މިފްކޯއިން ތުތިބޯވަދިލަމަސް މާކެޓަށް ނެރެފި
މިފްކޯއަށް ތުތިބޯވަދިލަމަސް ކިލޯއެއް ގަންނަނީ 180ރ. އަށް
ތުތިބޯވަދިލަމަސް (ޑައިމެންޑް ބެކް ސްކުއިޑް)
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ޑައިމެންޑް ބެކް ސްކުއިޑް (ތުތި ބޯވަދިލަމަސް) ރާއްޖޭގެ މާކެޓަށް ނެރެފިއެވެ.
ތުތިބޯވަދިލަމަސް މާކެޓަށް ނެރުމުގެ ހަފްލާގައި ވާހަކަ ދައްކަވަމުން މިފްކޯގެ ސީއީއޯ އިސްމާއީލު ފައުޒީ ވިދާޅުވީ ތުތިބޯވަދިލަމަހަކީ ރާއްޖޭގެ ކަނޑުތަކުން އެންމެ ތާޒާކޮށް ބާނައިގެން ގެންނަ މަސް ކަމަށާއި މިހާރު 800 ކިލޯ މަސް މިފްކޯއަށް ގެނެސްފައިވާ ކަމަށެވެ.
ކުރިއަށް އޮތްތަނުގައި ތުތިބޯވަ ދިލަމަސް މިއަށް ވުރެން ރަނގަޅު އަގެއްގައި ރައްޔިތުނަށް ފޯރުކޮށްދިނުމަށްޓަކައި މަސައްކަތް ކުރަމުންދާ ކަމަށް ފައުޒީ ވިދާޅުވިއެވެ. އަދި މި މަހަށް ޑިމާންޑް އެބައޮތް ކަމަށް އޭނާ ވިދާޅުވިއެވެ.
ފައުޒީ ވިދާޅުވީ މިހާރު ވެސް މާކެޓްގައި ރާއްޖެއިން ބޭރުން އެތެރެ ކޮށްފައިވާ މަސް އެބަހުރި ކަމަށާއި ނަމަވެސް އެ އަށް ވުރެން މާ ތާޒާކޮށް ކަސްޓަމަރުންނަށް މިފްކޯ އިން މިމަސް ފޯރުކޮށްދެވޭނެ ކަމަށެވެ.
"އަޅުގަނޑުމެން ބަލާނަން އަޅުގަނޑުމެންނަށް ލިބޭ ކުއަންޓިޓީއަށް ބޭސްކޮށްފައި. އިތުރުވާވަރަށް މަސް ލިބޭ ކަމުގައި ވަނީނަމަ މިމަސް ރާއްޖެއިން ބޭރަށް އެކްސްޕޯޓް ކުރުމުގެ ވިސްނުން އެބަ ގެންގުޅެން. މާލޭ އޭރިޔާގައި މިފްކޯގެ ދެ ފިހާރަ އެބަހުރި އެއީ ހުޅުމާލެ އާއި މާލޭގައި. މި ދެ ފިހާރައިން ވެސް މި މަސް ގަންނަން ލިބޭނެ،" ފައުޒީ ވިދާޅުވިއެވެ.
ތުތިބޯވަދިލަމަސް މާކެޓަށް ތައާރަފްކޮށްދެއްވީ މިފްކޯގެ މަސްފިހާރައިގައި ހޮނިހިރު ދުވަހު ބޭއްވި ހަފްލާއެއްގައި ފިޝަރީޒް މިނިސްޓްރީގެ ސްޓޭޓް މިނިސްޓަރ ހަސަން ރަޝީދެވެ. ދިވެހި މަސްވެރިންގެ އަތުން މިފްކޯއަށް ތުތިބޯވަދިލަމަސް ކިލޯއެއް ގަންނަނީ 180ރ. އަށެވެ. މިފްކޯއިން ކުރިއަށްގެންދާ ޕްރޮމޯޝަނަލް އިވެންޓްތަކުގައި ބޯވަ ދިލަމަހުން ތައްޔާރުކުރެވޭ ރެސިޕީތަކެއް ހިމެނުމަށް ގަސްތުކޮށްފައިވާ ކަމަށް އެކުންފުނިން ބުނެއެވެ. ތުތިބޯވަދިލަމަހެއްގެ ބަރުދަނުގައި 16 ލިލޯއާއި 18 ކިލޯހުރެއެވެ.
މިފްކޯއިން ތުތިބޯވަދިލަ މަހުގެ އެކި ބައިތައް ވިއްކަނީ އެކި އަގުގައވެެ. އެ ގޮތުން އަގުތައް އުޅެނީ ކިލޯއެއް 160ރ. އާއި 250ރ. އަދި 250ގ. ކަޓްޕީސް 75.50ރ. ގައެވެ.
ޑައިމެންޑް ބެކް ސްކުއިޑްގެ (ތުތި ބޯވަދިލަމަސް) މަސްވެރިކަން ދިވެހި ރާއްޖެ އަށް ތަޢާރަފްކުރުމަކީ މި ސަރުކާރުގެ 100 ދުވަހުގެ ވައުދެއްގެ ތެތޭގައި ހިމެނޭ ވައުދެކެވެ. ސަރުކާރުން ވަނީ ފާއިތުވި ހަތަރު މަހެއްހާ ދުވަހުގެ ތެރޭގައި އެ ކަމަށްޓަކައި މަސްވެރިންނަށް ތަފާތު ތަމްރީން ޕްރޮގްރާމްތައް ހިންގައި ވަސީލަތްތައް ވެސް ފޯރުކޮށްދީފައެވެ. ބައެއް ފަރާތްތަކުން ވަނީ މި މަސައްކަތް މިހާރު ކުރަން ފަށާފައެވެ.
