ދިވެހިން ލަންކާއާއިއެކު: ދިވެހި އެމްބަސީގެ ދިދަ ބައިދަނޑިއަށް ތިރިކޮށްފައި

އާދިއްތަ ދުވަހު ލަންކާއަށް ދިން ޓެރެރިސްޓް ހަމަލާއާއި ގުޅިގެން އެކަމުގެ ހިތާމައިގައި ބައިވެރި ވުމުގެ ގޮތުން ލަންކާގައި ހުންނަ ދިވެހި އެމްބަސީގެ ދިދަ ބައި ދަނޑިއަށް ތިރި ކޮށްފިއެވެ.

އާދީއްތަ ދުވަހު ފުލުފުލުގައި ސްރީލަންކާގައި ދިން ބޮމުގެ ހަމަލާތަކުގައި މަރުވި މީހުންގެ އަދަދު 310 އަށް އަރާފައިވާ ކަމަށް އެ ގައުމުގެ ކަމާބެހޭފަރާތްތަކުން މިހާރު ވަނީ ހާމަކޮށްފައެވެ.

ކްރިސްޓިއަނުން ފާހަގަ ކުރި އީސްޓާ ސަންޑޭ އާ ދިމާކޮށް ތިން ފައްޅިއެއްގެ އިތުރުން، ހަތަރު ހޮޓަލަކަށް އަމާޒުކޮށް ދިން ބޮމުގެ ހަމަލާތަކުގައި ޒަހަމްވި އިތުރު 500 އެއްހާ މީހުންނަށް އަދިވެސް ދަނީ ހޮސްޕިޓަލުތަކުގައި ފަރުވާދެމުންނެވެ.

މަރުވި މީހުންގެ ތެރޭގައި ބޭރުގެ އެކި ގައުމުތަކުގެ 31 މީހުން ހިމެނޭ ކަމާށާއި، އަދި އިތުރު 14 މީހުން ވީތަނެއް ނޭނގޭ ކަމަށް ލަންކާގެ ފޮރިން މިނިސްޓްރީން ވަނީ ބުނެފަ އެވެ.

ރާއްޖޭގެ ފޮރިން މިނިސްޓަރ އަބުދުﷲ ޝާހިދު ވިދާޅުވީ، މި ހިތާމަވެރި ދަނޑިވަޅުގައި ދިވެހިންނާއި، ދިވެހި ސަރުކާރު އޮތީ، ލަންކާއާއި އެކުގައި ކަމަށެވެ. އަދި މި ހިތާމައިގައި ދިވެހިން ބައިވެރިވާކަން ހާމަކޮަށްދިނުމުގެ ގޮތުން ލަންކާގައި ހުންނަ ދިވެހި އެމްބަސީގެ ދިދަ ބައި ދަނޑިއަށް ތިރިކޮށްފައިވާ ކަމަށެވެ.

އެ ހަމަލާތައް ދިން ކަމަށް ލަންކާއިން ބުނާ އިސްލާމީ ހަރުކަށި ފިކުރުގެ "ނެޝަނަލް ތައުހީދު ޖަމާއަތު" ނަމަކަށް ކިޔާ ގުރޫޕަކަށް "ބޭރުގެ ނެޓުވާކަކުން" އެހީތެރިވެދީފައިވާ ކަމަށް ލަންކާ ސަރުކާރުން ވަނީ ބުނެފަ އެވެ. އަދި އެހަމަލާތަކާއި ގުޅިގެން، ލަންކާގައި މިހާރު ކުއްލި ހާލަތު އިއުލާނު ކޮށްފައިވާއިރު، މިހާތަނަށް 40 މީހުން ހައްޔަރުކުރެވިފައިވާ ކަމަށް ފުލުހުން ވަނީ ބުނެފަ އެވެ.

ސްރީލަންކާއަކީ ދިވެހިން ގިނަ އަދަދަކަށް ދިރިއުޅެމުންދާ ގައުމެކެވެ. ޚާއްސަކޮށް އާދިއްތަ ދުވަހު ހަމަލާދީފައިވާ ކޮލަމްބޯގައި ގިނައަދަދެއްގެ ދިވެހިން ދިރި އުޅެއެވެ. އެހެން ނަމަވެސް އެއްވެސް ދިވެއްސަކަށް މި ހަމަލާގައި ގެއްލުމެއް މިބިފައިވާކަމުގެ ރިޕޯޓް މިހާތަނަށް ލިބިފައެއް ނުވެއެވެ.