އެމްޓީސީސީގެ ބަހަކުން ޖެހި ކާރަކަށް ބޮޑެތި ގެއްލުންތަކެއް
9 މެއި 2019 | ބުރާސްފަތި 14:43ޑްރައިވަރު އިނީ ނިދިފައި
އެމްޓީސީސީ ބަހުން ޖެހުނު ކާރު
ހުޅުމާލޭ ތިން ވަނަ ފްލެޓް ކައިރި ޕާކް ކޮށްފައި އޮތް ކާރެއްގައި އެމްޓީސީސީގެ ބަހަކުން ޖެހި އެ ކާރު ބޭނުން ނުކުރެވޭ ވަރަށް ހަލާކު ވެއްޖެއެވެ.
ކާރު ޑްރައިވަރު އަލީ އަފްރާޒް ބުނީ، މެންދުރު 14:20 އެހާކަށް ހާއިރު ދަރިފުޅު ސްކޫލުން ގޮވައިގެން ގޮސް ކާރު ޕާކް ކޮށްފައި ކާރުން ފައިބާން އުޅެނިކޮށް ކުއްލިޔަކަށް އައިސް ބަހަކުން ޖެހުނުކަން އެނގުނު ކަމަށެވެ.
ބަސް ކާރުގައި ޖެހުމާއެކު އެ ކާރު ގޮސް ޖެހުނީ ކުރިމަތީ ގައި ޕާކް ކޮށްފައި އޮތް ޕިކަޕެއްގައި ކަމަށް އޭނާ ބުންޏެވެ.
އެއްވެސް މީހަކަށް އަނިޔާ ނުވާ ކަމަށާއި، ބަހުގައި ހުރި ޑްރައިވަރު ''ނިދިޖެހުނީ'' ކަމަށް ބަސް ދުއްވި ޑްރައިވަރު ބުނެފައިވާ ކަމަށް އަލީ ބުންޏެވެ. ފުލުހުންގެ މީޑިއާ އޮފިޝަލް ވިދާޅުވީ، އެފަދަ މައްސަލައެއް ހުށަހެޅިފައި ނުވާ ކަމަށެވެ.
މި ހަފްތާގެ ހޯމަ ދުވަހު އެމްޓީސީސިގެ ބަހެއް އެކްސިޑެންޓްވެ ހިނގާފައި ދިޔަ ޔޫކްރެއިން މީހަކު ވަނީ މަރުވެފައެވެ. އެ ހާދިސާވެސް ހިނގާފައިވަނީ ބަސް ޑްރައިވަރަށް ނިދިގެން ކަމަށް ބެލެވޭ ކަމަށް ފުލުހުން ބުނެފައިވެއެވެ.
އެމްޓީސީސީގެ ބަސްތައް ސްޕީޑް ލިމިޓަށް ވުރެ ބާރަށް ދުއްވާކަމުގެ ޝަކުވާތައް ދަނީ ދުވަހެއް ދުވަހަށް ބޮޑުވަމުންނެވެ. އަދި ބްރިޖުގައި ބަސް ދުއްވާ އިރު ބާރު ސްޕީޑުގައި ނުރައްކާތެރި ގޮތްގޮތަށް ބަސް ދުއްވާ މައްސަލާގައި ސޯޝަލް މީޑިއާގައި ޑްރައިވަރުންނަށް ބޮޑެތި ފާޑުކިޔުންތައް އަމާޒުވެފައި ވެއެވެ.
މީގެ ދުވަސްކޮޅެއް ކުރިން ބަހަށް އެރި މީހަކު ރަނގަޅަށް ހަމަޖެހި ނުލަނީސް ބަސް ދުއްވާލުމުގެ ސަބަބުން އޭނާ ވެއްޓި އަނިޔާވި މައްސަލައެއް ވެސް ފެންމަތިވެފައި ވެއެވެ. އެ ފާޑުކިޔުންތަކާ ގުޅިގެން މިދިޔަ ހަފުތާގެ ތެރޭގައި ވެސް އެމްޓީސީސީން ބުނެފައި ވަނީ ގަވާއިދާ ހިލާފުވާ ޑްރައިވަރުންނާ މެދު ފިޔަވަޅު އަޅާނެ ކަމަށެވެ.
