ދުނިޔޭގެ އެންމެ ދުވަސްވީ ކުޅޭއެއްޗެހި ވިއްކާ ފިހާރަތައް މުކޭޝް އަމްބާނީ ގަނެފި

ދުނިޔޭގެ އެންމެ ދުވަސްވީ ކުޅޭ އެއްޗެހި ވިއްކާ ފިހާރަ، އިނގިރޭސިވިލާތުގެ ހެމްލީޒްގެ ބެލެނިވެރި ކުންފުނި އިންޑިއާގެ އެންމެ މުއްސަންދި މީހާ ކަމުގައިވާ މުކޭޝް އަމްބާނީ ގަނެފިއެވެ.

މުކޭޝް އަމްބާނީގެ ރިލަޔަންސް ކުންފުނިން ހެމްލީޒް ފިހާރަތައް ޗައިނާގެ ސީ ބެނަރ އިންޓަރނޭޝަނަލް އަތުން ގަނެފައިވަނީ 88 މިލިއަން ޑޮލަރުގެ އަގެއްގައެވެ. ބުރާސްފަތު ދުވަހު ވެވުނު އެއްބަސްވުމުގެ ދަށުން ހެމްލީޒް މަރުކާގެ ކުޑައިގެ ދަށުން 18 ގައުމެއްގައި ހިންގާ 167 ފިހާރައިގެ މިލްކުވެރިކަން ރިލަޔަންސަށް ލިބިފައިވެއެވެ. މި އެއްބަސްވުމުގެ ކުރިން ވެސް ރިލަޔަންސް ކުންފުންޏަކީ ފްރެންޗައިޒް އުސޫލުން އިންޑިއާގައި ހެމްލީޒްގެ 88 ފިހާރައިގެ ވެރި ފަރާތެވެ.

ރިލަޔަންސްގެ މި ވިޔަފާރިއާ އެކު، އެ ކުންފުންޏަށް އެމޭޒަން އަދި ވޯލްމާޓް ފަދަ ކުންފުނިތަކާ ވާދަކުރަން ފަސޭހަވެގެން ދާނެއެވެ. އެ ދެ ކުންފުނިން މިހާރު ވެސް އިންޑިއާގެ ކުރިއަރަމުން އަންނަ އީ-ކޮމަރސް ވިޔަފާރިއަށް ބިލިއަނުން ޑޮލަރު އިންވެސްޓް ކޮށްފައިވެއެވެ.

ރިލަޔަންސް ބްރޭންޑްސްގެ ސީއީއޯ ދަރްޝަން މެހެތާ ވިދާޅުވީ މިއީ އެ ކުންފުނިން ދެކެމުން އައި ހުވަފެނެއް ހަގީގަތަކަށް ވުން ކަމަށެވެ. އަދި ހެމްލީޒްގެ ސަބަބުން ރިލަޔަންސް ބައިނަލްއަގްވާމީ ވިޔަފާރީގައި ނަން ހިނގާ ކުންފުންޏަކަށް ހަދަން މަގުފަހިވާނެ ކަމަށް ވެސް މެހެތާ ވިދާޅުވިއެވެ.

އިންޑިއާގެ އެންމެ މުއްސަނދި މީހާ ކަމުގައިވާ މުކޭޝް އަމްބާނީގެ ރިލަޔަންސް ކުންފުނިން އަންނަނީ އެ ކުންފުނީގެ ވިޔަފާރި ފުޅާކުރުމުގެ ގޮތުން ވިޔަފާރި ޑައިވަރސިފައި ކުރަމުންނެވެ. އެގޮތުން އެ ކުންފުނިން އެންމެ ފަހުން ވާދަކުރަން ފެށި މުއާސަލާތީ ދާއިރާގައި ބޮޑެތި ކާމިޔާބީތަކެއް ހޯދާފައިވެއެވެ. ތިން އަހަރުގެ ތެރޭގައި 300 މިލިއަން ކަސްޓަމަރުން ޖިއޯގެ ހިދުމަތް ހޯދަން ފަށާފައިވެއެވެ.