ލޯކަލް ޓޫރިޒަމް ކުރިއަރުވަން މިނިސްޓަރު ވަހީދު ލާމަށް
10 މެއި 2019 | ހުކުރު 03:18ލ.އަތޮޅުގެ ހަތަރު ރަށަކަށް ޒިޔާރަތްކުރަން ހަމަޖެހިފައިވޭ
ޓޫރިޒަމް މިނިސްޓަރު އަލީ ވަހީދު މި އަހަރު ކުރީކޮޅު ބޭއްވި ގެސްޓްހައުސް މަހާސިންތާާގައި ވާހަކަފުޅު ދައްކަވަނީ
ލ.އަތޮޅުގެ މީހުން ދިރިއުޅޭ ރަށްރަށުގައި ލޯކަލް ޓޫރިޒަމް ކުރިއެރިވުމަށް، މިނިސްޓަރ އޮފް ޓުވަރިޒަމް އަލީ ވަހީދު އެ އަތޮޅަށް ރަސްމީ ދަތުރުފުޅެއްގައި ފުރާވަޑައިގެންފިއެވެ.
ބުރާސްފަތި ދުވަހު ޓޫރިޒަމް މިނިސްޓްރީން ނެރުނު ބަޔާނެއްގައި ބުނެފައިވަނީ މިނިސްޓަރގެ މި ދަތުރުފުޅަކީ މީހުން ދިރިއުޅޭ ރަށްރަށުގައި ފަތުރުވެރިކަން ކުރިއެރުވުމަށް ހުރި ގޮންޖެހުންތަކާއި ދަތިތައް ބަލާ، އެ ރަށްރަށުގައި ގެސްޓްހައުސް ވިޔަފާރި ފުޅާކުރުކުރުމާ ބެހޭގޮތުން އެ ރަށްރަށުގެ ކައުންސިލްތަކާއި އަތޮޅު ކައުންސިލްތަކާއި މަޝްވަރާކުރެއްވުމުގެ ގޮތުން ކުރައްވާ ދަތުރުފުޅެއް ކަމަށެވެ. މިނިސްޓަރ އަލީ ވަހީދުގެ ދަތުރުފުޅުގައި މަޝްވަރާކުރައްވަން ހަމަޖެހިފައިވަނީ މި ސިނާއަތުގެ ހުރިހާ މަސްލަހަތުވެރިން ވެސް ހިމަނައިގެންނެވެ.
ލޯކަލް ޓޫރިޒަމް ކުރިއެރުވުމުގެ ގޮތުން ރާއްޖޭގެ ރަށްރަށަށް ޓޫރިޒަމް މިނިސްޓަރު އަލީ ވަހީދު ކުރައްވަމުން ގެންދަވާ ސިލްސިލާ ދަތަރުފުޅުތަކުގެ ތެރެއިން ލ. އަތޮޅަށް ވަޑައިގަންނަވާނީ މި މޭ މަހުގެ ނުވަވަނަ ދުވަހުން ފެށިގެން ގޮސް، އެގާރަވަނަ ދުވަހާއި ހަމައަށެވެ. މިނިސްޓަރގެ ދެ ދުވަހުގެ ދަތުރުފުޅުގައި ޒިޔާރަތައްކުރައްވަން ހަމަޖެހިފައިވާ ރަށްތަކުގެ ތެރޭގައި ލ.ގަން، ލ.ފޮނަދޫ، ލ.ކައްދޫ އަދި ލ.ބަރެސްދޫއަށް ޒިޔާރަތްކުރައްވާނެއެވެ.
ޓޫރިޒަމް މިނިސްޓަރުގެ މި ދަތުރުފުޅުގެ މައިގނޑު މަގްސަދަކީ ލ.އަތޮޅުގައި ފަތުރުވެރިކަން ތަރައްގީ ކުރުމަށް ބޭނުންވާ ސިޔާސަތުތައް ބައްޓަންކުރުމުގައި ބޭނުންވާ ހިޔާލާއި ލަފާ ހޯދުންކަމަށް މިނިސްޓްރީން ނެރުނު ބަޔާނުގައި ބުނެފައިވެއެވެ. ލަފާ ހޯދުމަށް ލ.އަތޮޅި ކައުންސިލާއި، ލ.ގަމު ކައުންސިލާއި، ލ.ފޮނަދޫ ކައުންސިލްގެ އިތުރުން ފަތުރުވެރިކަމުގެ ދާއިރާގެ މަސްލަހަތުވެރިންނާއި ބައްދަލުކުރައްވަން ހަމަޖެހިފައިވެއެވެ. ޓޫރިޒަމް މިނިސްޓަރު އަރިހުގައި މި ދަތުރުފުޅުގައި އެއްއައިޓީޑީސީގެ އެމްޑީ މުހައްމަދު ރާއިދުއާއި މިނިސްޓްރީއާއި އެމްއައިޓީޑީސީގެ އިސް އޮފިޝަލުން ބައިވެރިވެވަޑައިގަންނަވާނެއެވެ.
ރާއްޖޭގެ ލޯކަލް ޓޫރިޒަމް އެހެން ހަރުފަތަކަށް ގެންދިިިޔުމަކީ މި ސަރުކާރުގެ ތަސައްވުރުގެ ތެރޭގައި ހިމެނޭ ކަމެކެވެ. އެގޮތުން މިހާރު މި ސިނާއަތުގައި މަސައްކަތްކުރައްވާ ފަރާތްތަކާއި ވިޔަފާރިވެރިންނަށް، މިހާރަށް ވުރެން ފަހި މާހައުލެއް ގާއިމްކޮށްދިނުމަށް މަސައްކަތްކުރަން، މި ސަރުކާރު ހިންގާ ކޯލިޝަންގައި ހިމެނޭ އެންމެ ބޮޑު ޕާޓީ ކަމުގައިވާ އެމްޑީޕީން ރައްޔިތުންގެ މަޖިލިސް އިންތިހާބަށް ނެރުނު އެޖެންޑާ19 މެނިފެސްޓޯގައި ހިމަނާފައިވެއެވެ.
