އަބްދުރަހީމް ފައުންޑޭޝަން ހިމެނޭ ގޮތަށް ވެމްކޯއިން ގިނަ އަދަދެއްގެ ފައިސާ މެންޑޭޓުން ބޭރުން ގިނަ ކުންފުނިތަކަށް ދޫކޮށްފައިވާ ކަމަށް ވޭސްޓް މެނޭޖްމެންޓް ކޯޕްރޭޝަން (ވެމްކޯ) މެނޭޖިން ޑިރެކްޓަރު އާދަމް މުހައްމަދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން އާދަމް މުހައްމަދު ވިދާޅުވީ ވެމްކޯއަށް ގެއްލުންވާގޮތަށް ގިނަ އަދަދެއް ފައިސާ ބައެއް ކުންފުނިތަކަށް ދޫކޮށްފައިވާ ކަމަށެވެ. އެގޮތުން ހަ ފުޓްސަލް މުބާރާތް ބާއްވަން ދުވާފަރު ސްޕޯޓްސް ކްލަބަކަށް 2017 ގާތްގަނޑަކަށް 4 ލައްކައެއްހާ ރުފިޔާ ހަރަދުކޮށްފައިވާ ކަމަށާއި، ހަޔާތު ފައުންޑޭޝަން ކިޔާ ފައުންޑޭޝަންއަކަށް 2017 ވަނަ އަހަރު ދެ ލައްކައެއްހާ ރުފިޔާ ހަރަދުކޮށްފައިވާ ކަމަށެވެ.
އޭގެ އިތުރުން ޕްރީ ސްކޫލަކަށް ފަންޑުކުރުމުގެ ނަމުގައި 2017 ގައި އަބްދުއްރަހީމް ފައުންޑޭޝަނަށް ދެ ލައްކަ ފަންސާސްހާހެއްހާ ރުފިޔާ ހަރަދުކޮށްފައިވާ ކަމަށް އޭނާ ވިދާޅުވި އެވެ. އަދި ސްކޫލުތަކަށް ވެސް އެކިގޮތްގޮތުން ހަރަދުކޮށްފައިވާކަން ފާހަގަކުރައްވައި އާދަމް ވިދާޅުވީ 50،000 އާއި 60،000 ރުފިޔާ މާލޭގެ ބޮޑެތި ސްކޫލުތަކުގެ އެކިއެކި ޕްރޮގްރާމްތައް ހިންގުމަށް ހަރަދުކޮށްފައިވާ ކަމަށެވެ.
އާދަމް ވިދާޅުވީ މިފަދަ ގޮތަކަށް ހަރަދު ކުރުމަކީ ވެމްކޯއިން ކޮށްގެންވާނެ ހަރަދުތައް ނޫން ކަމަށެވެ. އަދި އެއްވެސް ގޮތަކަށް ކުންފުންޏަށް ގެއްލުންވާ ގޮތަށް ހަރަދު ކުރުމަކީ ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވި އެވެ.
''ވެމްކޯގެ މެންޑިޑޭޓްގެ ތެރޭގައި ހިމެނޭ ކަމެއް ނޫން. އެހެން ނަމަވެސް ސީއެސްއާރުގެ ތެރެއިން ކޮންމެވެސް މިވަރަކަށް ބައެއް ކަހަލަ ސޯޝަލް ކަންކަމުގައި ހަރަދު ކުރެވިގެންދާނެ ކަމަށް ގަބޫލުކުރަން. އެއީ ކުންފުނީގެ މާލީ ހާލަތު ތަންދޭ މިންވަރުން އެކަމުގެ ސަބަބުން ވެމްކޯއަށް ވެސް އޭނގެ ފައިދާތަކެއް ކުރާނެ ކަމެއްނަމަ.''
ދައުލަތުގެ މުއައްސަސާތަކުން ވެމްކޯއަށް ދައްކަންޖެހޭ ފައިސާހުރިކަން ފާހަގަކުރައްވައި އާދަމް ވިދާޅުވީ 2017 ވަނަ އަހަރުން ފެށިގެން ހައުސިން މިނިސްޓްރީގެ މެންޑޭޓް ބަދަލުވަންދެން ހުރި ބިލްތަކަށް ފައިސާ ނުދައްކާ ކަމަށާއި، ގާތްގަނޑަކަށް 9 މިލިއަން ރުފިޔާއަރާ ކަމަށެވެ. އަދި އެޗްޑީސީން ވެސް ވެމްކޯއަށް 5.2 މިލިއަން ރުފިޔާ ދައްކަންޖެހޭ ކަމަށް އޭނާ ވިދާޅުވިއެވެ. އަދިވެސް އިތުރު މުއައްސަސާތައް ހިމެނޭކަން އޭނާ ފާހަގަކުރެއްވިއެވެ.
އާދަމް ވިދާޅުވީ ވެމްކޯއިން ހަރަދުކޮށްފައިވާ ގޮތުން ކުންފުނީގެ މާލީ ހާލަތަށް ބޮޑު އުނދަގޫތަކެއް ކުރިމަތިވެފައިވާ ކަމަށެވެ. އަދި މިހާރު ކުންފުނީގެ 9 އޮޑިޓް ރިޕޯޓެއް ކުރިއަށްދާ ކަމަށް އޭނާ ވިދާޅުވި އެވެ.
''އޭގެ ތެރެއިން ގާތްގަނޑަކަށް 7 އޮޑިޓް މިހާރު ކޮންމެސް ވަރަކަށް ނިމި އަޅުގަނޑުމެން އެއަށް ޖަވާބުދާރީވުމަށް އެބައޮތް 7 އޮޑިޓެއް ފޮނުވިފައި. އަދި އޭގެ އިތުރުން 2 އޮޑިޓެއް ކުރިއަށް އެބަދޭ.''
އާދަމް ވިދާޅުވީ އެންޓި ކޮރަޕްޝަން ކޮމިޝަނުން ވެމްކޯގެ 4 މައްސަލައެއް ބަލަމުންދާ ކަމަށާއި، އެއްމައްސަލަ ނިންމާ އިދާރީ ގޮތުން ރަނގަޅުކުރަންޖެހޭ ކަންކަން ރަނގަޅު ކުރުމަށް ފޮނުވާފައިވާ ކަމަށެވެ.
