ސައުދީ ސަރުކާރުން ރާއްޖެއަށް 50 ޓަނުގެ ކަދުރު ހަދިޔާކޮށްފި
30 އެޕްރީލު 2019 | އަންގާރަ 07:11ސައުދީން އަންނަނީ ކޮންމެ އަހަރަކު ވެސް ކަދުރު ހަދިޔާކުރަމުން
ކަދުރު ހަވާލުކޮށްދެއްވަނީ
ރަމަޟާންމަހަށް ޚާއްސަކޮށްގެން ސައުދީ ސަރުކާރުން ރާއްޖެއަށް 50 ޓަނުގެ ކަދުރު ހަދިޔާކޮށްފި އެވެ.
އަންގާރަ ދުވަހު މާލޭގައި ހުންނަ ސައުދީ އެމްބަސީގައި ބޭއްވި ހަފްލާއެއްގައި ދިވެހި ސަރުކާރާ ކަދުރު ހަވާލުކޮށްދެއްވީ އެމްބަސީގެ ޗާޖް ޑި އެފެއާޒް މިތުރިކް އަލް ދުސާރީ އެވެ. އަދި ކަދުރާ ހަވާލުވެވަޑައިގަތީ އިސްލާމިކް މިނިސްޓަރު ޑރ. އަހުމަދު ޒާހިރެވެ.
ސައުދީ ރަސްގެފާނު ސަލްމާން ބިން އަބްދުލް އަޒީޒް އަލް ސައުދު ދެއްވާ ހާއްސަ ހަދިޔާއެއްގެ ގޮތުގައި ރާއްޖެ އަށް ލިބުނު ކަދުރާ ހަވާލުވެވަޑައިގެންނެވުމަށް ފަހު މިނިސްޓަރު ޒާހިރު ވިދާޅުވީ ކުރީ އަހަރުތަކެކޭ ވެސް އެގޮތަށް ރޯދަ މަސް ފެށުމުގެ ކުރިން އާންމު ރައްޔިތުންނާ ހަމަ ބަހަމުން ގެންދާނެ ކަމަށެވެ. ނަމަވެސް 50 ޓަނުގެ ކަދުރުން ހުރިހާ ރައްޔިތުންނަށް ބެހޭވަރު ނުވާނެ ކަން މިނިސްޓަރު ފާހަގަކުރެއްވިއެވެ.
މިނިސްޓަރު ޒާހިރު ވިދާޅުވީ އެހެން ފަރާތަކުން ވެސް ހަދިޔާގެ ގޮތުގައި ކަދުރު ލިބޭނެ ކަމަށް އުންމީދުކުރައްވާ ކަމަށާއި ލިބިއްޖެ ނަމަ އާންމުންނަށް ފޯރުކޮށްދޭނެ ކަމަށެވެ.
"މިހާރު ގޭބިސީތަކުގެ އަދަދު ވެސް ބަލާފަ ހުރީ. އަޅުގަނޑުމެން މި މަސައްކަތް ކުރަނީ އިއުލާންކޮށްގެން ތަންތަނަށް ފޯރުކޮށްދެވޭތޯ. ދެން މިހުރި އަދަދުން އަޅުގަނޑުމެންނަށް ފޯރުކޮށްދެވޭނީ ފުރަތަމަ ވަޑައިގަންނަވާ ބޭފުޅުންނަށް ފުރަތަމަ. އަޅުގަނޑުމެން އިއުލާން ކޮށްލާނަން،'' މިނިސްޓަރު ޒާހިރު ވިދާޅުވިއެވެ.
މިނިސްޓަރު ޒާހިރު ވިދާޅުވީ ކަދުރު ބެހުމުގައި ވަކިން މާލެއަށް ޚާއްސަ ނުކުރާ ކަމަށާއި، އިއުލާން ކުރުމާ އެކު އަވަހަށް އަންނަ ފަރާތްތަކަށް ކަދުރުދޫކުރާނެ ކަމަށެވެ.
ނިމިދިޔަ ސަރުކާރުގައި ސައުދީން ދިން ކަދުރުތައް ކުރީގެ ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހީމް ދީދީގެ ފައުންޑޭޝަން މެދުވެރިކޮށް ވަކި ބަޔަކަށް ބަހަމުން ގެންދިޔަ މައްސަލަ އޮތީ ފެންމަތިވެފައެވެ. ސައުދީން ދިން ގިނަ އަދަދެއްގެ ކަދުރު އެ ފައުންޑޭޝަނަށް ވަނީ ނަގާފައެވެ.
