މަޝްހޫރު ފުޓުބޯޅަ އޭޖެންޓު މީނޯ ރަޔޯލާ މަސައްކަތްކުރުން މަނާކުރަން އިޓަލީ އެފްއޭއިން ނިންމި ނިންމުން މުޅި ދުނިޔޭގައި ތަންފީޒުކުރާނެ ކަމަށް ފީފާއިން ބުނެފިއެވެ.
ފީފާއިން ހުކުރު ދުވަހު ނެރުނު ބަޔާނެއްގައި ބުނެފައިވަނީ އިޓަލީ އެފްއޭގެ ނިންމުން ފީފާގެ މެމްބަރު ހުރިހާ ގައުމެއްގައި ތަންފީޒުކުރަން ނިންމީ ފީފާގެ ޑިސިޕްލިނަރީ ކޮމިޓީން ބެލުމަށް ފަހުގައި ކަމަށެވެ. މީނޯ (ކާމައިން) ރަޔޯލާ ތިން މަސްދުވަހަށް ސަސްޕެންޑް ކުރިއިރު އޭނާގެ ތިމާގެ ވިޗެންޒޯ ސަސްޕެންޑް ކުރީ ދެ މަސް ދުވަހުގެ މުއްދަތަކަށެވެ.
ރަޔޯލާ ސަސްޕެންޑްކުރަން ނިންމީ ކީއްވެގެންކަން މިހާތަނަށް އިޓަލީގެ އެފްއޭއިން ބުނެފައިނުވާ އިރު، އަންނަ ހަފުތާގެ ތެރޭގައި އެ މައުލޫމާތު ހާމަކުރާނެ ކަމަށް އެ އެސޯސިއޭޝަނުން ވަނީ ބުނެފައެވެ.
މި ފަހުން އިޓަލީގެ ފުޓުބޯޅައިގައި ނަސްލީ ފުރައްސާރައިގެ މައްސަލަ ބޮޑުވެފައިވާ އިރު، ރަޔޯލާ ވަނީ އިޓަލީ އެފްއޭއިން އެކަމަށް ވާގިވެރިވާ ކަމަށް ދާދިފަހުން ބުނެފައެވެ. އަދި އޭނާ ސަސްޕެންޑް ކުރީ އެހެން ބުނެގެން ކަމުގައިވަނީ ނަމަ އެކަމާ ދެކޮޅަށް މަސައްކަތް ކުރާނެ ކަމަށް ވެސް އޭނާ ބުންޏެވެ.
ރަޔޯލާގެ އެޖެންޓުކަމުގެ ދަށުގައިވާ ކުޅުންތެރިންގެ ތެރޭގައި ޕޮގްބާ، އިބްރަހަމޮވިޗް އަދި މި ފަހުން އަޔަކްސްއިން ވިދާލި މަތަޔަސް ޑެ ލެއިޓް ހިމެނެއެވެ. އިޓަލީ އެފްއޭގެ ނިންމުމަށް ފަހު ކުރި ޓްވީޓެއްގައި ރަޔޯލާ ބުނީ ސަސްޕެންޑް ކުރީ ސިޔާސީ ސަބަބަކަށް ކަމަށެވެ.
