ހައްޖަށް މީހުން ގެންދިއުމުގައި ހުއްދަ ދީފައިވާ އަގަށް ވުރެ އިތުރަށް ފައިސާ ނަގާ: އޭސީސީ
14 މެއި 2019 | އަންގާރަ 07:52ޙައްޖު އިންތިޒާމުކުރުމުގެ ނިޒާމާ ގުޅޭ 21 ޝަކުވާއެއް 2017 ވަނަ އަހަރު ހުށައެޅި
ދިރާސާ ރިޕޯޓް އާންމު ކުރުމަށް ބޭއްވި ހަފްލާގެ ތެރެއިން
ހައްޖަށް މީހުން ގެންދިއުމުގައި ހުއްދަ ދީފައިވާ އަދަދަށް ވުރެ އިތުރަށް ހައްޖަށް ދާ މީހުންގެ އަތުން ފައިސާ ނަގާ ކަމަށް އެންޓިކަރަޕްޝަން ކަމިޝަން (އޭސީސީ)ގެ ދިރާސާ ރިޕޯޓުން ހާމަ ވެއްޖެއެވެ.
އޭސީސީ އިން ވަނީ ހައްޖުގެ އިންތިޒާމްތަކާ ބެހޭ ގޮތުން 2017 ވަނަ އަހަރުގައި ފެށި ދިރާސާ ރިޕޯޓުން ހާމަކޮށްފައިވާ ގޮތުގައި އެ އަހަރު އެކަނިވެސް، ޙައްޖު އިންތިޒާމުކުރުމުގެ ނިޒާމާ ގުޅޭ 21 ޝަކުވާއެއް ކޮމިޝަނަން ވަނީ ހުށައަޅާފައެވެ.
ޙައްޖަށް މީހުން ގެންދިޔުމަށް ދޫކޮށްފައިވާ ކޯޓާ އަށް ވުރެ އިތުރަށް މީހުން ގެންދިޔުމަށް ފައިސާ ނެގުމާއި، ޙައްޖަށް މީހުން ގެންދާ ކުންފުނިތަކުން މީހުން ޙައްޖަށް ގެންދިއުމަށް ނަގާފައިވާ ފައިސާއަށް ޚިޔާނާތްތެރިވުމުގެ ސަބަބުން ޙައްޖަށް ދިޔުމަށް ފައިސާ ދައްކާފައިވާ ފަރާތްތަކަށް ޙައްޖަށް ނުދެވި އެތައް މައްސަލަތަކެއް ކުރިމަތިވެފައިވާ ކަން ވަނީ ހާމަކޮށްފައެވެ. އެގޮތުން 2013-2012 އަށް އަމިއްލަ ފަރާތަކުން 132 މީހެއްގެ އަތުން އަށް މިލިއަނަށް ވުރެ ގިނަ ރުފިޔާ ނަގައި އެ ފަރާތްތަކަށް އެ ފަހަރު ހައްޖަށް ނުދެވުނުކަން ވަނީ ފާހަގަ ކޮށްފައެވެ. އަދި ހައްޖަށް މީހުން ގެންދިޔުމަށް ފައިސާ ނެގުމަށް ހުއްދަ ކުރެވިފައިވާ މިންވަރަށް ވުރެ އިތުރަށް ކޮންމެ އަހަރަކު ވެސް ބައެއް ކުންފުނިތަކުން ފައިސާ ނަގާކަން ވަނީ ފާހަގަ ކޮށްފައެވެ. ނަމަވެސް އެ ފަރާތްތަކާ މެދު ފިޔަވަޅު ނޭޅެނީ ފައިސާ ނެގިކަމުގެ ލިޔުމެއް އަދި ރަސީދެއް ނެތުމުން ކަމަށް އޭސީސީ އިން ވަނީ ބުނެފައެވެ.
އޭސީސީގެ ދިރާސާ ރިޕޯޓުގައި ވަނީ ސަރުކާރުގެ ސަތޭކަ ޕަސެންޓް ހިއްސާވާ ކުންފުނި މޯލްޑިވްސް ޙައްޖު ކޯޕަރޭޝަން ލިމިޓެޑްގެ މަޤުޞަދު ދެމެހެއްޓެނިވި ގޮތެއްގައި ޙާޞިލުކުރުމަށް ގޮންޖެހުންތަކެއް ހުރި ކަމަށް ފާހަގަ ކޮށްފައެވެ. އެގޮތުން އެ ކުންފުނި ހިންގަނީ ކޮންމެ އަހަރަކު ވެސް ދަރަނީގައި ކަން ފާހަގަ ކޮށްފައެވެ.
"ރާއްޖެއަށް ޢާންމުކޮށް ލިބޭ ކޯޓާގެ އިތުރަށް ސަޢޫދީ ރަސްގެފާނުގެ ޚާއްޞަ ޢިނާޔަތުގެ ދަށުން ރާއްޖެއަށް ލިބޭ އިތުރު ކޯޓާގެ އަދަދު ޔަޤީން ވަނީ ޙައްޖު މޫސުމާ ވަރަށް ގާތްވެފައިވަނިކޮށް ކަމަށް ވާތީ، އެ ކޯޓާ ލިބޭ ފަރާތްތައް ކަނޑައެޅުން ލަސްވުމާ އެކު ޚިދުމަތްތަކުގެ އަގު ބޮޑުވުމަށް މެދުވެރިވެއެވެ. އެގޮތުން 2017 ވަނަ އަހަރާއި 2018 ވަނަ އަހަރު އިތުރު ކޯޓާ ލިބިފައި ވަނީ ބައެއް ކުންފުނިތަކުގެ ޙައްޖުވެރިން ރާއްޖެ އިން ފުރި ފަހުންކަން ފާހަގަކުރެވެއެވެ." އޭސީސީގެ ރިޕޯޓުގައި ބުނެފައި ވެއެވެ.
ޙައްޖު ކޯޕަރޭޝަންގެ ރެކޯޑުތައް ދައްކާ ގޮތުން އިތުރު ކޯޓާގައި އެންމެ ފަހު ވަގުތު ޙައްޖުގެ އިންތިޒާމުތައް ހަމަޖެއްސުމަށްޓަކައި ކޮންމެ ޙާޖީއަކަށް %15-10 ފައިސާ އިތުރަށް ޚަރަދުކުރަން ޖެހެއެވެ.
ރާއްޖެ އިން ޙައްޖަށް މީހުން ގެންދިއުމާ ބެހޭ އުޞޫލު އެކަށީގެންވާ މުއްދަތެއްގެ ތެރޭގައި ޢާންމު ނުކުރުމުން ހައްޖަށް މީހުން ގެންދިއުމުގައި ދަތިތަކާ ދިމާވާ ކަމަށް ކުންފުނިތަކުން ބުނެއެވެ. އަދި ހައްޖަށް މީހުން ގެންގޮސް އެ މީހުންނަށް އިރުޝާދު ދޭ މީހުންގެ ކިބައިގައި އެކަށީގެންވާ ގާބިލުކަން ނެތް ކަމަށާއި ގިނަ ފަހަރަށް އަރަބި ބަހުން ވާހަކަ ދައްކަން ނޭނގުމުގެ ސަބަބުން މީހުންނަށް އޭގެ އުނދަގޫ ވާކަމަށް ހައްޖަށް ދިޔަ މީހުންނާ ހަވާލާދީ ދިރާސާ ރިޕޯޓުގައި ވަނީ ފާހަގަ ކޮށްފައެވެ.
ޙައްޖު އިންތިޒާމުކުރުމުގެ ނިޒާމު އިތުރަށް ހަރުދަނާ ކުރުމަށާއި ކުންފުނިތަކުގެ މަސައްކަތް ރެގިއުލޭޓްކުރުމަށް، ޙައްޖަށް އަދި ޢުމްރާއަށް މީހުން ގެންދިއުމާ ބެހޭ ޤާނޫނެއް 2017 ވަނަ އަހަރު ޑްރާފްޓްކޮށް މިނިސްޓްރީ އޮފް އިސްލާމިކް އެފެއާޒް އިން ބަންޑާރަ ނައިބުގެ އޮފީހަށް ވަނީ ފޮނުވާފައެވެ.
