ތަރާވީސް ކުރަން ގެންނަ މީހުން ހާއްސަ ހުއްދަ ނަގަންޖެހޭ
ވެލާނާ އިންޓަނޭޝަނަލް އެއާޕޯޓް
ވިސާ ހަމަޖެހުނުކަން އިމިގްރޭޝަނުން ނާންގަނީސް، ރާއްޖެ ދަތުރު ކުރެއްވިކަމުގައި ވިޔަސް، ރާއްޖެ އެތެރެވުމުގެ ހުއްދަ ދެވެން ނެތް ކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު އަޙްމަދު ޙުސައިން (ހަނަފީ) ވިދާޅުވެއްޖެއެވެ.
އިމިގްރޭޝަން ކޮންޓްރޯލަ އެގޮތަށް އިލްތިމާސް ކުރެއްވީ ރޯދަ މަހު އިމާމުވެ ތަރާވީހު ނަމާދު ކުރުމަށް ރާއްޖޭން ބޭރުން ގެންނަ ހާފިޒުން ހާއްސަ ހުއްދައެއް ނަގަން ޖެހޭ ގޮތަށް އިމިގްރޭޝަނުން ހަމަޖައްސާފައިވަނިކޮށް ކަމަށެވެ.
ހަނަފީ ކުރެއްވި ޓްވީޓެއްގައި ވިދާޅުވީ ވިސާ ހަމަޖެހުނުކަން އިމިގްރޭޝަނުން ނާންގަނީސް ރާއްޖެ ދަތުރު ކުރެއްވި ކަމުގައި ވީނަމަވެސް، ރާއްޖެ އެތެރެވުމުގެ ހުއްދަ ދެވެން ނޯންނާނެ ކަމަށާއި އެހެންކަމުން އެކަމުގައި އެންމެހާ ފަރާތްތަކުން އެއްބާރުލުން ދެއްވުމަށް އިލްތިމާސްކުރާ ކަމަށެވެ.
އިމިގްރޭޝަނުން އިލްތިމާސްކޮށްފައި ވަނީ ބޭރުގެ ހާފިޒުންނަށް މިފަހަރު ޖަހައިދެނީ ވަކި މުއްދަތަކަށް ދޫކުރާ ހާއްސަ ވިސާއެއް ކަމަށާއި އެ ވިސާ ހޯދަން އިސްލާމިކް މިނިސްޓްރީން ހުއްދަ ބޭނުންވާނެ ކަމަށެވެ. ހާފިޒުންގެ ހުއްދައަށް އެދި ހުށަހަޅަން ޖެހޭނީ މިނިސްޓްރީ ދޫކުރާ ހުއްދައިގެ ކުލަ ކޮޕީ އާއި ޖަމިއްޔާއަކުން ހުއްދައަށް އެދޭނަމަ، އެ ޖަމިއްޔާގެ ރަޖިސްޓްރީގެ ކޮޕީއެވެ.
ރާއްޖޭން ބޭރުން ގެންނަ ހާފިޒުން ހާއްސަ ހުއްދައެއް ނަގަން ޖެހޭ ގޮތަށް ބަދަލު ކުރީ ސްރީލަންކާގައި ދިން ޓެރަރިސްޓް ހަމަލާއާ ގުޅިގެން، ރާއްޖޭގައި ސަލާމަތީ ފިޔަވަޅުތައް ވަރުގަދަ ކޮށްފައިވަނިކޮށެވެ.
