މި ސީޒަނަށްފަހު ޔުވެންޓަސްގެ ކޯޗު މަސްމިލިއާނޯ އެލެގްރީ އެ ކްލަބް ދޫކޮށްލާނެ ކަމަށް ޔުވެންޓަސްއިން ބުނެފިއެވެ.

ޔުވެންޓަސްއިން ބުނީ، ކުރިއަށް އޮތް ސީޒަނުގައި ޔުވެންޓަސްގެ ބެންޗުން އެލެގްރީ ނުފެން ނާނެ ކަމަށެވެ. ނަމަވެސް ޔުވެންޓަސްއާ ދެން ހަވާލުވާނީ ކާކުކަން އެ ކްލަބުން ހާމަކޮށްފައެއް ނުވެއެވެ.

ރިޕޯޓްތައް ބުނާ ގޮތުން އެލެގްރީ ހަވާލުވުން އެންމެ ގާތީ ބަޔާން މިއުނިކްއާއެވެ. ނަމަވެސް ބައެއް ރިޕޯޓްތައް ބުނާގޮތުން ޗެލްސީން ވެސް އަންނަނީ އެލެގްރީ ހޯދުމަށް މަސައްކަތް ކުރަމުންނެވެ.

ޔުވެންޓަސްގެ ކޯޗުކަމާ އެލެގްރީ 2014 ވަނަ އަހަރު ހަވާލުވެފައިވާއިރު، އެޓީމަށް އެލެގްރީ ކޯޗުކޮށްދިން 269 މެޗުގެ ތެރެއިން 191 މެޗުން އެޓީމު ވަނީ މޮޅުވެފައެވެ. ބާކީ 36 މެޗުން އެޓީމު ބަލިވެފައިވާއިރު، 42 މެޗުން އެޓީމު ވަނީ އެއްވަރުވެފައެވެ.

ޔުވެންޓަސްއާ ހަވާލުވުމަށް ފަހު ޖެހިޖެހިގެން އެޓީމަށް ފަސް ލީގު ތަށި ކާމިޔާބުކޮށްދީފައިވާ ކޯޗުގެ އިރުޝާދުގެ ދަށުން އެޓީމު ވަނީ ހަތަރު ކޮޕަ އިޓަލިއާ، ދެ އިޓާލިއަން ސުޕަ ކަޕް އަދި ޔުއެފާ ޗެމްޕިއަންސް ލީގުގެ ދެވަނަ ދެފަހަރު ހޯދާފައެވެ.

މީގެ ކުރިން އޭސީ މިލާންއަށްވެސް ކޯޗުކޮށްދީފައިވާ އެލެގްރީ ވަނީ އިޓަލީގެ ގިނަ ކްލަބްތަކަށް އިރުޝާދު ދީފައެވެ. އެގޮތުން އޭނާގެ އިރުޝާދުގެ ދަށުން އޭސީ މިލާނުން ވަނީ ލީގު ތަށި އަދި އިޓާލިއަން ސުޕަ ކަޕް ކާމިޔާބުކޮށްފައެވެ.

އެލެގްރީގެ އިރުޝާދުގެ ދަށުން ޔުވެންޓަސް ކުޅޭ ފަހު މެޗުގައި މި މަހު 26 ވަނަ ދުވަހު ނިކުންނާނީ ސަމްޕްޑޯރިއާއާ ދެކޮޅަށެވެ.