އިސްލާމީ މަރުކަޒުގައި ސަރަހައްދުގައި ޕާކިން ޒޯނެއް ހަދަނީ
10 މެއި 2019 | ހުކުރު 14:22މާބަލް އޭރިޔާގައި ސައިކަލު ޕާކު ނުކުރުމަށް ވަނީ އެދިފައި
ޕާކިން ޒޯން ހެދުމުގެ މަސައްކަތް ދަނީ ކުރަމުން
އިސްލާމީ މަރުކަޒަށް ނަމާދައްދާ ފަރާތްތަކަށް ހާއްސަކޮށްގެން ޕާކިން ޒޯނެއް ހަދަމުންދާ ކަމަށް މާލެ ސިޓީ ކައުންސިލުން ބުނެފިއެވެ.
މާލެ ސިޓީގެ މޭޔަރު ޝިފާ މުހައްމަދު ވިދާޅުވީ އިސްލާމީ މަރުކަޒަށް ނަމާދަށް އަންނަ ފަރާތްތަކަށް ފަސޭހައަށް އިތުރަށް ޖާގަ ހެދުމުގެ މަސައްކަތް ކުރަމުން އަންނަ ކަމަށެވެ. އަދި މާބަލް އޭރިޔާގައި ސައިކަލު ޕާކު ނުކުރުމަށް ޝިފާ ވަނީ އެދިފައެވެ.
ރަމަޟާން މަސް ފެށުމާއެކު ކޮންމެ ނަމާދު ގަޑިއެއްގައި އިސްލާމީ މަރުކަޒަށް ގިނަ އަދަދެއްގެ މީހުން ނަމާދަށް ދެއެވެ. އެއާއެކު އެސަރަހައްދުގައި ޕާކު ކުރާނެ ޖާގަތައްފުރެއެވެ.
ވަގުތީ ޕަކިން ޒޯން ހަދަނީ ސަލްޓަން ޕާކްގެ ހުޅަނގު ދެކުނުން އޮންނަ ހުސް ބިމުގައެވެ. މީގެ އިތުރުން ސިޓީ ކައުންސިލުން ވަނީ ފިނޭންސް މިނިސްޓްރީ ހިމެނޭ ސަރަހައްދުގައި ވެސް ޕާކިން ޒޯނެއް ހުޅުވާފައެވެ. އަދި ހެންވޭރު ސަހަރާގެ ހުޅަނގު ފަރާތުގައިވާ ބިން ހުސްކޮށް ޕާކިން ޒޯނެއް ވަނީ ހުޅުވާފައެވެ.
ޓްރެފިކްއާ ޕާކިންގެ މައްސަލަތައް ހައްލުކުރުމަށް ސިޓީ ކައުންސިލްގެ އިތުރުން ފުލުހުން ވެސް ދަނީ ޚާއްސަ މަސައްކަތްތައް ކުރަމުންނެވެ.
