ލަންކާއިން ހަ ދިވެއްސަކު ހައްޔަރު ކުރިކަން ސަރުކާރުން ކަށަވަރުކޮށްދީފި
ދިވެހިން ހައްޔަރުކުރިން ކަަށަވަރުކޮށްދީފައިވަނީ ފޮރިން މިނިސްޓްރީން
ލަންކާ ބޮން ގޮއްވާލާފައިވަނީ އާދިއްތަ ދުވަހު
ސްރީ ލަންކާގެ ފުލުހުން ހަ ދިވެއްސަކު ހައްޔަރުކޮށްފިއެވެ.
ދިވެހިރާއްޖޭގެ ފޮރިން މިނިސްޓްރީން ޑިރެކްޓަރ ކޮމިއުނިކޭޝަން މިއުވާން މުހައްމަދު "ރާއްޖެއެމްވީ"އަށް ވިދާޅުވީ ލަންކާ ފުލުހުން ހަ ދިވެއްސަކު ހައްޔަރުކޮށްފައިވާކަން ލަންކާގެ ސަރުކާރުން ދިވެހި ސަރުކާރަށް އަންގާފައިވާ ކަމަށެވެ.
އެ މީހުންގެ މައުލޫމާތާއި އެ މީހުންގެ މައްޗަށް ކުރާ ތުހްމަތުތަކާ ގުޅޭ ގޮތުން ފޮރިން މިނިސްޓްރީން އަދި ބަހެއް ނުބުނެ އެވެ. މިއުވާން ވިދާޅުވި ގޮތުގައި ހައްޔަރުކޮށްފައިވާ ދިވެހިންގެ ކަންކަން ލަންކާގައި ހުންނަ ދިވެހި އެމްބަސީން ގެންދަނީ ބަލަމުންނެވެ.
ރާއްޖެއެމްވީއަށް އެނގިފައިވާ ގޮތުގައި، ސްރީ ލަންކާގެ ފުލުހުން ހައްޔަރުކޮށްފައިވާ ހަ މީހުންގެ ތެރެއިން ހަތަރު މީހުން ހައްޔަރުކުރީ ބުރާސްފަތި ދުވަހުއެވެ. އަނެއް ދެ މީހުން ހައްޔަރުކުރީ ހުކުރު ދުވަހުއެވެ.
މިދިޔަ އާދީއްތަ ދުވަހު ސްރީ ލަންކާގައި ދިން ބޮމުގެ ހަމަލާއަށްފަހު އެ ގައުމުގެ ފުލުހުން ހާއްސަ އޮޕަރޭޝަނެއް ފަށާފައިވާއިރު، އެ އޮޕަރޭޝަނަށް ލަންކާގައި ދިރިއުޅޭ ދިވެހިން ވެސް އެއްބާރުލުން ދިނުމަށް މިއުވާން އިލްތިމާސްކުރެއްވެވިއެވެ.
