ދިއްފުށީ ފަޅުތެރޭގައި އޮއްވާ ރޯކޮށްލި ޑިންގީ ބޭނުންނުކުރެވޭ ވަރަށް ވަނީ އަނދާފައި: ފުލުހުން
23 މެއި 2019 | ބުރާސްފަތި 03:38ޑިންގީގެ 60 އިންސައްތަ އަނދާފައި
ޑިންގީގައި ރޯވެ އަނދަނީ
ކ. ދިއްފުށީ ފަޅުތެރޭގައި އޮއްވާ ރޯކޮށްލި ޑިންގީ ބޭނުންނުކުރެވޭ ވަރަށް އަނދާފައިވާ ކަމަށް ފުލުހުން ބުނެފިއެވެ.
ފުލުހުން ބުނީ ބުދަ ދުވަހުގެ ރޭ 1:13 ހާއިރު އެ ރަށުގެ ފަޅުގައި އޮތް ކުޑަ ޑިންގީއެއްގައި ރޯކޮށްލާފައިވާ ކަމަށް ފުލުހުންނަށް ރިޕޯޓުކޮށްފައިވާ ކަމަށެވެ. މި މައުލޫމާތު ލިބުމާ އެކު ފުލުހުން ވަނީ އެ ސަރަހައްދަށް ގޮސް އެމްއެންޑީއެފް ފަޔަރއަށް ވެސް މައުލޫމާތު ދީފައެވެ.
ފުލުހުން ބުނީ ރޯކޮށްލާފައި ވަނީ ޑިންގީގެ ކުރީކޮޅުގައި ކަމަށާއި، މި އަލިފާނުގެ ސަބަބުން ޑިންގީ އައްސާފައި އޮތްވާ ކަނޑައިގެން ގޮސްފަޅުގެ ވަރަށް ބޭރަށް އޮޔާ ގޮސްފައިވާ ކަމަށެވެ.
ފުލުހުން ބުނީ ޑިންގީ އަބުރާ ބަނދަރާ ހަމައަށް ގެނެވިފައިވާ ކަމަށާއި، އެ ޑިންގީގެ 60 އިންސައްތަ އަނދާފައިވާ ކަމަށެވެ. އަދި ޑިންގީ ބޭނުންނުކުރެވޭ ވަރަށް ހަލާކުވެފައިވާ ކަމަށް ފުލުހުން ބުންޏެވެ.
މީގެ އިތުރުން ފުލުހުން ބުނީ ޔަމަހާ އައުޓްބޯޑް އިންޖީނެއް އަޅާފަ އޮތް ނުވަ ފޫޓްގެ އެ ޑިންގީއަކީ ރަޖިސްޓްރީ ނުކޮށް އޮތް ޑިންގީއެއް ކަމަށެވެ.
އެ މައްސަލަ ފުލުހުން ދަނީ ތަހުގީގު ކުރަމުންނެވެ. އަދި އެރަށުތެރެ ޕެޓްރޯލް ކުރުން ވަނީ އިތުރުކޮށްފައެވެ.
ދިއްފުށީގައި ޑިންގީއެއް ރޯކޮށްލާފައިވާއިރު، ބުދަ ދުވަހުގެ ރޭ ވައްކަން ކުރި މީހަކު ހޯދުމަށް ނުކުމެ ހިނގި ހަމަނުޖެހުމެއްގައި ތޫނު އެއްޗަކުން ހަމަލާދީ ދެ މީހަކު ވަނީ ވަރަށް ބޮޑަށް ޒަހަމްކޮށްލާފައެވެ.
