ބައެއް ފަރާތްތަކުން ރޯދަ އިނާޔަތް ނުދޭކަން ވަނީ ފާހަގަކުރެވިފައި: ލޭބަރ އޮތޯރިޓީ
30 އެޕްރީލު 2019 | އަންގާރަ 17:38ރޯދަ މަސް ފެށުމުގެ ކުރިން 3000 ރުފިޔާ ދޭން ޖެހޭނެކަމަށް ގާނޫނުގައި ބުނޭ
ރާއްޖޭގެ ގިނަ ސިވިލް ސާވިސް އޮފީސްތައް ހުންނަ ވެލާނާގެ
ބައެއް ފަރާތްތަކުން މުއައްޒަފުންނަށް ރޯދަ އިނާޔަތް ނުދޭކަން ފާހަގަކުރެވިފައިވާ ކަމަށާއި، ގާނޫނުގައި ބުނާ އަދަދަށް ރޯދަ މަސް ފެށުމުގެ ކުރިން އިނާޔަތް ދިނުމަށް ލޭބަރ ރިލޭޝަންސް އޮތޯރިޓީން ގޮވާލައިފިއެވެ.
އެ އޮތޯރިޓީން އަންގާރަ ދުވަހު ނެރެފައިވާ ބަޔާނެއްގައި ބުނެފައިވަނީ، ވަޒީފާއާއި ބެހޭ ގާނޫނުގެ ދަށުން ހެދިފައިވާ ގަވާއިދުތަކާއި އެއްގޮތަށް ކަންކަން ހިނގަމުންދޭތޯ ބެލުމަށް އެ އޮތޯރިޓީން އިންސްޕެކްޓް ކުރި ކުރުމުގައި ބައެއް ފަރާތްތަކުން ރޯދަ އިނާޔަތް ނުދޭކަން ފާހަގަކުރެވިފައިވާއިރު، ދިން ނަމަވެސް ގާނޫނުގައި ބުނާ އަދަދަށް ނުދޭކަން ފާހަގަ ކުރެވިފައިވާ ކަމަށެވެ.
ވަޒީފާއާއި ބެހޭ ގާނޫނުގެ 51 ވަނަ މާއްދާގެ ހ ގައި ބުނެފައިވަނީ، ވަޒީފާ އަދާކުރާ ކޮންމެ ދިވެހި މުއައްޒަފަކަށް ވެސް ރޯދަ އިނާޔަތުގެ ގޮތުގައި، ރޯދަ މަސް ފެށުމުގެ ކުރިން 3000 ރުފިޔާ ދޭން ޖެހޭނެ ކަމަށެވެ.
ގަވާއިދުގައި ވާ ގޮތުގެ މަތިން 1440 ވަނަ އަހަރުގެ ރޯދަ އިނާޔަތް މަސް ފެށުމުގެ ކުރިން ވަޒީފާ އަދާކުރާ ފަރާތްތަކަށް ދިނުމަށް ލޭބަރ އޮތޯރިޓީން ވަނީ ގޮވާލާފައެވެ.
