަދި ހައްދު ކަނޑައެޅިފައިވާ ކުށެއް، ރިޝްވަތުގެ ކުށެއް ނުވަތަ ޚިޔާނާތުގެ ކުށެއް ސާބިތުވެފައި ނުވުމާއި ސާބިތު ދަރަންޏެއް އޮވެ، ހުކުމާ އެއްގޮތަށް ދަރަނި އަދާ ނުކުރާ މީހަކަށް ނުވުމާއި ސިޔާސީ ޕާޓީއެއްގެ މެމްބަރަކަށް ނުވުމެވެ. އަދި އިންތިޚާބު ކޮށްފައިވާ ނުވަތަ ސިޔާސީ މަގާމެއްގައި ހުރި މީހަކަށް ވެގެން ނުވާނެއެވެ.
މި މަގާމަށް ކުރިމަތި ލުމުގެ ފުރުސަތު ޖޫން މަހުގެ 13 ވަނަ ދުވަހާއި ހަމައަށް އޮންނާނެ ކަމަށް ޖޭއެސްސީގެ އިއުލާން ގައި ބުނެފައި ވެއެވެ.
ރައްޔިތުންގެ މަޖިލީހުން ކަނޑައަޅާ ގޮތެއްގެ މަތިން މެޑިކަލް އިންޝުއަރެންސާއި ފޯން އެލަވަންސް ވެސް ލިބޭއިރު ފަނޑިޔާރުންނަށް މުސާރައިގެ ގޮތުގައި 46000 ރުފިޔާ ލިބޭނެއެވެ.
މި މަގާމަށް ކުރިމަތިލާ މީހުންގެ އުމުރަކީ 25 އަހަރު ފުރިފައި ވުމެވެ.
މިހާރު އެކޯޓްގައި 14 ވަނޑިޔާރުން ތިބެއެވެ.