ޔުނައިޓެޑުން ބޭނުންވަނީ 160 މިލިއަން ޕައުންޑަށް ވުރެ އަގުބޮޑުކޮށް ޕޮގްބާ ވިއްކާލަން

މެންޗެސްޓާ ޔުނައިޓެޑުން ބޭނުންވަނީ 160 މިލިއަން ޕައުންޑަށް ވުރެ އަގުބޮޑުކޮށް އެ ކްލަބަށް ކުޅެމުން އަންނަ ފްރާންސްގެ މިޑްފިލްޑަރ ޕައުލް ޕޮގްބާ ވިއްކާލަން ކަމަށް ރިޕޯޓްތައް ބުނެފިއެވެ.

ޑެއިލީ މެއިލްއިން ބުނީ، ޕޮގްބާ ބަހައްޓަން ޔުނައިޓެޑުން ބޭނުންވާ ކަމަށާއި، ނަމަވެސް އޭނާ ގަންނަން 160 މިލިއަން ޕައުންޑަށް ވުރެ ބޮޑު ހުށެހެޅުމެއް އައިސްފި ނަމަ، އެ ހުށަހެޅުމެއް ބަލައިގަންނަން ކްލަބުން ނިންމާފައިވާ ކަމަށެވެ.

ރިޕޯޓްތައް ބުނާ ގޮތުން މިދިޔަ ސީޒަނުގައި ޔުނައިޓެޑް ދޫކޮށް ބާސެލޯނާއަށް ބަދަލުވާން ޕޮގްބާ ބޭނުންވި ކަމަށާއި، ނަމަވެސް ކުރިޔަށް އޮތް ޓްރާންސްފާގައި އޭނާ ބޭނުންވަނީ ރެއާލް މެޑްރިޑަށް ބަދަލުވާން ކަމަށެވެ.

ކުރިޔަށް އޮތް ސީޒަނަށް ތައްޔާރުވުމުގެ ގޮތުން ޕޮގްބާގެ ސޮއި ހޯދުމަށް ރެއާލް އާއި ޔުވަންޓަސްގެ އިތުރުން ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ބާސެލޯނާ ވެސް ހިމެނެއެވެ.

ޔުނައިޓެޑާ އެކު ޕޮގްބާ ހާދާފައިވާ އެއްބަސްވުން 2021 ވަނަ އަހަރު ހަމަވާ އިރު، އޭނާ އަށް މިހާރު ލިބެނީ ހަފްތާ އަކު 290،000 ޕައުންޑެވެ.

ބައެއް ރިޕޯޓްތައް ބުނާ ގޮތުން ޔުނައިޓެޑާ އެކު ޕޮގްބާ ހަދާފައިވާ އެއްބަސްވުން ހަމަވަންދެން އޭނާ އެ ކްލަބުގައި މަޑުކުރާނެއެވެ. ނަމަވެސް މިކަން އަދި ކަށަވަރެއް ނުވެއެވެ.

ޔުނައިޓެޑުން 2010 ވަނަ އަހަރު ކެރިޔަރު ފެށި އުމުރުން 25 އަހަރުގެ ޕޮގްބާ ވަނީ މިހާތަނަށް އެ ޓީމަށް ކުޅުނު 133 މެޗުގައި 31 ލަނޑު ކާމިޔާބުކޮށްފައެވެ. އޭނާ ވަނީ އެ ޓީމާ އެކު ލީގް ކަޕް އަދި ޔޫރޮޕާ ލީގު ވެސް ކާމިޔާބުކޮށްފައެވެ.

ޕޮގްބާ ވަނީ ޔުވަންޓަސް އަށް ވެސް ކުޅެ ގިނަ ކާމިޔާބީތަކެއް ހޯދާފަ އެވެ. އޭނާ ވަނީ އެ ޓީމަށް ކުޅުނު 178 މެޗުގައި 34 ލަނޑު ކާމިޔާބުކުރުމުގެ އިތުރުން، އެ ޓީމާ އެކު އިޓާލިއަން ލީގު ހަތަރު ފަހަރު، ކޮޕާ އިޓާލިއާ ދެ ފަހަރު އަދި އިޓާލިއަން ސުޕާކަޕް ދެ ފަހަރު ކާމިޔާބުކޮށްފަ އެވެ.

ފްރާންސާ އެކު 2013 ވަނަ އަހަރު 20 އަހަރުން ދަށުގެ ވޯލްޑްކަޕް އަދި މިދިޔަ އަހަރު ރަޝިއާގައި ބޭއްވި ވޯލްޑް ކަޕް ކާމިޔާބުކޮށްފައިވާ ޕޮގްބާ ވަނީ ސީނިއާ ޓީމުގައި ހިމެނި 66 މެޗު ކުޅެ 10 ލަނޑު ކާމިޔާބުކޮށްފައެވެ.