އަމީނިއްޔާ ސްކޫލަށް 75 އަހަރު ފުރުމުގެ ގޮތުން ބާއްވާ ޚާއްސަ ފުޓްބޯޅަ މެޗެއް މިރޭ ގަލޮޅު ރަސްމީ ބޯޅަ ދަނޑުގައި އޮންނާނެ ކަމަށް އެސްކޫލުގެ އިސްދަރިވަރެއް ކަމުގައިވާ ޑރ. އާމަލު އަލީ ވިދާޅުވެއްޖެ އެވެ.
ރާއްޖެއެމްވީއަށް މައުލާމާތު ދެއްވަމުން ޑރ. އާމާލު ވިދާޅުވީ އަމީނިއްޔާ ސްކޫލުގެ ހަޔާތުން 75 އަހަރު ފުރިގެން ދިއުމަކީ ކުޑަކުޑަކަމެއް ނޫން ކަމަށާއި އެހެންކަމުން މި މުނާސަބަތު ފާހަގަ ކުރުމުގެ ގޮތުން ގިނަ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާ ކަމަށެވެ. އޭގެ ތެރެއިން އެއް ހަރަކާތަކީ މިރޭ އޮންނަ ފުޓްބޯޅަ މެޗު ކަމަށް އޭނާ ވިދާޅުވިއެވެ.
ގިނަ ދުވަސްތަކެއް ވަންދެން އެސްކޫލުގެ ޕްރިންސިޕަލް ކަން ވެސް ކުރަށްވާފައިވާ ޑރ. އާމާލު ވިދާޅުވީ މިރޭ ދެ މެޗް ކުޅުމަށް ހަމަޖެހިފައިވާއިރު ފުރަތަމަ މެޗުގައި އެސްކޫލުގެ އިސްދަރިވަރުންގެ ދެޓީމް ވާދަ ކުރާއިރު ދެވަނަ އަށް ބައްދަލު ކުރާނީ އެ ސްކޫލުގެ ފިރިހެން ޓީޗަރުންނާއި މިހާރުގެ ފިރިހެންދަރިވަރުންގެ ޓީމް ކަމަށެވެ.
މިރޭ ކުޅޭ އިސްދަރިވަރުންގެ މެޗްގައި ރާއްޖޭގެ މިހާރުގެ ޕްރޮފެޝަނަލް އަންހެން ފުޓްބޯޅަ ކުޅުންތެރިންގެ އިތުރުން އެފްއޭއެމްގެ ވައިސް ޕްރެޒިޑެންޓް އައިމިނަތު ނާޒިމާޔާއި އެމްޑީޕީ ޕާލަމެންޓްރީ ގްރޫޕުގެ ޑެޕިއުޓީ ލީޑަރު ރޮޒައިނާ އާދަމް ހިމެނި ވަޑައިގަންނަވައެވެ.
ޑައިމަންޑްޖުބުލީ ފާހަގަ ކުރުމަށް ހިންގުމަށް ހަމަޖެހިފައިވާ ހަރަކާތްތަކުގެ ތެރޭގައި ފުޑް ފެއާ އަކާއި އާޓް އެންޑް ކުރާފްޓް މުބަރާތުގެ އިތުރުން ބައިސްކަލް ދުއްވުމުގެ މުބާރާތެއްވެސް ކުރިއަށް ގެންދިއުމަށް ހަމަޖެހިފައި ވެއެވެ. އަދި "ގޯ ގްރީން" ގެ ނަމުގައި އަމީނިއްޔާ ސްކޫލު ފެހި ކުރުމުގެ ގޮތުން ގަސްއިންދުމުގެ ޕްރޮގްރާމެއް ވެސް ކުރިއަށް ގެންދިއުމަށް ހަމަޖެހިފައިވެއެވެ.
މީގެ އިތުރުން ވެސް ރާއްޖޭގައި ފާހަގަ ކޮށްލެވޭ ގިނަ ފަރާތްތަކަކީ އެސްކޫލުން ތައުލީމް ހާސިލުކޮށްފައިވާ ފަރާތްތަކެއް ކަމަށްވާއިރު އޭގެ ތޭރޭގައި ދެވަނަ ޖުމުހޫރިއްޔާގެ ފުރަތަމަ ރައީސްގެ އަނބިކނބަލުން އިބްރާހިމް ނާސިރު ( އޭރުގެ ރަންނަބަނޑޭރި ކިލެގެފާނު) ގެ އަނބިކަނބަލުން ނަސީމާ މުހައްމަދު ކަލޭފާނާއި ދެވަނަ ޖުމްހޫރިއްޔާގެ ދެވަނަ ރައީސް މައުމޫނު އަބްދުލް ގައްޔޫމުގެ އަނބިކަނބަލުން ނަސްރީނާ އިބްރާހިމާއި ދެވަނަ ޖުމްހޫރިއްޔާގެ ތިންވަނަ ރައީސް މުހައްމަދު ނަޝީދުގެ އަނބިކަނބަލުން ލައިލާ އަލީއާއި ދެވަނަ ޖުމްހޫރިއްޔާގެ ހަތަރުވަނަ ރައީސް ޑރ. މުހައްމަދު ވަހީދު ހަސަންމަނިކުގެ އަނބިކަނބަލުން އިލްހާމް ހުސައިނާއި ދެވަނަ ޖުމްހޫރިއްޔާގެ ފަސްވަނަ ރައީސް އަބުދުﷲ ޔާމީން އަބުދުލްގައްޔޫމްގެ އަނބިކަނބަލުން ފާތިމަތު އިބްރާހިމާއި މިހާރުގެ ރައީސް އިބްރާހިމް މުހަމަދު ސޯލިހުގެ އަނބިކަނަބަލުން ފަޒުނާ އަހުމަދަކީ ވެސް އަމީނިއްޔާ ސްކޫލުން ތައުލީމު ހާސިލް ކުރައްވާފައިވާ ބޭކަނބަލުންނެވެ. އަދި މި ފަހުރު ޝެއާ ކުރެވޭނެ އެހެން އެއްވެސް ސްކޫލެއް ނުހުންނާނެ ކަމަށް އާމަލު ވިދާޅުވިއެވެ.
ޑައިމެންޑް ޖުބުލީ ނިންމާ ހަރަކާތެއްގެ ގޮތުގައި "ފަޔަރ ވޯކް" އާ އެކު ބޮޑު ޖަލްސާއެއް ބޭއްވުމަށް ހަމަޖެހިފައިވާ ކަމަށް އެސްކޫލުން މައުލޫމާތު ލިބެއެވެ.
އަމީނިއްޔާ ސްކޫލުގެ ބާނީއަކީ ސުމުއްވުލް އަމީން މުހައްމަދުއަމީން ދޮށިމޭނޭކިލެގެފާނެވެ. އަމީނިއްޔާ ސްކޫލުގެ އަހަރީ ދުވަހަކީ ކޮންމެ އަހަރެއްގެ ވެސް ނޮވެމްބަރު މަހުގެ 28 ވަނަ ދުވަހެވެ.
