ގެތައް ޗެކް ކުރަމުންދާއިރު ދިވެހިން އެއްބާރުލުން ދިނުމަށް އެމްބަސީ އިން އެދޭ!
ކޯޓު އަމުރަކާ ނުލާ ގެތައް ފާސްކުރުމުގެ ބާރު ފުލުހުންނަށް ލިބިގެންވޭ
ލަންކާ ސިފައިން ގެއެއް ބަލާ ފާސްކުރަނީ
ސްރީލަންކާ އަށް ދިން ޓެރަރިސްޓް ހަމަލާއާ ގުޅިގެން އެ ގައުމުގެ ގެތައް ބަލާފާސް ކުރަމުންދާއިރު ފުލުހުންނަށް ފުރިހަމަ އެއްބާރުލުން ދިނުމަށް ލަންކާގައި ހުންނަ ދިވެހި އެމްބަސީ އިން އިލްތިމާސްކޮށްފިއެވެ.
ހޯމަ ދުވަހުގެ ރޭ 12 އިން ފެށިގެން މުއްދަތެއް ނެތް ގޮތަށް ލަންކާގައި ކުއްލި ނުރައްކަލުގެ ހާލަތު ވަނީ އިއުލާންކޮށްފައެވެ. ކުއްލި ނުރައްކަލުގެ ހާލަތުގައި، މަގުމަތިން މީހުން ހުއްޓުވައި ކޯޓު އަމުރަކާ ނުލައި ގެތައް ބަލައި ފާސްކުރުމުގެ ބާރު ފުލުހުންނަށް ލިބިގެންވެއެވެ. އެގޮތުން ރެއިން ފެށިގެން ފުލުހުން ދަނީ ކޮލަމްބޯ ސަރަހައްދުގެ ގިނަ ގެތަކެއް ބަލާ ފާސްކުރަމުންނެވެ.
އެމްބަސީގެ ޑެޕިއުޓީ އެމްބެސެޑަރ އަސްލަމް ޝާކިރު ރާއްޖެ.އެމްވީ އަށް ވިދާޅުވީ، ގެތައް ބަލާ ފާސްކުރަމުންދާއިރު، ފުލުހުންނަށް ފުރިހަމަ އެއްބާރުލުން ދިނުމަށް އިލްތިމާސް ކުރާ ކަމަށެވެ. ފުލުހުން ބެލިބެލުމުގައި މިހާތަނަށް ދިވެހިން ދިރިއުޅޭ ގެއަކުން މައްސަލައެއް ދިމާވެފައި ނުވާ ކަމަށް ޝާކިރު ވިދާޅުވިއެވެ.
ކޮންމެހެން ބޭނުންނުވާ ތަންތަނަށް ނުދިޔުމަށާއި، ހަފްތާއަކަށްވާ ވަރަށް ކާއެއްޗެހި ރައްކާ ކުރުން ބުއްދިވެރި ކަމަށް ޝާކިރު ވިދާޅުވިއެވެ.
ލަންކާގައި ހިނގި ބޮން ގޮއްވުމުގެ ހާދިސާގައި ދިވެއްސަކު ބައިވެރިވި ކަމުގެ މައުލޫމާތު މިހާތަނަށް ލިބިފައިނުވާ ކަމަށް އޭނާ ވިދާޅުވިއެވެ.
ކްރިސްޓިއަނުންގެ އިސްޓާ ދިމާކޮށް އާދިއްތަ ދުވަހު ދިން ހަމަލާތަކުގައި 310 މީހުން މަރުވެ 500 މީހުން ޒަހަމްވެފައިވާ ކަމަށް ފުލުހުންގެ ސްޕޯކްސް ޕާސަން ރުވާން ގުނަސޭކަރަ ވަނީ ވިދާޅުވެފައެވެ.
