ރަމަޝާންމަހަށް ހާއްސަކޮށްގެން ދީނީ އިހްޔާ ފޯރަމެއް ބާއްވަނީ
7 މެއި 2019 | އަންގާރަ 08:23ފޯރަމް އޮންނާނީ އާދިއްތަ އަދި ބުރާސްފަތި ދުވަހުގެރޭ
ސުވާލު ކުރުމުގެ ފުރުސަތު ކޮންމެ މީހަކަށްވެސް ލިބޭނެ ކަމަށް މިނިސްޓްރީން މައުލޫމާތުދޭ
ރަމަޝާން މަހު އާއްމުންގެ ތެރޭގައި ދީނީ ހޭލުންތެރި ކުރުމުގެ ގޮތުން ''އިހްޔާ ފޯރަމް'' އެއް ބާއްވަން ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީގެ މީޑިއާ އޮފިޝަލް ވިދާޅުވީ، އެ ފޯރަމް އަކީ ދީނީ ގޮތުން މައުލޫމާތު ދިނުމާއި ދީނީ ގޮތުން އުފެދޭ ސުވާލުތަކަށް ޖަވާބު ދިނުމަށް ބާއްވާ ފޯރަމެއް ކަމަށެވެ.
އެ ފޯރަމް ގައި މައުލޫމާތު ދެއްވާނީ ރާއްޖޭގެ އިލްމުވެރިން ކަމަށާއި، ސުވާލު ކުރުމުގެ ފުރުސަތު ބައިވެރިވާ ކޮންމެ މީހަކަށްވެސް ލިބޭނެ ކަމަށް އޭނާ ވިދާޅުވިއެވެ. އެ ޕްރޮގްރާމް އޮންނާނީ އާދިއްތަ ދުަވަހުގެރެ އާއި ބުރާސްފަތި ދުވަހުގެރޭ އިސްލާމީ މަރުކަޒުގެ ހޯލްގައެވެ.
އިސްލާމީ މަރުކަޒުގެ އިތުރުން އެހެނިހެން މިސްކިތް ތަކުގައި ވެސް ދަރުސް ދިނުމުގެ އެކި ކަހަލަ ޕްރޮގްރާމްތައް އިސްލާމިކް މިނިސްޓްރީން ދަނީ ހިންގަމުންނެވެ.
މީޑއާ އޮފިޝަލް ވިދާޅުވީ، ރޯދަމަހަށް ހާއްސަ ކޮށްގެން '' މަގުމަތީ ދައުވަތު''ގެ ނަމުގައި ޕްރޮގްރާމެއް ކުރިޔަށްދާނެ ކަމަށެވެ.
މާލޭގެ އެކި ސަރަހައްދުގައި ބާއްވާ އެ ޕްރޮގްރާމްގައި އޮންނާނީ ދީނީ ނަސޭހަށް ދިނުމާއި ދީނީ ސުވާލުތަކަށް ޖަވާބު ދިނުމެވެ. ރާއްޖެ.އެމްވީ އަށް މައުލޫމާތު ދެއްވަމުން އިސްލާމިކް މިނިސްޓްރީގެ ސްޓޭޓް މިނިސްޓަރު ޝާފިއު އަލީ ވިދާޅުވީ، މިހާރު އެންމެ ހަލުވިކޮށް ކުރިޔަށް ގެންދަނީ ފަގީރުންގެ ދަފްތަރު އެކުލަވައިލުމުގެ މަސައްކަތް ކަމަށެވެ.
މާލޭގެ އިތުރުން ރަށްރަށުން ފަގީރުންގެ ލިސްޓުގައި ޖެހެން ހުށައަޅާފައިވާ ފޯމްތައް ދިރާސާ ކުރުމުގެ މަސައްކަތް ކުރައްވަމުންދާ ކަމަށެވެ. އަދި ރަމަޝާން މަސްތެރޭގައި އެ ލިސްޓު އާއްމު ކުރާނެ ކަމަށެވެ.
