ދިރާގުގެ ސާފު ފައިދާ 905 މިލިއަން ރުފިޔާ، ހިއްސާއަކަށް ބަހަނީ 11.91 ރުފިޔާ

ނިމިގެން ދިޔަ އަހަރު ދިރާގަށް ސާފު ފައިދާގެ ގޮތުގައި 905 މިލިއަން ރުފިޔާ ލިބި، ހިއްސާއަކަށް 11.91 ރުފިޔާ ބެހުމަށް އެ ކުންފުނިން ނިންމައިފިއެވެ.

ކުރުނބާ މޯލްޑިވްސްގައި ބޭއްވި ދިރާގުގެ 30 ވަނަ އަހަރީ ޢާންމު ޖައްސާގައި ޙިއްސާއަކަށް 11.91 ރުފިޔާ ބެހުމަށް ނިންމާފައިވާއިރު، އެއީ ކުރީ އަހަރުގެ ސާފު ފައިދާއިން ބަހަން ނިންމި އަދަދާ އަޅައި ބަލާއިރު 0.8 ޕަސެންޓްގެ އިތުރުވުމެކެވެ. 2017 ވަނަ އަހަރު އެ ކުންފުނިން ބަހާފައިވަނީ ހިއްސާ އަކަށް 11.81 ރުފިޔާ އެވެ. ދިރާގުން ބުނެފައިވަނީ މިއަހަރުގެ އެޕްރީލް މަހުގެ 18 ވަނަ ދުވަހުގެ ނިޔަލަށް ހިއްސާދާރުންގެ ގޮތުގައި ރަޖިސްޓްރީވެފައިވާ ހުރިހާ ފަރާތްތަކަށްވެސް ހިއްސާގެ ފައިސާ ލިބޭނެ ކަމަށެވެ.

Advertisement

މިދިޔަ އަހަރު ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި ދިރާގަށް 905 މިލިއަން ރުފިޔާ ލިބިފައިވާއިރު މިއީ އޭގެކުރީ އަހަރާއި އަޅާބަލައިރު 0.8 ޕަސެންޓްގެ އިތުރުވުމެކެވެ.

ދިރާގަށް އާމްދަނީގެ ގޮތުގައި ނިމިގެން ދިޔަ އަހަރު ޖުމްލަ 2.8 ބިލިއަން ރުފިޔާ ލިބިފައިވާއިރު, މިއީ 2017 ވަނަ އަހަރާއި އަޅާބަލާއިރު، 5.4 ޕަސެންޓްގެ ކުރިއެރުމެކެވެ.

ދިރާގުގެ ހިއްސާދާރުންގެ ތެރެއިން 87 ހިއްސާދާރުން ބައިވެރިވި މި ފަހަރުގެ އަހަރީ އާންމު ޖަލްސާގައި 2018 ވަނަ އަހަރުގެ އަހަރީ ރިޕޯޓާއި މާލީ ހިސާބުތައް ފާސްކުރުމުގެ އިތުރުން ހިއްސާދާރުންގެ ސުވާލުތަކަށް ޖަވާބު ދިނެވެ.