ކްރިކެޓް ސްޓޭޑިއަމް އަންނަ އަހަރު ހުޅުވުމުގެ މަސައްކަތް ކުރަނީ

އަވަށްޓެރި އިންޑިއާ ސަރުކާރުގެ އެހީގައި ހުޅުމާލޭގައި ހަދާ ކްރިކެޓް ސްޓޭޑިއަމްގެ މަސައްކަތް އަންނަ އަހަރު ނިންމައި ބޭނުންކުރެވެން ފެށޭނެ ކަމަށް އުއްމީދު ކުރައްވާ ކަމަށް މިނިސްޓްރީ އޮފް ޔޫތު، ސްޕޯޓްސް އެންމެ ކޮމިއުނިޓީ އެމްޕަވަރމެންޓް އަހުމަދު މަހުލޫފް ވިދާޅުވެއްޖެއެވެ.

މިނިސްޓަރު އެހެން ވިދާޅުވީ، އިންޑިއާގެ ކްރިކެޓް ބޯޑުގެ އިސް އޮފިޝަލުންނާ އެކު އަންގާރަ ދުވަހު ޔޫތު މިނިސްޓްރީގައި ބޭއްވި ޕްރެސް ކޮންފަރެންސެއްގައެވެ.

ރާއްޖޭގައި ކްރިކެޓް ކުރިއެރުވުމަށް އިންޑިއާގެ ބޮޑް އޮފް ކްރިކެޓް ކޮންޓްރޯލް ފޯ ކްރިކެޓް އިން އިންޑިއާ (ބީސީސީއައި)ގެ ޖީއެމް ސަބާ ކަރީމްއާ އިންޑިއާ ޓީމްގެ ފީލްޑިންގ ކޯޗު އަބޭ ޝަރްމާ ރާއްޖެ ވަޑައިގެންނެވީ އިއްޔެގެ ވަގުތެއްގައެވެ.

އެ ދެބޭފުޅުންގެ ދަތުރުގައި ރާއްޖޭގެ ކްރިކެޓްގެ ހާލަތު ދިރާސާކޮށް ކްރިކެޓް ފުޅާކުރުމާ ބެހޭ ގޮތުން މިނިސްޓްރީގެ އިތުރުން ރާއްޖޭގެ ގައުމީ ކްރިކެޓް ޓީމާއެކު މަޝްވަރާތަކެއް ކޮށްފައެވެ. އަދި ގައުމީ ޓީމުން ކްރިކެޓް ކުރިއަރުވަން ބޭނުންވާކަން ވަރަށް ބޮޑަށް ހާމަވެގެން ދިޔަ ކަމަށް ސަބާ ކަރީމް ވިދާޅުވިއެވެ.

އެ ޕްރެސް ކޮންފަރެންސްގައި ޔޫތު މިނިސްޓަރު ވިދާޅުވީ، މި މަހުގެ 30 ވަނަ ދުވަހު ބާއްވާ ކްރިކެޓް ވޯލްޑް ކަޕަށް ކުޑަ ތަންވެފައި އޮއްވާ އިންޑިއާގެ ކްރިކެޓް ޓީމްގެ އޮފިޝަލުންތަކެއް ރާއްޖެ އައުމަކީ ރާއްޖޭގެ ކްރިކެޓަށް އިންޑިއާ އިން އެއްބާރުލުން ދޭން ތައްޔާރަށް ތިބި ކަމުގެ ނިޝާނެއް ކަމަށެވެ. މި ފުރުސަތަކީ ކްރިކެޓް ކުރިއެރުވުމަށް ލިބޭނެ ވަރަށް ބޮޑު ފުރުސަތެއް ކަމަށެވެ.

ކްރިކެޓް އެހެން ފަންތިއަކަށް ގެންދިޔުމަށްޓަކައި ކްރިކެޓް ސްޓޭޑިއަމެއްގެ މުހިއްމުކަން ފާހަގަ ކުރައްވަމުން މިނިސްޓަރު ވިދާޅުވީ، ސްޓޭޑިއަމް މަސައްކަތް ހުއްޓިފައި އޮތީ އެ ބިމުގެ މައްސަލަތަކެއް ދިމާވެގެން ކަމަށެވެ. އެހެން ނަމަވެސް މިހާރު އެ މައްސަލަ ހައްލުކުރެވި އަމާޒަކީ އަންނަ އަހަރު ފަހުކޮޅު ކްރިކެޓް ސްޓޭޑިއަމް ހުޅުވުން ކަމަށެވެ.

މި ސަރަހައްދުގެ ގިނަ ގައުމުތަކަކީ ކްރިކެޓް ވަރަށް ފޯރިއާ ޖޯޝުގައި ކުޅެމުންދާ ގައުމުތަކަށްވާއިރު، ރާއްޖެގައި ވެސް ކްރިކެޓް ކުރިއަރުވަން ބޭނުންވާ ކަމަށް މިނިސްޓަރު ވިދާޅުވިއެވެ.

މަހްލޫފް ވިދާޅުވީ، ބޭނުންވަނީ އިންޑިއާ އިން އަފްޣާނިސްތާން ''އެޑޮޕްޓް'' ކުރި ގޮތަށް ރާއްޖެ ވެސް "އެޑޮޕްޓް" ކުރުވަން ކަމަށެވެ.

ހަނގުރާމައެއްގެ ވިލާގަޑެއްގެ ދަށުގައި އޮތް އަފްޣާނިސްތާނުގެ ކްރިކެޓް ޓީމަށް ބީސީސީއައި އިން ވަނީ އެތަކެއް އެހީތަކެއް ވެދީފައެވެ.

އަފްޣާނިސްތާނުގެ ސަލާމަތާއި ރައްކާތެރިކަން އެންމެ އެކަށީގެންވާ ގޮތަށް ހަމަޖެހިފައި ނުވާތީ އެ ގައުމުގެ ޓީމް ހޯމް ސްޓޭޑިއަމްގެ ގޮތުގައި ފަހަކާއި ޖެހެންދެން ބޭނުންކުރަމުން އައީ އެކުވެރި އަރަބި އިމާރާތުގެ ސްޓޭޑިއަމްތަކެވެ.

ދެހާސް 16 ވަނަ އަހަރު އިންޑިއާގެ ދެ ހަރަދުންގެ ރަޖީވް ގާންދީ އިންޓަނޭޝަނަލް ކްރިކެޓް ސްޓޭޑިއަމަކީ އަފްޣާނިސްތާނުގެ ހޯމް ސްޓޭޑިއަމްގެ ގޮތުގައި ބޭނުން ކުރެވޭ ގޮތަށް އިންޑިއާ އިން ހަމަޖައްސައިދިނެވެ.

ބީސީސީއައި އިން ވަނީ އަފްޣާނިސްތާނުގެ ކަންދަހާރުގައި ކްރިކެޓް ސްޓޭޑިއަމެއް ހަދަން އެއް މިލިއަން ޑޮލަރު ހަދިޔާކުރުމުގެ އިތުރުން ދަނީ ކުޅުންތެރިން ތަމްރީނު ކުރަމުންނެވެ.