''އެވެންޖަރޒް: އެންޑްގޭމް'' އަށް ފުރަތަމަ ހަފްތާ ބަންދުގައި 1.2 ބިލިއަން ޑޮލަރު!
ފުރަތަމަ ހަފްތާ ބަންދުގައި އެންމެ ބޮޑު އާމްދަނީ ހޯދި ރިކޯޑް މީގެ ކުރިން ވެސް އޮތީ ''އެވެންޖަރޒް'' ޕްރެންޗައިސްގެ ފިލްމެއްގެ އަތުގައި
\'\'އެވެންޖަރޒް: އެންޑްގޭމް\'\'ގެ ޕޯސްޓަރ
މާވެލް އާއި ޑިޒްނީގެ "އެވެންޖަރޒް: އެންޑްގޭމް" އިން ދަނީ ދުނިޔޭގެ ބޮކްސް އޮފީސް ރިކޯޑްތައް މުގުރަމުންނެވެ.
ނިމިގެން ދިޔަ ހަފްތާ ބަންދުގައި ރިލީޒްކުރި މި ފިލްމަށް ފުރަތަމަ ހަފްތާ ބަންދުގައި 1.2 ބިލިއަން ޑޮލަރުގެ އާމްދަނީއެއް ވަނީ ލިބިފައެވެ. އަދި ހުކުރު ދުވަހު އެކަނި "އެވެންޖަރސް: އެންޑްގޭމް" އަށް 156 މިލިއަން ޑޮލަރުގެ އާމްދަނީއެއް ލިބިފައިވާއިރު، މީގެ ކުރިން މި ރިކޯޑް އޮތީ 129 މިލިއަން ޑޮލަރާ އެކު 'ސްޓާ ވޯޒް: ދަ ފޯސް އަވޭކަންސް' އަތުގައެވެ.
ފުރަތަމަ ހަފްތާ ބަންދުގައި އެންމެ ބޮޑު އާމްދަނީ ހޯދި ރިކޯޑް މީގެ ކުރިން ވެސް އޮތީ 'އެވެންޖަރޒް' ފްރެންޗައިސްގެ ފިލްމެއް އަތުގައެވެ. އެއީ 2018 ވަނަ އަހަރު ރިލީޒް ކުރި 'އެވެންޖަރޒް: އިންފިނިޓީ ވޯ' އެވެ. އެ ފިލްމަށް ފުރަތަމަ ހަފްތާ ބަންދުގައި 640 މިލިއަން ޑޮލަރު ލިބިފައި ވެއެވެ. އަދި ރިލީޒް ކުރިތާ 11 ދުވަހުގެ ތެރޭގައި އެ ފިލްމަށް އެއް ބިލިއަން ޑޮލަރުގެ އާމްދަނީއެއް ވަނީ ލިބިފައެވެ.
"އެވެންޖަރޒް: އިންފިނިޓީ ވޯ" ވެގެން ދިޔައީ 2018 ވަނަ އަހަރުގެ އެންމެ ކާމިޔާބު ފިލްމަށެވެ. އެ ފިލްމަށް 2.048 ބިލިއަން ޑޮލަރުގެ އާމްދަނީއެއް ލިބިފައި ވެއެވެ. ނަމަވެސް، މިހާތަނަށް ރިލީޒް ކުރި ހުރިހާ ފިލްމަކަށް ބަލާއިރު، މި ފިލްމް އޮތީ ހަތަރު ވަނައިގައެވެ. އެއްވަނައިގައި އޮތީ 2009 ވަނަ އަހަރު ރިލީޒް ކުރި "އެވެޓަރ" އެވެ. އެ ފިލްމަށް 2.79 ބިލިއަން ޑޮލަރު ލިބިފައި ވެއެވެ. އަދި 2.12 ބިލިއަން ޑޮލަރާ އެކު ދެވަނައިގައި ވަނީ 1997 ވަނަ އަހަރު ރިލީޒްކުރި "ޓައިޓޭނިކް" އެވެ. އަދި ތިން ވަނައިގައި ވަނީ 2.07 ބިލިއަނާ އެކު "ސްޓާ ވޯޒް: ދަ ފޯސް އަވޭކަންސް" އެވެ.
"އެވެންޖަރޒް: އެންޑްގޭމް" އަށް ފުރަތަމަ ހަފްތާ ބަންދުގައި އެއް ބިލިއަނަށް ވުރެ ބޮޑު އާމްދަނީއެއް ލިބިފައިވާއިރު، އެމެރިކާ އިން އެކަނި ވެސް ވަނީ 350 މިލިއަން ޑޮލަރު ލިބިފައެވެ. މި ރިކޯޑް ވެސް ކުރިން އޮތީ 'އެވެންޖަރޒް: އިންފިނިޓީ ވޯ' އަތުގައެވެ. އެ ފިލްމަށް ލިބިފައި ވަނީ 250 މިލިއަން ޑޮލަރެވެ.
މީގެ އިތުރުން، ޑިޒްނީން ބުނި ގޮތުގައި "އެވެންޖަރޒް: އެންޑްގޭމް" އިން ވަނީ ފްރާންސް، ބްރެޒިލް، ޗައިނާ އަދި އިތުރު 30 މާކެޓެއްގެ ވެސް ރިކޯޑް މުގުރާލާފައެވެ.
ފިލްމް ރިލީޒް ކުރުމުގެ ކުރިން މި ފިލްމުން ވަނީ ޕްރީ-ސޭލް ރިކޯޑްތައް ވެސް މުގުރާލާފައެވެ. އަދި 2018 ވަނަ އަހަރުގެ ޑިސެމްބަރު މަހު ރިލީޒް ކުރި އެ ފިލްމްގެ ޓްރެއިލަރ އަކީ ވަނީ 24 ގަޑި އިރު ތެރޭ އެންމެ ގިނަ ވިއުޒް ލިބުނު ފިލްމު ޓްރެއިލަރ އެވެ. ޓްރެއިލަރއަށް 24 ގަޑި އިރު ތެރޭ 289 މިލިއަން ވިއުޒް ވަނީ ލިބިފައެވެ.
"އެވެންޖަރޒް: އެންޑްގޭމް" އަކީ "އަޔަންމޭން" އާއެކު 2008 ވަނަ އަހަރު ފެށި މި ފްރެންޗައިސްގެ 22 ވަނަ ފިލްމެވެ. ރާއްޖޭގައި ވެސް ދަނީ މި ފިލްމަށް ބޮޑު ތަރުހީބެއް ލިބެމުންނެވެ.
