ތުތިބޯވަދިލަމަހުގެ މަސްވެރިކަމުގެ ތަމްރީން ޕްރޮގްރާމްތަކެއް ކުރިއަށްގެންދަނީ

ތުތިބޯވަދިލަ މަހުގެ މަސްވެރިކަމުގެ ތަމްރީން ޕްރޮގްރާމްތަކެއް ކުރިއަށްގެންދިޔުމަށް މިނިސްޓްރީ އޮފް ފިޝަރީޒް، މެރީން ރިސޯސަސް އެންޑް އެގްރިކަލްޗަރުން ނިންމައިފި އެވެ.

ފިޝަރީޒް، މެރީން ރިސޯސަސް އެންޑް އެގްރިކަލްޗަރ މިނިސްޓްރީން ކުރި އިއުލާނެއްގައި ބުނެފައިވަނީ ދިވެހިރާއްޖޭގެ ކަނޑުގެ މުއްސަނދިކަން އެންމެ ފުރިހަމަގޮތުގައި ބޭނުންކުރުމުގެގޮތުން، ދިވެހިރާއްޖޭގެ މާކަނޑުގެ ފުން ސަރަހައްދުގައި ދިރިއުޅޭ ތުތި ބޯވަދިލަމަހުގެ (ޑައިމަންޑް ބެކް ސްކުއިޑް) މަސްވެރިކަން އާލާ ކުރުމުގެ ގޮތުން މަސްވެރިކަން ދަސްކުރުމަށް ޝަޢުގުވެރިވާ ފަރާތްތަކަށް އަމާޒުކޮށްގެން ތަމްރީން ދަތުރުތަކެއް ހިންގުމަށް ގަސްތުކުރާ ކަމަށެވެ. އަދި ތަމްރީނު ދަތުރުތައް ކުރިއަށް ގެންދިއުމަށް ހަމަޖެހިފައިވަނީ ތިއަރީ ސެޝަންތަކަކާއި، އަމަލީ މަސައްކަތްތަކެއްގެ މައްޗަށް ބަހާލައިގެން ކަމަށާއި، މި ދަތުރުގެ ދިގުމިނަކީ 2 ދުވަސް ކަމަށް މިނިސްޓްރީން ބުންޏެވެ.

މިނިސްޓްރީން ބުނީ ތަމްރީނު ޕްރޮގްރާމުގައި ބައިވެރިވުމަށް ބޭނުންފުޅުވާ ފަރާތްތަކަށް ބައިވެރިވުމުގެ ފުރުޞަތު އާންމުކޮށް ހުޅުވާލާފައިވާ ކަމަށެވެ.

ތަމްރީން ޕްރޮގްރާމްތަކުގައި ބައިވެރިވާ ފަރާތަކީ މަސްވެރިކަމުގައި ޢަމަލީގޮތުން ޙަރަކާތްތެރިވާ ފަރާތެއް ކަމުގައިވާންޖެހޭނެ ކަމަށާއި، މަސްވެރިކަން ކުރުމަށް ޝައުގުވެރިވާ ފަރާތެއް ކަމުގައި ވާންޖެހޭނެ ކަމަށް މިނިސްޓްރީން ބުންޏެވެ.

ތަމްރީން ޕްރޮގްރާމުގައި ބައިވެރިވުމަށް އެދި ހުށަހެޅުމުގެ ސުންގަޑިއަކީ 13 ޖޫން 2019 ވާ ބުރާސްފަތި ދުވަހެވެ.