ޒިކުރާ މިސްކިތް ހަދަން ހަވާލުކުރި ކުންފުންޏަށް ނޯޓިސް ދީފި
5 މެއި 2019 | އާދީއްތަ 17:58މަޝްރޫއު އަލުން ކުރިޔަށް ގެންދާނީ ހާމަކަން ބޮޑު ގޮތެއްގައި
ޒިކްރާ މިސްކިތް
މަޖީދީ މަގުގައި ހުންނަ ޒިކުރާ މިސްކިތް ހުރި ބިމުގައި 10 ބުރީގެ އިމާރާތް އަޅަން ހަވާލުކުރި ކުންފުނީގެ މަސައްކަތް ހުއްޓާލުމަށް އެ ކުންފުންޏަށް އިސްލާމިކް މިނިސްޓްރީން އަންގައިފިއެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ޒިކްރާ މިސްކިތް އަލުން އިމާރާތް ކޮށް އެތަނުގައި 10 ބުރީގެ އިމާރާތެއް އެޅުމަށް އެސްޖޭ ކޮންސްޓްރަކްޝަން ކުންފުންޏާ ހަވާލު ކޮށްފައި ވަނީ 2018 ވަނަ އަހަރުގެ ޖުލައި މަހުއެވެ.
އެ މިސްކިތް އިމާރާތް ކުރުމުގެ މަޝްރޫއު އަށް 130 މިލިއަން ރުފިޔާ އަރާނެ ކަމަށް އޭރުގެ ސަރުކާރުން ވަނީ ބުނެފައެވެ. އޭގެ ތެރެއިން 30 މިލިއަން ރުފިޔާ ހަރަދު ކޮށްފައިވަނީ ސަރުކާރުންނެވެ.
އިސްލާމިކް މިނިސްޓްރީގެ ޑެޕިއުޓީ މިނިސްޓަރު ޝާފިއު އަލީ ރާއްޖެއެމްވީ އަށް ވިދާޅުވީ، އެސްޖޭ ކުންފުންޏަށް ޒިކުރާ މިސްކިތް އިމާރާތް ކުރަން ދީފައިވާ މުއްދަތަށް އެ މަސައްކަތް ނިމިފައި ނުވާ ކަމަށެވެ. އެހެންކަމުން އެތަން ހުސްކޮށް ދިނުމަށް ސަރުކާރުން 30 ދުވަހުގެ ނޯޓިސްއެއް އެ ކުންފުޏްނަށް ދީފައިވާ ކަމަށެވެ.
''އެންމެ ބޮޑު އެއް ޕްރޮޖެކްޓަކަށް އޮތީ ޒިކުރާ މިސްކިތުގައި އެހުރި ބިމުގައި އިމާރާތެއް ކުރުމަށްޓަކައި ބަޔަކާ ހަވާލުކޮށްގެން ދިޔަ ޕްރޮޖެކްޓެއް. އޭގެ ކޮންޓެރްކްޓަރ ގޮތަށް ޓާމިނޭޓް ކުރަން އަޅުގަނޑުމެން މިހާރު ވަނީ 30 ދުވަހުގެ ނޯޓިސްއެއް ދީފައި. އެހެންވީމަ 30 ދުވަސް ނޯޓިސް ހަމަވީމަ އެ ޓާމިނޭޝަން ޕްރޮސެސް އެގޮތަށް ގެންދިޔުމަށް މިނިސްޓްރީން ނިންމާފައި މި ވަނީ،'' ޝާފިއު ވިދާޅުވިއެވެ.
އެ މަޝްރޫއު އެހެން ބަޔަކާ ހަވާލު ކުރަނީ ބިޑަށް ހުޅުވާލައިގެން، ހާމަ ގޮތެއްގައި ކަމަށް ޝާފިއު ވިދާޅުވިއެވެ. ކުރީގެ ސަރުކާރުން އެޑްވާންސަށް ދީފައިވާ 30 މިލިއަން ރުފިޔާ ދައުލަތަށް އަނބުރާ ހޯދުމުގެ މަސައްކަތް ކުރައްވާނެ ކަމުގެ ޔަގީންކަން ޝާފިއު ވަނީ ދެއްވާފައެވެ.
ޒިކުރާ މިސްކިތް ހުރި ސަރަހައްދުގައި މިސްކިތާ އެކު އޮފީސް އިމާރާތްތައް ވެސް ހިމެނޭ ގޮތަށް އެސްޖޭ ކޮންސްޓްރަކްޝަނާ ހަވާލުކުރީ ކޮންޓްރެކްޓާ ފައިނޭންސް އުސޫލުންނެވެ. މިސްކިތުގެ ގޮތުގައި ބޭނުންކުރާނީ އިމާރާތުގެ ފުރަތަމަ ތިން ބުރިއެވެ.
މަޝްރޫއު ހަވާލުކުރި ރަސްމިއްޔާތުގައި އޭރުގެ އިސްލާމިކް މިނިސްޓަރު ވިދާޅުވެފައި ވަނީ މި ރޯދަ މަހު ނަމާދުކުރެވޭ ވަރަށް އިމާރާތުގެ ތިން ބުރި ނިންމުމަށް ހަމަޖެހިފައިވާ ކަމަށެވެ. ނަމަވެސް ސޮއިކުރިތާ އަހަރެއް ވީއިރު އެ ތަނުގައި މަސައްކަތެއް ކޮށްފައެއް ނުވެއެވެ. އެނގިފައިވާ ގޮތުގައި އެ މަސައްކަތް ފަށައިނުގަނެވި ލަސްވެގެން ދިޔައީ އެ ބިމުގެ ރަޖިސްޓްރީގެ މައްސަލަތަކަކާ ގުޅިގެންނެވެ. އަދި އެ ބިމުގައި ސްޓެލްކޯގެ 50 ވަރަކަށް ޑިސްޓްރިބިއުޝަން ފޮށި ހުރުމަކީ ވެސް އެ މަސައްކަތް ފެށުމަށް ކުރިމަތިވި ހުރަހެއް ކަމަށް އެނގިފައި ވެއެވެ. އެ މަޝްރޫއު އެސްޖޭ ކޮންސްޓްރަކްޝަނާ ހަވާލުކުރީ 25 މަސް ދުވަހުގެ ތެރޭގައި ނިންމާ ގޮތަށެވެ.
ޒިކުރާ މިސްކިތަކީ ކުރީގެ ރައީސް މައުމޫން އަބްދުލް ގައްޔޫމާއި އަބްދުﷲ ޔާމީންގެ ބައްޕާފުޅު އަބްދުލްގައްޔޫމް ސީދީގެ ހަނދާނުގައި 1980ގެ އަހަރުތަކުގެ ކުރީކޮޅު އިމާރާތްކުރި މިސްކިތެކެވެ.
