ފަތުރުވެރިކަމުގެ ދާއިރާގައި ހުރި މައްސަލަތައް ދެނެގަތުމަށް މިނިސްޓަރު އަލީ ވަހީދު ހުވަދޫ އަތޮޅަށް!
އަލީ ވަހީދު ވަނީ މީގެ ކުރިން ލ. އަތޮޅަށް ވެސް ވަޑައިގެންފައި
ޓޫރިޒަމް މިނިސްޓަރު އަލީ ވަހީދު
ފަތުރުވެރިކަމުގެ ދާއިރާގައި ހުރި މައްސަލަތައް ދެނެގަތުމަށް މިނިސްޓަރު އަލީ ވަހީދު ހުވަދޫ އަތޮޅަށް ޒިޔާރަތްކުރުމަށް ނިންމަވައިފިއެވެ.
މިނިސްޓަރު އަލީ ވަހީދު ހުވަދޫ އަތޮޅަށް ފުރާވަޑައިގަންނަވާނީ އަންގާރަ ދުވަހުގެ މެންދުރު 02:00 ގައެވެ. އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ މި ދަތުރުފުޅުގެ ބޭނުމަކީ އަތޮޅު އަދި ރަށު ކައުންސިލްތަކާ ބައްދަލުކުރެއްވުން ކަމަށާއި ޓޫރިޒަމް މިނިސްޓްރީއާ ކައުންސިލްތަކާ ދެމެދު އޮންނަ ގުޅުން ބަދަހިކުރުމަކީ ވެސް މި ދަތުރުފުޅުގެ އެއް ބޭނުން ކަމަށެވެ.
މި ދަތުރުފުޅުގައި ކާޑެއްދޫ، ތިނަދޫ، ގއ. ވިލިނގިލި، ކޫއްޑޫގެ އިތުރުން ބައެއް އެއަރޕޯޓްތަކަށް މިނިސްޓަރު ޒިޔާރަތްކުރައްވާނެއެވެ.
އަލީ ވަހީދު ވިދާޅުވީ އިންޑަސްޓްރީއާ މެދު ޝަކުވާއެއް އޮތް ނަމަ ހުށަހެޅުމުން އެކަން ބަލައިގަންނާނެ ކަމަށާއި އެ ޝަކުވާތައް ބަލައިގަތުމުގައި މިނިސްޓްރީން ހަމަހަމަވާނެ ކަމަށެވެ.
"އަޅުގަނޑުމެން ވަރަށް ބޮޑަށް އެބަ މަސައްކަތް ކުރަން ޓޫރިޒަމް މިނިސްޓްރީ އާއި ކައުންސިލްތަކާއި އޮތް ގުޅުން ބަދަހި ކުރުމަށް. އަޅުގަނޑުމެންގެ ނަސޭހަތަކީ ކައުންސިލްތަކަށް ވެސް ރައްޔިތުންނަށް ވެސް މި އިންޑަސްޓްރީ މި ހިސާބަށް އައިސް މިއޮތީ މި ދާއިރާއަށް ހިދުމަތްކޮށްދިން މީހުންގެ ބުރަ މަސައްކަތުން. އެންމެން ގުޅިގެން ކަންކަން އިސްލާހު ކުރެވޭނީ. ކަންބޮޑުވުންތަކެއް އޮވެއްޖެއްޔާ މުޅި އިންޑަސްޓްރީ ބްލޭމް ނުކުރައްވާ ޝަކުވާ ހުށަހަޅުއްވާ، އަޅުގަނޑުމެން ބަލައިދޭނަން،" އަލީ ވަހީދު ވިދާޅުވިއެވެ.
މި ދަތުރުފުޅު ނިންމަވާ ލެއްވުމަށް ފަހު ވ.، މ.، ފ.، އަދި ށ. އަތޮޅުގެ ރަށްތަކަށް ޒިޔާރަތް ކުރެއްވުމަށް ވެސް ވަނީ ހަމަޖެހިފައެވެ. އޭރުން ރާއްޖޭގެ ހުރިހާ އަތޮޅަކަށް މިނިސްޓްރީގެ ފަރާތުން ޒިޔާރަތް ކުރެވޭނެ ކަމަށް އަލީ ވަހީދު ވިދާޅުވިއެވެ. ދާދި ފަހިން އަލީ ވަހީދު ވަނީ ލ. އަތޮޅަށް ވެސް ދަތުރުކުރައްވާފައެވެ.
ހުވަދޫ އަތޮޅަށް ކުރައްވާ ދަތުރުފުޅު ނިންމަވާލެއްވުމަށް ފަހު ޓޫރިޒަމް މިނިސްޓަރު މާލެ ވަޑައިގަންނަވާނީ ބުރާސްފަތި ދުވަހުއެވެ.
