ޕާކިސްތާނުގެ ފޮރިން މިނިސްޓަރު ރާއްޖެ އާއި ލަންކާއަށް ކުރައްވަން އުޅުއްވި ދަތުރުފުޅު ކެންސަލް
4 މެއި 2019 | ހޮނިހިރު 07:53އެންމެ ފުރަތަމަ ވަޑައިގަންނަވަން އުޅުއްވީ ރާއްޖެއަށް، އެއަށްފަހު ލަންކާއަށް
ޕާކިސްތާނުގެ ފޮރިން މިނިސްޓަރ ޝާހް މަހުމޫދު ގުރައިޝީ
ޕާކިސްތާނުގެ ފޮރިން މިނިސްޓަރ ޝާހް މަހުމޫދު ގުރައިޝީ ރާއްޖެ އާއި ލަންކާއަށް ކުރައްވަން ނިންމެވި ދަތުރުފުޅު، ސަލާމަތީ ސަބަބުތަކަށްޓަކާ ކެންސަލް ކުރައްވައިފިއެވެ.
ޕާކިސްތާނުގެ ނޫސްތަކުގައި ވާ ގޮތުން ގުރައިޝީ ރާއްޖެއަށް ކުރައްވަން އުޅުއްވީ އެއް ދުވަހު ދަތުރުފުޅެކެވެ. ބުރާސްފަތި ދުވަހު ރާއްޖެ ވަޑައިގެންނެވުމަށްފަހު، ލަންކާއަށް ހުކުރު ދުވަހު ވަޑައިގެންނެވުމަށް އޮތީ ހަމަޖެހިފައެވެ. ނަމަވެސް މިދިޔަ މަހުގެ 21 ވަނަ ދުވަހު ސްރީލަންކާއަށް ދިން ޓެރަރިސްޓު ހަމަލާތަކާ ގުޅިގެން ދަތުރު ކެންސަލް ކުރެއްވީ ކަމަށް ނޫސްތަކުގައިވެއެވެ.
ގުރައިޝީ ރާއްޖެ ވަޑައިގަންނަވަން އޮތް ދަތުރު ކެންސަލް ކުރެއްވި އިރު މި މަހުގެ ދެ ވަނަ ދުވަހު ލަންކާގައި ހުންނަ އެެމެރިކާގެ އެމްބަސީއިން ނެރުނު ލެވެލް ދޭއްގެ ޓްރެވަލް އެޑްވައިޒަރީގައި ބުނެފައި ވަނީ ރާއްޖެއަށް އެއްވެސް އިންޒާރަކާ ނުލާ ޓެރަރިސްޓް ހަމަލާއެއް ދީފާނެ ކަމުގެ ބިރު އެބައޮތް ކަމަށެވެ.
އެ ޓްރެވަލް އެޑްވައިޒަަރީގައި ވަނީ ހަމަލާދީފާނެ ކަމަށް ބެލެވޭ ތަންތަން ވެސް ހިމަނާފައެވެ. އޭގެތެރޭގައި ރާއްޖޭގެ ފިހާރަތަކާއި ސަރުކާރުގެ ވުޒާރާތަކުގެ އޮފީސްތަކާއި ރިސޯޓްތައް ފަދަ ތަންތަން އޭގައި ވަނީ ހިމަނާފައެވެ.
ރާއްޖެއަށް ނުރައްކާތެރި ހަމަލާއެއް އައިސްދާނެކަމަށްޓަކައި އިމިގްރޭޝަނުން ވަނީ ރާއްޖެއަށް އިތުރުވާ މީހުން މޮނިޓަރ ކުރުމަށް ޚާއްސަ އިސްކަމެއް ދެމުންނެވެ. އަދި ރާއްޖެއަށް އަންނަ ބޭރުގެ ފަރާތްތަކަށް ޚާއްސަ ކޮށްގެން ވިސާގެ ކަންތައްތައް ގާތުން ބަލަމުންދާ ކަމަށް އެ އިދާރާއިން ވަނީ ހާމަކޮށްފައެވެ.
ލަންކާއަށް ދިން ހަމަލާ އާއި ގުޅިގެން އެތައް ބަޔަކު މަރުވެފައިވާއިރު އެ ހަމަލާ ދީފައި ވަނީ ދީނީ ގޮތުން ހަރުކަށި ޖަމާއަތުގެ ބައެއް ކަމަށް އެ ގައުމުގެ ސަރުކާރުން ވަނީ ބުނެފައެވެ.
އެކަމާ ގުޅޭގޮތުން މިހާތަނަށް ފޮރިން މިނިސްޓްރީން އެއްޗެއް ހާމަކޮށްފައެއް ނުވެއެވެ.
