މިދިޔަ ހަފްތާ އިން ފަށައިގެން ހާފިޒުންނާއި އިމާމުން ރާއްޖެ އަންނަން ފަށާފައިވާ ކަމަށް އިމިގްރޭޝަނުން ބުނެފިއެވެ.
އިމިގްރޭޝަން ކޮންޓްރޯލަރ އަހުމަދު މުހައްމަދު ހުސައިން (ހަނަފީ) ވިދާޅުވީ ރާއްޖެއަށް މިދިޔަ ހަފްތާ އިން ފެށިގެން އިމާމުންނާއި ހާފިޒުން ގެންނަން ފަށާފައިވާ ކަމަށެވެ.
ހަނަފީ ވިދާޅުވީ ހާފިޒުންނާއި އިމާމުންގެ ވިސާގައި އެތެރެވާން އުޅުނު އެކަކު "ރިޖެކްޓް" ކޮށްފައިވާ ކަމަށެވެ. އެހެން ނަމަވެސް އެއީ ކީއްވެ ކަމެއް ވިދާޅެއް ނުވިއެވެ.
އަވަށްޓެރި ސްރީލަންކާއަށް މިދިޔަ މަހުގެ 21 ގައި ދިން ބޮމުގެ ހަމަލާތަކާ ގުޅިގެން ވަނީ ރާއްޖެ އެތެރެވާ މީހުންގެ ސެކިއުރިޓީ ވަރުގަދަ ކޮށްފައެވެ. އެއާ އެކު އިމިގްރޭޝަނުން ވަނީ ރާއްޖެ އެތެރެވާ ހާފިޒުންނަށް ދޫކުރާނީ ޚާއްސަ ވިސާއެއް ކަމަށާއި އެ ވިސާ ހޯދުމަށް އިސްލާމިކް މިނިސްޓްރީގެ ހުއްދަ ބޭނުންވާ ކަމަށް ބުނެފައެވެ.
ހަނަފީ މީގެ ކުރިން ކުރެއްވި ޓްވީޓެއްގައި ވިދާޅުވެފައި ވަނީ ވިސާ ހަމަޖެހުނުކަން އިމިގްރޭޝަނުން ނާންގަނީސް ރާއްޖެ ދަތުރު ކުރެއްވި ކަމުގައި ވީނަމަވެސް، ރާއްޖެ އެތެރެވުމުގެ ހުއްދަ ދެވެން ނޯންނާނެ ކަމަށާއި އެހެންކަމުން އެކަމުގައި އެންމެހާ ފަރާތްތަކުން އެއްބާރުލުން ދެއްވުމަށް އިލްތިމާސްކުރާ ކަމަށެވެ.
އިސްލާމިކް މިނިސްޓްރީން ވަނީ 200 އެއްހާ ހާފިޒުން ގެނައުމަށް އިމިގްރޭޝަނުގައި އެދިފައެވެ.
