ޔާމީނަށް ތިން ދުވަސް ތެރޭ ޕާޓީ އެއް ވުޖޫދަށް ގެނެވުނު، މައުމޫނަށް ތިން މަސް ވީއިރުވެސް ނުވި: އަދުރޭ
27 އެޕްރީލު 2019 | ހޮނިހިރު 06:42ރައީސް ޔާމީން ނޫން ލީޑާޝިޕެއްގެ ފަހަތަގައި ނުހުންނަވާނެ ކަމަށް ވިދާޅުވި
ޕީއެންސީގެ ރައީސް އަބްދުއްރަހީމް އަބްދުﷲ
ކުރީގެ ރައީސް އަބްދުﷲ ޔާމީނަށް ތިން ދުވަސް ތެރޭ ޕީއެންސީ ވުޖޫދަށް ގެނެވުނުއިރު، ރައީސް މައުމޫނަށް ތިން މަސް ދުވަސްވީ އިރުވެސް އެމްއާރްއެމް ނުއުފެއްދުނު ކަމަށް ޕީއެންސީގެ ރައީސް ކަމަށް ހުކުރު ދުވަހު ހޮވިވަޑައިގަތް ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
ރާއްޖެ.އެމްވީއަށް ދިން ހާއްސަ އިންޓަވިއުއެއްގައި އަދުރޭ ވިދާޅުވީ، ޕީއެންސީގެ ހަގީގީ ރައީސް އަކީ ޔާމީން ކަމަށާއި، އެ ޕާޓީ އަކީ އެމަނިކުފާނު ބޭނުންފުޅުވެގެން އުފެއްދި ޕާޓީއެއް ކަމަށެވެ.
އަދި ތިން ދުވަސް ތެރޭގައި އެ ޕާޓީ ވުޖޫދަށް އައުމުން އަންގައި ދެނީ ޔާމީނަށް އޮތް ތާއީދު ކަމަށް އޭނާ ވިދާޅުވިއެވެ.
''ރައީސް ޔާމީނަށް އޮތް ތާއީދަކުން ނޫންތޯ ދެތިން ދުވަސް ތެރޭ ސިޔާސީ ޕާޓީއެއް ވުޖޫދު ކުރެވުނީ. އަޅުގަނޑުމެނަށް އެބަ ފެނޭ އަޅުގަނޑުމެންގެ ކުރީގެ ރައީސް މައުމޫނު އަބްދުލްގައްޔޫމު ޕާޓީއެއް އުފައްދަވަން ވެގެން އުޅުއްވާތާ ތިން ހަތަރު މަސް ވެގެން ހިނގައްޖެ. އަދިވެސް ޕާޓީ ވުޖޫދަކަށް ނާދޭ.'' އޭނާ ވިދާޅުވިއެވެ.
ރައީސް މައުމޫނު އިސްވެ ހުންނަވާ އެމްއާރްއެމްގެ ނަމުގައި ޕާޓީއެއް އުފައްދަން އިލެކްޝަން ކޮމިޝަނުން ހުއްދަދީފައި ވަނީ ފެބްރުއަރީ މަހުގެ 19 ވަނަ ދުވަހުއެވެ. އެޕާޓީ އަށް 3000 މެމްބަރުން ހަމަކުރުމުގެ މަސައްކަތް ދަނީ ކުރަމުންނެވެ.
އަދުރޭ ވިދާޅުވީ، ދެން އެންމެ އަވަހަށް ސިޔާސީ ހަރަކާތެއްގެ ގޮތުގައި އެ ޕާޓީން ކުރަން ހަމަޖެހިފައިވާ ކަމަކީ، ރަށްރަށުގައި ތިބި އެ ޕާޓީގެ މެމްބަރުންނާއި ޕާޓީއާ ދެމެދު ގާތް ގުޅުން ބޭއްވުން ކަމަށެވެ. އޭގެ ތެރޭގައި، ޕާޓީއަށް މެމްބަރުން އިތުރު ކުރުމުގެ މަސައްކަތް ވެސް ހިމެނޭ ކަމަށް ވިދާޅުވިއެވެ.
އިދިކޮޅު ޕާޓީއެއްގެ ގޮތުގައި އޮވެ ސަރުކާރު ޒިންމާދާރު ކުރުވުމުގެ މަސައްކަތް ވަރަށް ފޯރިއާއި އެކު ކުރިޔަށް ގެންދާނެ ކަމަށާއި، ސަރުކާރުން ކުރާ ކަންތައްތައް ވަރަށް ގާތުން ބަލައި މި ސަރުކާރުން ކުރާ ނުރަނގަޅު ކަންތައްތައް ރައީސް ސޯލިހުގެ ސަމާލު ކަމަށް ގެންނަވާނެ ކަމަށް އަބްދުއްރަހީމް ވިދާޅުވިއެވެ.
އެގޮތުން ދަރުވަމަންތަ ހޮސްޕިޓަލް އިންޑިއާގެ ކުންފުންޏަކަށް ދޭން އުޅޭ ކަމުގެ އަޑުތައް ފެތުރެމުންދާ ކަމަށާއި، އެ ވާހަކަތަކަކީ ހަގީގީ ވާހަކަތަކެއްތޯ ބަލަމުންދާ ކަމަށް ވިދާޅުވިއެވެ. ރައީސް ޔާމީންއާ އެއްވެސް ކަހަލަ ދެބަސްވުންތަކެއް އުފެދިދާނެތޯ ސުވާލު ކުރުމުން ފޮނަދޫ ދާއިރާގެ މެމްބަރުކަން ވެސް ކުރައްވަމުންދާ އަބްދުއްރަހީމް ވިދާޅުވީ، ޔާމީނާ ދެބަސްވާނެ ހާލަތެއް މެދުވެރި ނުވާނެ ކަމަށާއި، ޔާމިން ސިޔާސީ މައިދާނުގައި ހުރިހާ ދުވަހަކު އޭނާ ވެސް ހުންނާނެ ކަމަށެވެ.
''ރައީސް ޔާމީނާ ވަކިން ސިޔާސީ މަސައްކަތެއް ކުރާކަށް އަޅުގަނޑެއް ނުދާނަން. ރައީސް ޔާމީން ނޫން ލީޑާޝިޕެއްގެ ފަހަތަށް އަޅުގަނޑެއް ނުދާނަން. ލީޑަރެއްގެ ފަހަތައް ވެސް ނުދާނެ. އެމަނިކުފާނާއި ވަކިން މަސައްކަތް ކުރަން ޖެހިއްޖެއްޔާ އަޅުގަނޑު ސިޔާސީ މައިދާނުން ދުރަށް ދާނަން. ހަގީގަތަކީ ޕީއެންސީގެ ވެސް އަސްލު ރައީސް ޔާމީން'' ވިދާޅުވިއެވެ.
ހުކުރު ދުވަހު ބޭއްވި ޕީއެންސީ ކޮންގްރެސްގައި އެ ޕާޓީގެ ރައީސް ކަމަށް އަބްދުއްރަހީމް ހޮވިވަޑައިގެންނެވީ އޮޓޮމެޓިކުންނެވެ.
