ރޯދަ މަސް އެމީހަކާ ބައްދަލުވެ އޭގެ ބޭނުން ހެޔޮ ގޮތުގައި ނުހިފުނު މީހާއަކީ އަބާއްޖަވެރިއެއް: ޚުތުބާ
ޤުރުއާން ބާއްވައިލެއްވުނީ ރަމަޟާން މަހު
ހުކުރު ނަމާދު ވަގުތު، އިސްލާމީ މަރުކަޒު
ރޯދަ މަސް އެމީހަކާ ބައްދަލުވެ އޭގެ ބޭނުން ހެއު ގޮތުގައި ނުހިފިއްޖެ މީހާއަކީ އަބާއްޖަވެރިއެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.
"ރަމަޝާން މަހަކީ އީމާންކަމާއި ހެޔޮ އަމަލުގެ މައްސަރު" މި މައުޟޫގެ މައްޗަށް ބިނާކޮށް މިއަދު ރާއްޖޭގެ ކަންކޮޅުތަކުގެ މިސްކިތްތަކުގައި ދިން ރަމަޟާން މަހުގެ ފުރަތަމަ ހުކުރު ޚުތުބާގައި ބުނީ، ރަމަޟާން މަހަކީ މާތްވެގެންވާ މަހެއް ކަމަށާއި، އެމަހުގެ ބޭނުން އެންމެ ހެޔޮ ގޮތުގައި ހިފަން ޖެހޭނެ ކަމަށެވެ. އެގޮތުން ރަމަޟާން މަހުގައި ޤުރުއާން ބާއްވައިލެއްވުންވެސް މި މަހުގެ މާތްކަން ދެނެގަތުމަށް ފުދޭ ކަމަށް ޚުތުބާގައި ބުނެފައިވެއެވެ.
ޚުތުބާގައި އިތުރަށް ބުނީ، މި މަހުގެ ދަރުމައާއި ޘަވާބު އެންމެ ފުރިހަމައަށް ހާސިލު ކުރުމަށްޓަކައި އެއް ބަޔަކު އަނެއް ބަޔަކަށް ބާރު އަޅައި އެހީތެރިވުމަކީ ވަރަށް މުހިއްމު ކަމެއް ކަމަށެވެ.
"ރަމަޟާން މަހުގެ ދުވަސްތައް ހެއު ގޮތުގައި ހޭދަކުރުމުގައި އެއް ބަޔަކު އަނެއް ބަޔަކަށް އެހީތެރިވާން ޖެހޭނެ، ވެރިން ރައްޔިތުންނަށް، މަސްއޫލުވެރިން އެމީހުންގެ މުވައްޒަފުންނަށް، މުދައްރިސުން ދަރިވަރުންނަށް، ކަންތައްތައް ރާވާ ހިނދު ނަމާދު ވަގުތުތައް ފާއިތުނުވާނެ ގޮތަށް އެކަންތައްތައް ރާވާން ޖެހޭނެ، ފަރުޟު ނަމާދު އޭގެ ވަގުތުގައި އަދާ ކުރުމަށް އެއް ބަޔަކު އަނެއް ބަޔަކަށް ވާގިވެރިވާންޖެހޭނެ." ޚުތުބާގައި ބުނެފައިވެއެވެ.
އޭގެ އިތުރުން، ރޯދަ މަހުގެ އެންމެ މަތިވެރި ނިއުމަތަކީ ލައިލަތުލްޤަދުރި ވިލޭރެ ކަމަށާއި، އިހުލާސްތެރިކަމާއެކު ޘަވާބާއި ދަރުމައަށް އެދިގެން ރަމަޟާން މަހުގެ ރޭތަކުގައި އަޅުކަން ކޮށްފިނަމަ އެމީހެއްގެ އިސްވެ ގޮސްފައިވާ ފާފަތައް ފުއްސަވާނެ ކަމަށްވެސް ޚުތުބާގައި ބުނެފައިވެއެވެ.
"ރަސޫލާ ހަދީޘް ކުރައްވާފައިވާ ބަސްފުޅެއްގެ މާނައިގައިވެއެވެ. " އީމާންކަމާއެކު ﷲ ގެ ހަޟްރަތުން ޘަވާބާއި ދަރުމަ އެދޭ ހާލު ރަމަޟާން މަހުގެ ރޭތަކުގައި އަޅުކަންކޮށްފި މީހާގެ އިސްވެ ގޮސްފައިވާ ފާފަތައް ފުއްސަވާ ދެއްވާނެތެވެ" ޚުތުބާގައި ބުނެފައިވެއެވެ.
އޭގެ އިތުރުން، ހެއު އަމަލު ކުރުން ގިނަ ކުރުމާއި، ރޭއަޅުކަން ކުރުން ގިނަ ކުރުމަކީވެސް ރޯދަ މަހުގެ ޘަވާބު ހާސިލު ކުރުމަށް ކުރެވިދާނެ ކަމެއް ކަމަށް ޚުތުބާގައި ބުނެފައިވެއެވެ.
