ރަމަޟާން މަހު ސަރުކާރުގެ ސްކޫލްތަކުގައި ކިޔަވާދޭ ގަޑިތައް މިނިސްޓްރީން އޮފް އެޑިއުކޭޝަނުން އިއުލާނު ކޮށްފިއެވެ.

އެޑިއުކޭޝަން މިނިސްޓްރީން އާދިއްތަ ދުވަހު ނެރެފައިވާ ސާކިއުލާގައި ވާ ގޮތުން، ރޯދަ މަހު ރާއްޖޭގެ ހުރިހާ ސަރުކާރު ސްކޫލުތަކެއްގައި ކިޔަވައިދިނުމުގެ ގަޑިތައް ވަނީ ތިން ލެވެލަކަށް ބަހާލާފައެވެ.

އެލްކޭޖީ އާއި ޔޫކޭޖީގެ ދަރިވަރުންނަށް ކިޔަވައިދޭނީ ދޮޅު ގަޑިއިރަށެވެ. ގްރޭޑް 1 އިން  ގްރޭޑް 6 އަށް ދެ ގަޑިއިރާއި 30 މިނެޓް ކިޔަވައިދިނުމަށް ކަނޑަ އަޅާފައި ވާއިރު މި ގްރޭޑްތަކުގެ ކިޔެވުން މެއި މަހުގެ 16 ވަނަ ދުވަހުން ފެށިގެން 30 ވަނަ ދުވަހާ ހަމައަށް ބަންދުވާނެ ކަމަށް ބުނެފައި ވެއެވެ. އަދި ގްރޭޑް 7 އިން ފެށިގެން ގްރޭޑް ބާރައަށް ކިޔަވައި ދޭނީ ތިން ގަޑިއިރު ކަމަށް ސާރކިއުލާގައި ބުނެފައި ވެއެވެ.

މީގެ އިތުރުން އެއް ދަންފަޅިއަށް ކިޔަވަދޭ ސްކޫލްތައް 8:30 އާއި 9:00 ދެމެދުގެ ވަގުތެއްގައި ކިޔެވުން ފަށަން ޖެހޭއިރު ދެ ދަންފަޅިއަށް ކިޔަވަދޭ ސްކޫލްތައް 8:30 އާއި 15:00 ދެމެދުގެ ވަގުތަކަށް ހަމަޖައްސަން އެ ސާކިއުލާގައި ބުނެފައި ވެއެވެ. އަދި ހަ ރޯދައިގެ ތެރޭގައި ވެސް ކިޔެވުން އޮންނާނީ ރަމަޟާން މަހަށް ކަނޑައަޅާފައިވާ ވަގުތާ އެއްގޮތަށް ކަމަށް ވެސް ބުނެފައި ވެއެވެ. 

ރަމަޟާން މަހު ކިޔަވައިދޭ މާއްދާތައް 30 މެނެޓާއި 45 މިނެޓަށް ފައްތައިގެން ކިޔަވައިދިނުމަށް ވެސް މިނިސްޓްރީގެ ސާރކިއުލާގައި ވަނީ ބުނެފައެވެ.

ރަމަޟާންމަހުގެ ގަޑިތައް ސްކޫލުތަކުން ކަނޑައަޅާ އިރު ދަރިވަރުންނާއި މުވައްޒަފުންނަށް ވީހާ ވެސް އަވަހަށް ގެއަށް ދެވޭނެ ގޮތަށް ހަމަޖެއްސުމަށް މިނިސްޓްރީން ސްކޫލުތަކަށް އަންގައިފައިވާއިރު ދީނީ މައުލޫމާތު ދިނުމަށް ހާއްސަ ހަރަކާތްތަކެއް ރާވަން މިނިސްޓްރީން އެދިފައި ވެއެވެ.