ޔޫރަޕުގެ އެންމެ ފުރަތަމަ ތިމާވެއްޓާ ރައްޓެހި މިސްކިތް ކަމުގައިވާ، ކެމްބްރިޖް ސެންޓްރަލް މޮސްކް އިނގިރޭސިވިލާތުގެ ކެމްބްރިޖުގައި ހުޅުވައިފިއެވެ.
މިސްކިތުގެ މަސައްކަތް ކުރަން ފެށިތާ ދިހަ އަހަރު ދުވަސް ފަހުން ހުޅުވި މިސްކިތަކީ 23 މިލިއަން ޕައުންޑު (30 މިލިއަން ޑޮލަރު) ހަރަދު ކޮށްގެން ބިނާކޮށްފައިވާ މިސްކިތެކެވެ. މި މިސްކިތުގައި އެއްފަހަރާ އެއްހާސް މީހުންނަށް ޖަމާއަތުގައި ނަމާދު ކުރެވޭނެއެވެ.
މިސްކިތުގެ ތިމާވެއްޓާ ރައްޓެހި ސިފަތަކުގެ ތެރޭގައި، މުޅި މިސްކިތުގެ ތެރެއަށް އަލި ފަތުރާލަދޭ ގޮތަށް ގުދުރަތީ އަލި ވަންނާނެހެން ފަރުމާކުރެވިފައިވާ ސްކައި ލައިޓްތަކާއި، ވުޟޫކުރަން ބޭނުން ކުރާ ފެން އިއާދަކުރެވޭނެ ނިޒާމަކާއި، ވުޟޫކުރަން ވާރޭފެން ރައްކާކުރެވޭނެ ނިޒާމެއް ހިމެނެއެވެ. އަދި މިސްކިތުގެ ފުރާޅުގައި ގަސް އިންދާފައިވާ އިރު، މިސްކިތުގައި ލަކުޑިއަކަށް ބޭނުން ކޮށްފައިވަނީ ސަސްޓެއިނަބަލް ޓިމްބަރއެވެ.
މިސްކިތުގެ ގޯތިތެރެއަށް ވަދެގެން އަންނަ އިރު ބޮޑު ބަގީޗާއެއް ހުންނައިރު، މިސްކިތުގެ ބޭރުގައި ހުންނަ ތަނބުތައް ފަރުމާ ކޮށްފައިވަނީ ބިޔަ ގަސްތަކެއްގެ ބުޑުތަކެއްގެ ސިފައަށެވެ. މުޅި މިސްކިތުގައި އެތެރެ ފަރުމާގައި ހުންނަ ހުރިހާ ތަނބެއް ފަރުމާކޮށްފައިވަނީ، ގަސްތަކުގެ ބުޑުތައް އެކަތި އަނެކެއްޗާ ގުޅިފައިވާ ގޮތަށެވެ.
އިނގިރޭސި ކުންފުންޏެއް ކަމުގައިވާ މަރކްސް ބަރފިލްޑް އަރކިޓެކްޓްސްއިން ފަރުމާ ކޮށްފައިވާ މިސްކިތުގައި، މިސްކިތަށް ޒިޔާރަތްކުރާ އިލްމުވެރިންނާއި މިސްކިތުގެ އިމާމަށް ދިރިއުޅެވޭނެ ތަންތަން ވެސް އިމާރާތް ކޮށްފައިވެއެވެ. މިއީ ޒީރޯ ކަރބަން އެމިޝަންގެ ސެޓްފިކެޓް ލިބިފައިވާ މިސްކިތެކެވެ.
