މެލޭޝިއާގެ އުއްތަމަ ފަނޑިޔާރަކަށް ފުރަތަމަ ފަހަރަށް އަންހެނަކު

މެލޭޝިއާގެ އެއްމެ މަތީ ކޯޓުގެ އުއްތަމަ ފަނޑިޔާރަކަށް ފުރަތަމަ ފަހަރަށް އަންހެނަކު އައްޔަން ކުރައްވައިފިއެވެ.

ބުރާސްފަތި ދުވަހު އެ މަގާމަށް އައްޔަން ކުރައްވާފައި ވަނީ މެލޭޝިއާގެ ފެޑެރަލް ކޯޓުގެ ފަނޑިޔާރުކަން ކުރައްވަމުން ގެންދަވާ އުމުރުން 60 އަހަރުގެ މައިމުން ތުއަން މަތުއެވެ. މެލޭޝިއާގެ ބޮޑު ވަޒީރުގެ އޮފީހުން ބުނީ، ބޮޑު ވަޒީރުގެ ލަފާފުޅުގެ މަތިން، ރަސްގެފާނު ރުހުން ދެއްވުމުން ގާނޫނާއި ގަވާއިދުގެ މަތިން އެކަމަނާ އެ މަގާމަށް އައްޔަންކޮށްފައިވާ ކަމަށެވެ.

އުއްތަމަ ފަނޑިޔާރުގެ މަގާމަށް އައްޔަން ކުރެއްވުމުގެ ކުރިން އެކަމަނާ ވަނީ ތިން ކޯޓެއްގައި މަސައްކަތް ކުރައްވާފައެވެ. އެއީ، ކުއަލަލަމްފޫރު ހައި ކޯޓު، ޝާހް އަލަމް ހައިކޯޓުގެ އިތުރުން ފެޑެރަލް ކޯޓެވެ. ޔުނިވާސިޓީ މެލެޔާއިން ތައުލީމް ހާސިލް ކުރެއްވި ތުއަން އެންމެ ފުރަތަމަ ޝަރުއީ ދާއިރާގައި މަސައްކަތް ކުރެއްވީ ކުއަލަލަމްޕޫރް ހައިކޯޓުގައެވެ. އެ ކޯޓުގައި އަހަރެއްހާ ދުވަސް ވަންދެން އެކަމަނާ ފުރުއްވެވީ ޖުޑީޝަލް ކޮމިޝަނަރގެ މަގާމެވެ.

އާ އުއްތަމަ ފަނޑިޔާރަކު މެލޭޝިޔާގައި އައްޔަންކޮށްފައި ވަނީ އެ މަގާމު ފުރުއްވަމުން ގެންދެވި ރިޗަޑް މަލަންޖުމް މިދިޔަ މަހުގެ 12 ވަނަ ދުވަހު އެ މަގާމުން މުސްކުޅި ކުރެއްވުމާ ގުޅިގެންނެވެ. ރިޗަޑް އުއްތަމަ ފަނޑިޔާރުކަން ކުރެއްވި 10 މަސް ތެރޭގައި އެމަނިކުފާނު ވަނީ، އެގައުމުގެ ޝަރުއީ ދާއިރާއަށް ބޮޑެތި އިސްލާހުތަކެއް ގެންނަވާފައެވެ.

މެލޭޝިއާގެ ގައި ފަނޑިޔާރުން މުސްކުޅިކުރައްވާ އުމުރަކީ 66 އަހަރެވެ. ނަވާރަ ސަތޭކަ ފަސްދޮޅަސް ތިން ވަނަ އަހަރު އިނގިރޭސިންގެ ދަށުން މިނިވަންވުމަށް ފަހު މެލޭޝިއާގައި އުއްތަމަ ފަނޑިޔާރު ކަން ކުރައްވާފައިވާ 15 ބޭފުޅުންނަކީ ވެސް ފިރިހެނުންނެވެ.