ރިހާނާއަށް އަނިޔާ ކުރިތާ 10 އަހަރު ފަހުން ކްރިސް ބްރައުން އޭނާގެ ފޮޓޯއަކަށް ކޮމެންޓްކޮށްފި

އެމެރިކާގެ މަޝްހޫރު އާރް އެންޑް ބީ ލަވަކިޔުންތެރިޔާ ކްރިސް ބްރައުން، އޭނާގެ ކުރީގެ ލޯބިވެރިޔާ ރިހާނާ ކިބައިން އާ މިއުޒިކް އުފެއްދުމަށް އެދިއްޖެއެވެ.

ބާބެޑޮސްއަށް ނިސްބަތްވާ ރިހާނާ އާއި ކްރިސް ލޯބީގެ ގޮތުން ގުޅުނީ 2008 ވަނަ އަހަރެވެ. އަދި ދެ މީހުން ވަކިވެގެން ދިޔައީ ބޮޑު ކަންތައް ގަނޑަކަށް ފަހުއެވެ.

އެގޮތުން، 2009 ވަނަ އަހަރުގެ ފެބްރުއަރީ މަހު ދެ މީހުންގެ މެދުގައި ހިނގި ޒުވާބެއް ބޮޑުވެ، ރިހާނާއަށް ކްރިސް ވަނީ އަނިޔާކޮށްފައެވެ. އަދި ރިހާނާ މޫނު މަތީގައި ކްރިސް ޖަހާފައިވާ އިރު، އެ ނިޝާންތައް ފެންނަ ފޮޓޯއެއް އެ ދުވަސްވަރު ވަނީ އާންމުވެފައެވެ.

ކްރިސް އަމިއްލައަށް ފުލުހުންނަށް ހަވާލުވި ނަމަވެސް، މި ކަމުގެ ސަބަބުން އޭނާގެ މިއުޒިކް ކެރިއާރަށް އަސަރު ކުރިއެވެ. އަދި އޭގެ ފަހުން އޭނާ އާއި ރިހާނާއާ ދެމެދު އޮތް ގުޅުން މުޅިން ކެނޑިގެން ދިޔައިރު، ކޯޓުން ވަނީ ފަސް އަހަރުގެ މުއްދަތަކަށް ރިހާނާއާ 50 ފޫޓް ކައިރިއަށް ނުދިއުމަށް ކްރިސްއަށް އަންގާފައެވެ.

މި ހާދިސާއަށް މިހާރު 10 އަހަރު ވެފައިވާއިރު، މި ހަފްތާގައި ރިހާނާ އިންސްޓަގްރާމްގައި ޕޯސްޓްކުރި ފޮޓޯއަކަށް ކްރިސް ވަނީ ކޮމެންޓް ކޮށްފައެވެ.

"(ރިހާނާ) އިންޓަނެޓް ބްރޭކް ކުރަނީ. ކުރިއަށްދޭ، ކުއީން،" ކްރިސް ކޮމެންޓް ކުރިއެވެ. އަދި އެ އަށް ފަހު އޭނާ ކުރި ކޮމެންޓެއްގައި މިއުޒިކް އަވަސް ކޮށްދިނުމަށް ވަނީ އެދިފައެވެ.

ރިހާނާގެ އިންސްޓަގްރާމް ފޮޓޯއަކަށް ކްރިސް ބްރައުން ވަނީ ކޮމެންޓް ކޮށްފައި

މީގެ ކުރިން ވެސް ކްރިސް ވަނީ ރިހާނާގެ އިންސްޓަގްރާމް ޕޯސްޓަކަށް ކޮމެންޓް ކޮށްފައެވެ. އޭގެ ސަބަބުން ރިހާނާގެ ފޭނުން ވަރަށް ރުޅިގަދަވިއެވެ.

އެގޮތުން، ބައެއް ފޭނުން ކްރިސް އެހެން ކަމަކާ އުޅުމަށް ގޮވާލަމުންދާ އިރު ރިހާނާއާ "ކައިރިވާން ނޫޅުމަށް" އަނެއް ބަޔަކު ދަނީ ގޮވާލަމުންނެވެ.