ކުރިޔަށް އޮތް ސީޒަނަށް ތައްޔާރުވުމުގެ ގޮތުން މާޒިޔާ ސްޕޯޓްސް އެންޑް ރެކްރިއޭޝަން އަދި ޓީސީ ސްޕޯޓްސް ކްލަބަށް ބޭރު ގައުމަކުން ޓްރެއިނިން ކޭމްޕެއް ހަމަޖައްސައިދޭން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.
ވީޓީވީގެ "ވީ ސްޕޯޓްސް" ޕްރޮގްރާމްގައި ވާހަކަދައްކަވަމުން އެފްއޭއެމްގެ ރައީސް ބައްސާމް އަދީލް ޖަލީލު ވިދާޅުވީ، އޭއެފްސީ ކަޕުން މިދިޔަ ސީޒަނުގައި ޖާގަ ލިބި، އެ މުބާރާތް ކުޅުމުގެ ފުރުސަތު މިއަހަރު ނުލިބުނު ދެ ޓީމު ޓްރެއިނިން ކޭމްޕަކަށް ބޭރު ގައުމަކަށް ފޮނުވަން މަސައްކަތް ކުރަމުން އަންނަ ކަމަށެވެ.
އޭއެފްސީ ކަޕުން ރާއްޖޭގެ ދެ ކްލަބަކަށް އަބަދުވެސް ޖާގަ ލިބެއެވެ. ނަމަވެސް މިދިޔަ ސީޒަނުގެ ދިރާގު ދިވެހި ޕްރިމިއާ ލީގުގެ ޗެމްޕިއަން ޓީސީ އާއި ދެ ވަނަ ހޯދި މާޒިޔާއަށް އޭއެފްސީ ކަޕަށް މި އަހަރު ނުދެވުނީ ކްލަބް ލައިސަންސް ނުލިބުމުގެ ސަބަބުންނެވެ.
މިކަމުގެ ސަބަބުން ބޮޑެތި ފާޑުކިޔުންތައް އެފްއޭއެމްއަށް އަމާޒުވިއިރު، އެފްއޭއެމުން ބުނީ، އޭއެފްސީ ކަޕުން ރާއްޖެއަށް ޖާގަ ގެއްލުމުގައި ކްލަބްތަކުގެ އިހުމާލުވެސް އޮތް ކަމަށެވެ. ނަމަވެސް ގިނަ ބަޔަކު ބުނަނީ އެކަމުގައި އިހުމާލު އޮތީ އެފްއޭއެމްގެ ކަމަށެވެ.
ޓްރެއިނިން ކޭމްޕެއް ހަމަޖެއްސުމަށް ބަލަމުން އަންނަނީ ގަތަރާއި ކުވޭތާއި ޔޫއޭއީ އާއި ސައޫދީ އަރަބިއާ އަދި މެލޭޝިއާފަދަ ގައުމުތައް ކަމަށް ބައްސާމް ވިދާޅުވިއެވެ. އެގޮތުން މާޒިޔާ އާއި ޓީސީގެ އެދުމުގެ މަތިން ރޯދައިގެ ފަހު ފަސް ދުވަހުން ފެށިގެން ދެ ހަފުތާގެ ކޭމްޕެއް އިންތިޒާމުކުރުމުގެ މަސައްކަތް ކުރަމުން އަންނަ ކަމަށެވެ.
ކުރިޔަށް އޮތް ސީޒަނަށް ތައްޔާރުވުމުގެ ގޮތުން މާޒިޔާ އިން އދ. މަހިބަދޫގައި ޕްރީ ސީޒަން ތަމްރީންތައް ހަދަމުން އަންނައިރު، ޓީސީން އަންނަނީ މާލޭގައި ތަމްރީންތައް ހަދަމުންނެވެ.
ކުރިޔަށް އޮތް ސީޒަނަށް ތައްޔާރުވުމުގެ ގޮތުން މާޒިޔާ އާއި ޓީސީން އަންނަނީ ދުރާލާ ތައްޔާރުވަމުންނެވެ.
އެގޮތުން މާޒިޔާއިން ވަނީ އެޓީމުގެ ކުރީގެ ކޯޗު މެސެޑޯނިއާގެ މަރްޔަން ސެކުލޮސްކީ ގެނައުމުގެ އިތުރުން ކުރިޔަށް އޮތް ސީޒަނަށް ތައްޔާރުވުމުގެ ގޮތުން ވަރުގަދަ ކުޅުންތެރިންތަކެއް އެ ކްލަބަށް ގެނެސްފައެވެ. އެގޮތުން ޓީސީގެ އަބްދުﷲ ހަނީފް (ބެންޖޯ)، އިބްރާހިމް ވަހީދު ހަސަން (އިއްބެ)، އިބްރާހިމް މަހުދީ (ފޭދޫ އިއްބެ)، ނިއު ރޭޑިއަންޓުގެ އަހުމަދު އަބްދުﷲ (ލިލީ) އަދި ހަމްޒާ މުހައްމަދު (ހަމްޕު( ވެސް އެ ކްލަބުން ވަނީ ގެނެސްފައެވެ.
ކުރިޔަށް އޮތް ސީޒަނުން މާޒިޔާއިން ނުފެންނާނީ އެ ކްލަބް ދޫކޮށް ދިޔަ ދަ ގްރާންޑޭ އަށް ސޮއިކުރި ޔަސްފާދު ހަބީބު (މުލަކޭ) އާއި ޓީސީ އަށް ބަދަލުވި އިސްމާއިލް އީސާ (މެސީ) އަދި ގްރީން ސްޓްރީޓްސް އަށް ސޮއިކުރި ގާސިމް ސައްމާމު (ސައްމެ) އެވެ.
ކުރިޔަށް އޮތް ސީޒަނުގައި ޓީސީން ބެންޖޯ އާއި ދެ އިއްބެގެ އިތުރުން އަލީ އަޝްފާގް (ދަގަނޑޭ) ވެސް ނުފެންނާނެއެވެ. އަދި އެޓީމުގެ ކޯޗު މުހައްމަދު ނިޒާމް (ނިޒާމްބެ) ވެސް ވަނީ އެ ކްލަބާއެކު ހަދާފައިވާ އެއްބަސްވުން އާނުކުރަން ނިންމާ ކްލަބް ދޫކޮށްލާފައެވެ.
ޓީސީން ގައުމީ އަންހެން ޓީމުގެ ކުރީގެ ކޯޗު އަހުމަދު އާތިފް (އާތީ) އާއެކު ފަރިތަކުރުންތައް ފަށާފައިވާއިރު، އެޓީމުން ވަނީ މިދިޔަ ސީޒަނުގައިވެސް އެޓީމަށް ކުޅުނު ކީޕަރު ލިމްބޫ ކިރަން ކުމާރުގެ އިތުރުން ނޭޕާލުގެ ޒުވާން ފޯވާޑް ބިމަލް ގާތީ މަގަރު އާއި ގައުމީ ޓީމުގެ ކެޕްޓަން އަކްރަމް އަބްދުލްގަނީ އެ ކްލަބަށް ގެނެސްފައެވެ.
