ރެއާލްގެ އެއްބަސްވުން 2023 ގެ ނިޔަލަށް ކްރޫޒް އާކޮށްފި

ރެއާލް މެޑްރިޑާއެކު ހަދާފައިވާ އެއްބަސްވުން 2023 ވަނަ އަހަރުގެ ނިޔަލަށް ޖަރުމަންގެ މިޑްފިލްޑަރ ޓޯނީ ކްރޫޒް އާކޮށްފިއެވެ.

ރެއާލްއިން ނެރުނު ބަޔާނެއްގައި ބުނީ، އެ ކްލަބާއެކު ކްރޫޒް ހަދާފައިވާ އެއްބަސްވުން އާކޮށްފައިވާ ކަމަށާއި، އާ އެއްބަސްވުމުގެ ދަށުން އޭނާ ކްލަބުގައި 2023 ވަނަ އަހަރުގެ ޖޫން މަހުގެ 30 ނިޔަލަށް މަޑުކުރަންޖެހޭނެ ކަމަށެވެ.

ރެއާލްއާއެކު ކްރޫޒް ހަދާފައިވާ އެއްބަސްވުން 2022 ވަނަ އަހަރުގެ ނިޔަލަށް ކުރިން ހަމަވާއިރު، އެއްބަސްވުމަށް މިހާރު ވަނީ 12 މަސް އިތުރުކޮށްފައެވެ.

ކްރޫޒްއާ ބެހޭގޮތުން ރެއާލްގެ ކޯޗު ޒައިނުއްދީން ޒިދާން ބުނީ، ކްރޫޒްއަކީ ކީ ޕްލޭޔަރެއް ކަމަށާއި، ފާއިތުވެދިޔަ ފަސް އަހަރު ތެރޭގައި ރެއާލްއަށް އޭނާގެ ފަރާތުން ގިނަ އެހީތަކެއް ލިބިފައިވާ ކަމަށެވެ.

ރެއާލްގެ އެއްބަސްވުން ކްރޫޒް އާކޮށްފައިވާއިރު، އޭނާ ހޯދުމަށް ގިނަ ކްލަބްތަކުން އައީ މަސައްކަތް ކުރަމުންނެވެ. އޭގެ ތެރޭގައި މެންޗެސްޓާ ސިޓީވެސް ހިމެނެއެވެ.

ބަޔާން މިއުނިކް އަށް ކުޅުނު 205 މެޗުގައި 25 ލަނޑު ކާމިޔާބުކޮށްފައިވާ ކްރޫޒް ވަނީ އެޓީމާ އެކު ބުންޑަސްލީގާ ތިންފަހަރު، ޖަރުމަން ކަޕް ތިންފަހަރު، ޔުއެފާ ޗެމްޕިއަންސް ލީގު، ޔުއެފާ ސުޕާކަޕް އަދި ފީފާ ކްލަބް ވާރލްޑް ކަޕް ވެސް ކާމިޔާބުކޮށްފައެވެ.

ބަޔާން ދޫކޮށްލުމަށް ފަހު ކްރޫޒް 2014 ވަނަ އަހަރު ރެއާލް އަށް ބަދަލުވިއިރު، އޭނާ ވަނީ އެ ކްލަބަށް މިވީތަނަށް ކުޅުނު 233 މެޗުގައި 13 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ ޖަރުމަން ގައުމީ ޓީމާއެކު ވެސް ގިނަ ކާމިޔާބީތައް ހޯދާފައެވެ.

ޖަރުމަން ޓީމުގެ ވައިސް ކެޕްޓަންކަން ވެސް އަދާކުރަމުން އަންނަ ކްރޫޒް ވަނީ އެޓީމާއެކު ފީފާ ވާރލްޑްކަޕްގެ ތިންވަނަ އަދި 17 އަހަރުން ދަށުގެ ވާރލްޑްކަޕްގެ ވެސް ދެވަނަ ހޯދާފައެވެ.