ރައްޔިތުންގެ މަޖިލީހުގެ ރައީސް ގާސިމް އިބްރާހިމް ދެއްވި މާހެފުމުގައި ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ބައިވެރިވެވަޑައިގެންފިއެވެ.

މި މާހެފުމުގައި ރައްޔިތުންގެ މަޖިލީހުގެ މެމްބަރުކަން ކުރައްވާފައިވާ ފަރާތްތަކާއި، ކުރީގެ ވަޒީރުން ބައިވެރިވެވަޑައިގެންނެވިއެވެ.

މަޖިލީހުގެ ރައީސް ވިދާޅުވީ މާހެފުމަށް ރައީސް އިބްރާހިމް މުހައްމަދު ސޯލިހާއި އެ މަނިކުފާނުގެ ކެބިނެޓް ވަޒީރުންނައް ދައުވަތު އެރުވީ އެއީ މަޖިލިހުގައި ގިނަ ޚިދުމަތްތަކެއް ކުރައްވާފައިވާ ބޭފުޅުން ކަމަށް ވާތީއެވެ.

މާހެފުމުގައި ޑިފެންސް މިނިސްޓަރ މާރިޔާ އަހްމަދު ދީދީ އާއި، މިނިސްޓަރ އޮފް ޔޫތް އެންޑް ސްޕޯޓްސް އެމްޕަވަރމެންޓް އަހްމަދު މަހްލޫފް އަދި ފޮރިން މިނިސްޓަރ އަބްދުﷲ ޝާހިދު ބައިވެރިވެވަޑައިގެންނެވިއެވެ.މާހެފުމަށްފަހު ރައީސް ސޯލިހު ވަނީ މެމްބަރުންނާ އެކު ފޮޓޯ ނަންގަވައި، މެމްބަރުންނާ ބައްދަލުކުރައްވާފައެވެ.

ހޯމަދުވަހު މަޖިލީހުގައި މާހެފުން ބާއްވާފައިވާއިރު، މި ޖަލްސާއަކީ ރައްޔިތުންގެ މަޖިލީހުގެ މި ދައުރުގެ އެންމެ ފަހު ޖަލްސާއެވެ. މި ދައުރުގެ ގިނަ ޖަލްސާތައް ކަނޑައެޅިފައިވާ ގަޑިއަށް ވުރެ ލަހުން ފަށާފައިވާއިރު، ދައުރުގެ ފަހު ޖަލްސާ ވެސް ކޯރަމް ހަމަނުވެގެން ފެށިފައިވާ ޖަލްސާ ފެށުމަށް ކަނޑައެޅިފައިވާ ގަޑިއަށް ވުރެ ލަހުންނެވެ. އެ ގޮތުން 9:00 ގައި ޖަލްސާ ފެށުމަށް މަސައްކަތްކޮށް ކޯރަމް ހަމަނުވެގެން ޖަލްސާ ވަނީ 9:30 އަށް ފަސްކޮށްފައެވެ. ނަމަވެސް ޖަލްސާ ފެށީ 10:00 ގައެވެ.