ޒިކުރާ މިސްކިތުގެ މަސައްކަތް ނުފެށުނީ އެ އިމާރާތުގެ ރެޖިސްޓްރީ ނުލިބި އެތަނުގެ ކުރެހުމުގެ މަސައްކަތް ނުނިމިގެން ކަމަށް އެ މަސައްކަތް ހަވާލުކުރި އެސްޖޭ ކޮންސްޓްރަކްޝަން ކުންފުނިން ބުނެފިއެވެ.

ކުރީގެ ރައީސް ޔާމިންގެ ސަރުކާރުން ޒިކުރާ މިސްކިތް އިމާރާތް ކުރުމަށް އެސްޖޭ ކޮންސްޓްރަކްޝަންއާއެކު ވެފައިވާ އެއްބަސްވުން މި ސަރުކާރުން ވަނީ ބާތިލް ކޮށްފައެވެ.

ޒިކްރާ މިސްކިތް އަލުން އިމާރާތްކޮށް އެތަނުގައި 10 ބުރީގެ އިމާރާތެއް އެޅުމަށް އެސްޖޭ ކޮންސްޓްރަކްޝަން ކުންފުންޏާ ހަވާލު ކޮށްފައި ވަނީ 2018 ވަނަ އަހަރުގެ ޖުލައި މަހުއެވެ.

އެ މިސްކިތް އިމާރާތް ކުރުމުގެ މަޝްރޫއު އަށް 130 މިލިއަން ރުފިޔާ އަރާނެ ކަމަށް އޭރުގެ ސަރުކާރުން ވަނީ ބުނެފައެވެ. އޭގެ ތެރެއިން 30 މިލިއަން ރުފިޔާ ސަރުކާރުން ވަނީ ދީފައެވެ.

މަޝްރޫއު ހަވާލުކުރި ރަސްމިއްޔާތުގައި އޭރުގެ އިސްލާމިކް މިނިސްޓަރު ވިދާޅުވެފައި ވަނީ ރޯދަ މަހު ނަމާދުކުރެވޭ ވަރަށް އިމާރާތުގެ ތިން ބުރި ނިންމުމަށް ހަމަޖެހިފައިވާ ކަމަށެވެ. ނަމަވެސް ސޮއިކުރިތާ އަހަރެއް ވީއިރު އެ ތަނުގައި މަސައްކަތެއް ކޮށްފައެއް ނުވެއެވެ.

މި ސަރުކާރު ވުޖޫދަށް އައުމަށް ފަހު މަސައްކަތް ކުރިޔަށް ގެންގޮސްފައި ނުވާތީ ކޮންޓްރެކްޓް ބާތިލް ކުރަން އިސްލާމިކް މިނިސްޓްރީން 30 ދުވަހުގެ ނޯޓިސްއެއް އެ ކުންފުންޏަށް ދިނެވެ. އެ ނޯޓިސްގެ މުއްދަތު ހަމަވެފައިވަނީ ނިމިގެން ދިޔަ މަހުގެ ދެވަނަ ދުވަހުއެވެ. ނޯޓިސް މުއްދަތު ހަމަވެ މި މަހުގެ 23 ވަނަ ދުވަހުގެ ކުރިން އެތަން ހުސްކުރުމަށް އެކުންފުންޏަށް ވަނީ އަންގާފައެވެ.

އިސްލާމިކް މިނިސްޓްރީން ބުނެފައިވާ ގޮތުން އެ ކޮންޓްރެކްޓް އުވާލުމަށް ފަހު ބިޑަށް ހުށައަޅައިގެން އެހެން ބަޔަކާއި އެތަން ހަވާލުކުރުމުގެ މަސައްކަތް ކުރާނެއެވެ.

ރާއްޖެ.އެމްވީ އަށް މައުލޫމާތު ދިން އެސްޖޭގެ އިސް މީހަކު ބުނީ، އެތަނުގެ މަސައްކަތް ނުފެށިފައި އޮތީ އިމާރާތުގެ ކުރެހުން ނެހެދިގެން ކަމަށެވެ. މަސައްކަތް ހަވާލުކުރި އިރު ބިމުގެ ރަޖިސްޓްރީ ނެތް ކަމަށް އޭނާ ބުންޏެވެ. އަދި އެ ރަޖިސްޓްރީ ހޯދަން ކުރީގެ ސަރުކާރުގެ އިތުރުން މި ސަރުކާރުގެ އިސްލާމިކް މިނިސްޓްރީ އަށް އެތައް ފަހަރަކު ސިޓީ ފޮނުވާފައިވާ ކަމަށް އޮފިޝަލް ބުންޏެވެ.

އެކަމަކު އެ ރަޖިސްޓްރީ ނުލިބުމުގެ ސަބަބުން ބިމުގެ ކުރެހުން ވެސް ކުރިޔަށް ނުގެންދެވުނު ކަމަށާއި، އެ ކޮންޓްރެކްޓް ގައިވާ ގޮތުން ދެ އަހަރު ތެރޭގައި ކުރެހުން ހުށައަޅަން ޖެހޭ ކަމަށް ބުންޏެވެ.

އިސްލާމިކް މިނިސްޓްރީން އެ ކުންފުންޏާއި ވެފައިވާ އެއްބަސްވުން އުވާލަން ނިންމުމުން އެ މައްސަލަ ސިވިލް ކޯޓަށް ހުށައަޅައި ކޯޓުގައި އަޑު އެހުންތައް ހަފްތާއަކު ދެ ފަހަރު ކުރިޔަށްދާ ކަމަށް އޭނާ ބުންޏެވެ. ޝަރުއީމަރުހަލާގައި ހިނގަމުންދާ މައްސަލަޔަކަށް ވާތީވެ އެކަމާއި ބެހޭ މައުލޫމާތެއް އިސްލާމިކް މިނިސްޓްރީން ނުދެއެވެ.

ނަވާރަ ސަތޭކަ ނުވަދިހަ ހަވަނަ އަހަރު ކޮންސްޓްރަކްޝަންގެ ދާއިރާ އަށް ނިކުތް އެސްޖޭ ކޮންޓްރަކްޝަނަކީ ސަރުކާރުގެ އެކި ކޮންޓްރެކްޓް ތަކަށް މަސައްކަތް ކުރާ ކުންފުންޏެކެވެ. މިހާރު ހުޅުމާލޭގައި ހަދަމުންދާ ޕޮލިސްޓޭޝަންގެ އިތުރުން ގއ. މާނާލާގައި ފިޝަރީޒް ސެންޓަރެއް ގާއިމްކުރުމުގެ މަސައްކަތް ވެސް ހަވާލުކޮށްފައިވަނީ އެކުންފުންޏާއެވެ. ރ. އުގޫފާރުގައި ހަދަމުންދާ އިސްލާމިކް ސެންޓަރުގެ މަސައްކަތް ވެސް ކުރިޔަށް ގެންދަނީ ވެސް އެސްޖޭއިންނެވެ.

ޒިކުރާ މިސްކިތަކީ ކުރީގެ ރައީސް މައުމޫން އަބްދުލް ގައްޔޫމާއި އަބްދުﷲ ޔާމީންގެ ބައްޕާފުޅު އަބްދުލްގައްޔޫމް ސީދީގެ ހަނދާނުގައި 1980ގެ އަހަރުތަކުގެ ކުރީކޮޅު އިމާރާތްކުރި މިސްކިތެކެވެ.