ޓްރަމްޕް ވައިޓް ހައުސްގައި ރޯދަވީއްލުމެއް ދެއްވައިފި
ރަމަޟާން މަހަކީ ސުލްހަ މަސަލަސް ކަން ގާއިމު ކުރުމުގެ މައްސަރެއް
ޓްރަމްޕް ދެއްވި ރޯދަވީއްލުމުގެ ތެރެއިން
އެމެރިކާގެ ރައީސް ޑޮނާލްޑް ޓްރަމް ވައިޓް ހައުސްގައި އުޅޭ މުސްލިމުންނަށް ރޯދަވީއްލުމެއް ދެއްވައިފި އެވެ.
ހޯމަ ދުވަހުގެ ރޭ ވައިޓް ހައުސްގެ ސްޓޭޓް ޑައިނިން ރޫމްގައި އޮތް މި އިފްތާރުގައި ޓްރަމްޕް ވިދާޅުވީ ރަމަޟާން މަހަކީ ސުލްހަ މަސަލަސް ކަން ގާއިމު ކުރުމުގެ އިތުރުން އެހީތެރިކަން ފޯރުކޮށްދިނުމުގެ މައްސަރެއް ކަމަށެވެ. އަދި އާއިލާތަކާއި އަވައްޓެރިންނާއި މުޅިމުޖުތަމައު އެކުވެރިކޮށްދޭ މައްސަރެއް ކަމަށެވެ.
މީގެ އިތުރުން ވެސް މި އަހަރަކީ މުސްލިމުން ހިތާމަ އާއި ކުރިމަތިލާން ޖެހިފައިވާ އަހަރެއްކަން ފާހަގަ ކުރައްވާ ޓްރަމްޕް ވިދާޅުވީ ނިއުޒިލޭންޑްގައި އެތައް ބަޔަކު ކުށަކާ ނުލާ މަރާލާފައި ވާކަމަށާއި އަދި ލަންކާގައި ވެސް މުސްލިމުން މަރުވެފައި ވާކަމަށެވެ.
ޓްރަމްޕް އިތުރަށް ވިދާޅުވެފައި ވަނީ ވަކި ދީނަކަށް ތަބާވާތީ ޖައްސާލަން ނުޖެހޭ ކަމަށާއި އެމެރިކާއަކީ ބޭނުން ދީނަކަށް އުޅުމުގެ ފުރުސަތު އޮންނަ ގައުމަކަށް ވާތީ ފަޚުރުވެރި ވާކަމަށެވެ.
ޓްރަމްޕް ދެއްވި މި އިފްތާރުގައި ގިނަ އަދަދެއްގެ އެމްބެސަޑަރުންނާއި އެމެރިކާގައި އުޅޭ އެހެނިހެން މުސްލިމް ގައުމުތައް ތަމްސީލު ކުރައްވާ ގިނަ އަދަދެއްގެ ބޭފުޅުން ބައިވެރިވެ ވަޑައިގެންނެވިއެވެ.
ކޮންމެ ރަމަޟާންމަހަކު ވައިޓްހައުސްގައި އެމެރިކާގެ ރައީސް ރޯދަވީއްލުމެއް ދެއްވާކަން ފާހަގަ ކޮށްލެވެއެވެ.
