ވިލާ ކޮލެޖާއި މޯލްޑިވްސް އޯޕަން ސޯސް ސޮސައިޓީއާއި ދެމެދު އެމްއޯޔޫ އެއްގައި ސޮއިކޮށްފި

ވިލާ ކޮލެޖާއި މޯލްޑިވްސް އޯޕަން ސޯސް ސޮސައިޓީއާއި ދެމެދު އެމްއޯޔޫ އެއްގައި ސޮއި ކޮށްފިއެވެ.

މި އެއްބަސްވުމުގައި ވިލާ ކޮލެޖުގެ ފަރާތުން ސޮއި ކުރެއްވީ ވިލާ ކޮލެޖުގެ ރެކްޓަރ ޑރ. އަޙްމަދު އަންވަރެވެ. މޯލްޑިވްސް އޯޕަން ސޯސް ސޮސައިޓީގެ ފަރާތުން ސޮއި ކުރެއްވީ އެ ޖަމިއްޔާގެ ރައީސް، ޔޫސުފް ޢަބްދުﷲ ޝުނާނެވެ.

މި އެމްއޯޔޫ އަކީ ވިލާ ކޮލެޖާއި މޯލްޑިވްސް އޯޕަން ސޯސް ސޮސައިޓީ (މޮސް) އާއި ދެމެދު އެކި ޕްރޮޖެކްޓުތަކާއި ބެހޭ މަޢުލުމާތާއި އިންޑަސްޓްރިއާއި ބެހޭ މަޢުލޫމާތު ދަރިވަރުންނާއި ހިއްސާކުރުމުގައި ދެފަރާތުން އެއްބާރުލުން ދިނުމަށްޓަކައި ވެވޭ އެއްބަސްވުމެއް ކަމަށް ވިލާ ކޮލެޖުން ބުންޏެވެ.

މި އެމްއޯޔޫގެ ދަށުން ޚާއްސަ ގޮތެއްގައި ދެފަރާތުގެ އެއްބާރުލުމާއި އެއްކޮށް އިންފޯމޭޝަން ޓެކްނޮލޮޖީ ކިޔަވަމުންދާ ދަރިވަރުންނަށް މި ދާއިރާއަށް ކޮންމެހެން މުހިންމު ޢިލްމީ އަދި ފަންނީ ހުނަރުތައް ދަސްކޮށްދިނުމަށްޓަކައި ހިންގޭނެ ހަރަކާތްތައް ރޭވިގެންދާނެ ކަމަށް ވިލާ ކޮލެޖުން ބުންޏެވެ.

މީގެ ތެރޭގައި ދަރިވަރުންގެ އެސައިންމަންޓްތަކާއި ޕްރޮޖެކްޓްތައް އިޚްތިޔާރު ކުރުމުގައި އެހީތެރިވުމާއި، މި ދާއިރާގެ ފަންނީ ރިކުއަރ މަންޓްތަކަށް ދަރިވަރުން އަހުލުވެރި ކުރުމުގެ އިތުރުން ދާއިރާއަށް މުޅިން އަލަށް ތަޢާރަފްވާ ޓެކްނޮލޮޖީގެ ވަޞީލަތްތައް ބޭނުން ކުރުމާއި އެއަށް އަހުލުވެރިވުމުގެ ފުރުޞަތު ދަރިވަރުންނަށް ހުޅުވާލުން ހިމެނޭ ކަމަށް ވެސް އެކޮލެޖުން ބުންޏެވެ.

މީގެ އިތުރުން އިންފޯމޭޝަން ޓެކްނޮލޮޖީ އާއި ކޮމްޕިއުޓަރ ސައިންސްގެ ދާއިރާއިން އިތުރަށް ދިރާސާ ކުރުމުގައި ވެސް ވިލާ ކޮލެޖާއި މޮސްގެ ފަރާތުން ގުޅިގެން މަސައްކަތް ކުރުމަށް ވަނީ އެއްބަސްވެފައެވެ.