ނުވަ އަހަރުގެ ކުއްޖަކަށް ޖިންސީ ގޯނާ ކުރި މައްސަލައެއް ފުލުހުން ބަލަނީ
18 މެއި 2019 | ހޮނިހިރު 08:53ފުލުހުން އެމައްސަލަ ބަލަން ފަށާފައިވަނީ މިމަހުގެ 10 ވަނަ ދުވަހުން ފެށިގެން
ކުޑަކުއްޖެއް. ނުވަ އަހަރުގެ ކުއްޖަކަށް ޖިންސީ ގޯނާ ކުރި މައްސަލައެއް ފުލުހުން ދަނީ ބަލަމުން
ގްރޭޑް ތިނެއްގައި ތައުލީމު ހާސިލު ކުރަމުންދާ ނުވަ އަހަރުގެ އަންހެން ކުއްޖަކަށް އެކުއްޖާގެ ދެ ބޭބެއަކު ޖިންސީ ގޯނާ ކުރާ މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން ބުނީ މިމަހުގެ 10 ވަނަ ދުވަހުގެ ރޭ ކުޑަކުއްޖަކަށް ޖިންސީ ހާނީއްކަ ލިބޭ ކަމަށް އަތޮޅުތެރެއިން ރިޕޯޓް ކޮށްފައިވާ ކަމަށާއި އެމައްސަލަ ފުލުހުން ބަލަމުންދާ ކަމަށެވެ. އަދި އެމައްސަލައިގައި ތުހުމަތު ކުރެވެނީ އެކުއްޖާގެ 13 އަހަރުގެ ބޭބެއަކާއި 16 އަހަރުގެ ބޭބެއަށް ކަމަށެވެ. ތުހުމަތުކުރެވޭ ދެ ބޭބެ ހައްޔަރުކުރި ކަމެއް ނުވަތަ ނޫން ކަމެއް ވެސް ފުލުހުން ހާމަ ނުކުރެއެވެ.
ފުލުުހުން ބުނީ، ޖެންޑާ މިނިސްޓްރީގެ ފެމެލީ އެންޑް ޗިލްޑްރެން ސަރވިސް ސެންޓަރ (އެފްސީއެސްސީ) އާ ގުޅިގެން މި މައްސަލަ ބަލަމުން އަންނަ ކަމަށެވެ. ޖެންޑާ މިނިސްޓްރީން ވެސް ވަނީ ކުޑަކުއްޖަކަށް ޖިންސީ ހާނިއްކަ ކުރި މައްސަލަ އެ މިނިސްޓްރީން ބަލަމުންދާ ކަމަށް ބުނެފައެވެ.
ފުލުހުން ބުނީ ކުޑަކުދިންނަށް ކުރާ މިފަދަ އެކި އަނިޔާ ތަކަކީ ފުލުހުން ވަރަށް ސީރިއަސް ކަމާއެކު ބަލަމުން އަންނަ މައްސަލަތަކެއް ކަމަށެވެ. މިމައްސަލައަކީ ހުސް ކުޑަކުދިންތަކެއް ހިމެނޭ މައްސަލައެއް ކަމުން އިތުރު އެއްވެސް ތަފުސީލެއް ފުލުހުން ނުދެއެވެ.
