ފްރާންސްގެ ސެއިންޓް ފެލީސިއަން އަދި ސެއިންޓް މާސެލިން ޗީޒް ތަގައްޔަރުވެފައިވާތީ އެ ދެ ބާވަތުގެ ޗީޒް ރާއްޖެ އެތެރެކޮށް ވިއްކުން މޯލްޑިވްސް ފުޑް އެންޑް ޑްރަގް އޮތޯރިޓީން މަނާކޮށްފިއެވެ.

އެމްއެފްޑީއޭ އިން ނެރެފައިވާ ނޫސްބަޔާނެއްގައި ބުނީ އީކޮލައި (E coli) ޖަރާސީމުން ތަގައްޔަރު ވުމުގެ ފުރުސަތު އޮތް ސެއިންޓް ފެލިސިއެން (SAINT FELICIEN ) އަދި ސެއިންޓް މާސެލިން ( SAINT MARCELLIN) ބާވަތްތަކުގެ ޗީޒް ޔޫރަޕުން ދިވެހި ރާއްޖެއަށް އެތެރެ ވެފައިވާ ކަމުގެ މައުލޫމާތު ދުނިޔޭގެ ސިއްހަތު ޖަމިއްޔާގެ އިންޓަނޭޝަނަލް ފުޑް ސޭފްޓީ އޮތޯރިޓީސް ނެޓް ވާރކް(INFOSAN) އިންފޮސާން އަދި ޔޫރަޕްގެ ރެޕިޑް އެލާޓް ސިސްޓަމް ފޯ ފުޑް ފީޑް ( RASFF) ރަސްފް އިން އެ އޮތޯރިޓީއަށް އަންގާފައިވާ ކަމަށެވެ. އަދި މި ކަމާ ގުޅިގެން އެ އުފެއްދުންތައް ބާޒާރުން ނެގުމުގެ މަސައްކަތް ކުރަމުން ދާކަމަށް އެ އޮތޯރިޓީގެ ބަޔާނުގައި ބުނެފައި ވެއެވެ.  

ރައްކާތެރި ކަމުގެ ފިޔަވަޅެއްގެ ގޮތުން 31 މެއި 2019 ގެ ނިޔަލަށް މުއްދަތު ހަމަވާ މި ދެ ބާވަތުގެ ޗީޒް ރާއްޖެއަށް އެތެރެކޮށް ވިއްކުމަކީ މަނާ ކަމެއް ކަމަށް އެތޯރިޓީގެ ބަޔާނުގައި ބުނެފައި ވެއެވެ. އަދި ތަގައްޔަރު ވެފައިވާ އެ އުފެއްދުން ވިއްކަން ހުރިކަން ފާހަގަ ކުރެވިއްޖެ ނަމަ އެމްއެފްޑީއޭގެ ނަމްބަރު 3014361 ފޯނަށް ގުޅައި މައުލޫމާތު ހިއްސާކުރުމަށް އެދޭ ކަމަށް ވެސް ބަޔާނުގައި ބުނެފައި ވެއެވެ.