ހޯރަފުށީ އެއާޕޯރޓް ފެހި ކުރުމުގެ ޕްރޮގްރާމެއް ފަށައިފި
10،000 ގަސް މުޑުވައް ކުރަން ވަނީ ފަށާފައި
ހޯރަފުށީ އެއާޕޯރޓް ފެހި ކުރުމުގެ ޕްރޮގްރާމް މިނިސްޓަރ މަހުލޫފު ފައްޓަވައިދެއްވަނީ
ހއ ހޯރަފުށީގައި އަޅާ އެއާޕޯރޓު ފެހި ކުރުމުގެ ގޮތުން ޚާއްސަ ޕްރޮގްރާމެއް ފަށައިފިއެވެ.
ހުކުރު ދުވަހު ހެނދުނު 10:00 ގައި ފެށި މި ޕްރޮގްރާމް އިފްތިތާހުކޮށްދެއްވީ ޔޫތް މިނިސްޓަރ އަހުމަދު މަހުލޫފެވެ.
މި ޕްރޮގްރާމްއާ ގުޅޭގޮތުން ހޯރަފުށީ ދާއިރާގެ އިންތިހާބީ މެމްބަރު އަހުމަދު ސަލީމް ވިދާޅުވީ، މި ޕްރޮގްރާމްގެ ދަށުން ހޯރަފުށީ އެއާޕޯރޓް އަޅާ ސަރަހައްދުގެ ބިން ހިއްކައި ނިމެންވާއިރަށް އެ ސަރަހައްދުގެ ހޭޅި ހެދުމަށާއި، ބިން ފެހި ކުރުމަށް ބޭނުންވާ ގަސް ހޯދުމަށް 10،000 ގަސް މުޑުވައް ކުރަން ފަށާފައިވާ ކަމަށެވެ. އަދި މި މަސައްކަތް ކުރުމަށް ނިންމާފައިވަނީ ހޯރަފުށީ ކައުންސިލާއި، އާންމު ރައްޔިތުންނާއިި، މުއައްސަސާތައް ގުޅިގެން ކަމަށް އޭނާ ވިދާޅުވި އެވެ.
ހޯރަފުށީ އެއާޕޯރޓް ފެހި ކުރުމުގެ ޕްރޮގްރާމްގެ ތެރެއިން -- ފޮޓޯ: ރާއްޖެ.އެމްވީ
ހޯރަފުށީ އެއާޕޯރޓް އެޅުމުގެ އަމަލީ މަސައްކަތް ކުރުމަށް މީގެ މަހެއް ކުރިން އެއްބަސްވުމެއްގައި ސޮއިކޮށްފައިވާއިރު، އެއާޕޯރޓް އެޅުމަށް ބޭނުންވާ ބިން ހިއްކުމުގެ މަސައްކަތް އޭޕްރީލް މަހުގެ ތެރޭގައި ވަނީ ފަށާފައެވެ.
ހޯރަފުށީ އެއާޕޯރޓް ފެހި ކުރުމުގެ ޕްރޮގްރާމްގެ ތެރެއިން -- ފޮޓޯ: ރާއްޖެ.އެމްވީ
ނިމިދިޔަ ސަރުކާރުން މާފިނޮޅުގައި އަޅަން ނިންމި އެއާޕޯރޓް ހޯރަފުށީގައި އެޅުމަށް ނިންމައި، އެއާޕޯޓް މަޝްއުރޫއުގެ އަމަލީ މަސައްކަތް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް ފައްޓަވައިދެއްވައިފައި ވަނީ މިދިޔަ މާރޗް މަހުގެ 31 ވަނަ ދުވަހު އެވެ.
އާބާދީގައި 3،000 ވުރެ ގިނަ މީހުން ރަޖިސްޓްރީވެފައިވާ ހޯރަފުށީގައި އެއާޕޯޓް އެޅުމުން، އެ ރަށާ ކައިރީގައި އޮތް އިހަވަންދޫއަށް ވެސް ފަސޭހަތަކެއް ލިބިގެންދާނެއެވެ. އެގޮތުން ލޯންޗުގައި ތިން މިނެޓުން ފަސޭހަކަމާ އެކު އިހަވަންދޫއިން ހޯރަފުށީ އެއާޕޯޓަށް އާދެވޭނެއެވެ.
