ނިއުގެ ކޯޗަކަށް ނިޒާމްބެ ގެންނަނީ؟
23 މެއި 2019 | ބުރާސްފަތި 14:19މި ސީޒަނުގައި ނިއުއަށް ކުޅެވުމުގެ އުންމީދު އެބައޮތް
ނިއުގެ ބައެއް އޮފިޝަލުންނާއެކު ނިޒާމްބެ
ނިއުރޭޑިއަންޓް ސްޕޯޓްސް ކްލަބްގެ ކޯޗަކަށް ޓީސީ ސްޕޯޓްސް ކްލަބްގެ ކުރީގެ ކޯޗު މުހައްމަދު ނިޒާމް (ނިޒާމްބެ) ގެންނަން އުޅޭކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ނިއުއިން ވަނީ އެ ކްލަބަށް ނިޒާމްބެ ގެނައުމަށް ރަސްމީކޮށް ވާހަކަތައް ފަށައިފައެވެ. މިކަން ނިއުގެ އޮފިޝަލަކުވެސް ރާއްޖެއެމްވީއަށް ވަނީ ކަށަވަރު ކޮށްދެއްވާފައެވެ.
ފާއިތުވެދިޔަ ދެ އަހަރު ރާއްޖޭގެ އެންމެ މޮޅު ކޯޗުގެ މަގާމު ހޯދާފައިވާ ނިޒާމްބެ އިރުޝާދުގެ ދަށުން ޓީސީން ނިމިދިޔަ ސީޒަނުގެ ދިވެހި ޕްރިމިއާ ލީގު ކާމިޔާބު ކޮށްފައިވާއިރު، އެޓީމުން ވަނީ ބަންގްލަދޭޝްގައި ބޭއްވި ޝައިހް ކަމާލް އިންޓަނޭޝަނަލް ކަޕް ވެސް ކާމިޔާބު ކޮށްފައެވެ.
މީގެ އިތުރުން ނިޒާމްބެ އިރުޝާދުގެ ދަށުން ޓީސީ ވަނީ ދެވަނަ ޑިވިޝަނުން ފުރަތަމަ ޑިވިޝަނަށް ޕްރޮމޯޓްވެ، ވިދިވިދިގެން ތިން އަހަރު ދިވެހި ޕްރިމިއާ ލީގުގެ ދެވަނަ ހޯދާފައެވެ. އަދި ނިޒާމްބެ އިރުޝާދުގެ ދަށުން ޓީސީން ދެ ފަހަރު އެފްއޭކަޕްގެ ދެވަނަ ހޯދާފައިވާއިރު، ޕްރެޒިޑެންޓްސް ކަޕްގެ ދެވަނަ އެއް ފަހަރު ހޯދާފައި ވެއެވެ.
މައުލޫމާތު ލިބިފައިވާ ގޮތުގައި ނިއުއިން ނިޒާމްބެއާއެކު މަޝްވަރާތައް ފަށާފައިވަނީ އެ ކްލަބަށް މި ސީޒަނުގައި ކުޅެވޭނެކަމުގެ އުންމީދު އޮތުމުންނެވެ. އެ ކްލަބް މިވަގުތު އޮތީ ކުޅުންތެރިންނަށް މުސާރަ ނުދޭ މައްސަލައެއްގައި ސަސްޕެންޑު ކޮށްފައެވެ.
ނިއުއަށް މި ސީޒަނުގައި ކުޅެވޭނީ، އެ ކްލަބުން ކުޅުންތެރިންނަށް މުސާރައިގެ ގޮތުގައި ދޭންޖެހޭ 3.8 މިލިއަން ރުފިޔާ ދައްކާ ނިންމުމުން ނުވަތަ ނިއުއާ ދެކޮޅަށް އެ ކްލަބުގެ ކުޅުންތެރިން އެފްއޭއެމްއަށް ހުށަހަޅާފައިވާ މުސާރައިގެ މައްސަލަތައް އަނބުރާ ނެގުމުންނެވެ.
