ނޫސްވެރިކަމުގެ މިނިވަންކަމުގައި ރާއްޖެ މުޅިން އައު ހަރުފަތަކަށް، 22 ދަރަޖައިގެ ކުރިއެރުމެއް!
19 އެޕްރީލު 2019 | ހުކުރު 08:332019 ވަނަ އަހަރުގެ ލިސްޓްގައި ރާއްޖެ 22 ދަރަޖައިގެ ކުރިއެރުމެއް ލިބިފައިވޭ
ނޫސްވެރިކަމުގެ އިނާމު ދިނުމުގެ ޖަލްސާގެ ތެރޭގައި ނޫސްވެރިޔަކު އިހުތިޖާޖްކުރަނީ
ދުނިޔޭގެ އެކި ކަންކޮޅުތަކުގައި ނޫސްވެރިކަމުގެ މިނިވަންކަން އޮންނަ ވަރު ބަލައި ކޮންމެ އަހަރަކު އާންމު ކުރަމުން ދާ "ވޯލްޑް ޕްރެސް ފްރީޑަމް އިންޑެކްސް" އިން ދިވެހިރާއްޖެ ނޫސްވެރިކަން މުޅިން އައު ހަރުފަތަކަށްދާކަން ހާމަވެއްޖެއެވެ.
ކޮންމެ އަހަރަކު އެއްފަހަރު 180 ގައުމު ހިމެނޭގޮތަށް އާންމު ކުރަމުންދާ ޕްރެެސް ފްރީޑަމް އިންޑެކްސްގައި ރާއްޖެވަނީ 2018 ވަނަ އަހަރާއި އަޅައި ބާލާއިރު 22 ދަރަޖަ ކުރިޔަށް ޖެހިލާފައެވެ. އެގޮތުން 2018 ވަނަ އަހަރު ނެރުނު ލިސްޓްގައި ރާއްޖެ 120 ވަނައިގައި އޮތް އިރު 2019 އަނަ އަހަރު އާންމު ކުރި ލިސްޓްގައި ރާއްޖެއޮތީ 98 ވަނައިގައެވެ. މިއަހަރު ނެރުނު ލިސްޓްގައި ހިމެނޭ ދެކުނު އޭޝިއާ ނުވަތަ ސާރކް ގައުމުތަކަށް ބަލާއިރު ރާއްޖެ އޮތީ 2 ވަނައިގައެވެ. ސާރކް ގައުމުތަކުން މި ލިސްޓްގައި އެންމެ ކުރީގައި އޮތީ ބޫޓާންއެވެ.
އެ ރިޕޯޓުން ދައްކާގޮތުން ރާއްޖެ ލިސްޓުން އެހާ ދަށަށް ވެއްޓިފައިވަނީ ކުރީގެ ރައީސް ޔާމީންގެ ވެރިކަމުގައި ހިނގާދިޔަ ކަންތައްތަކުގެ ސަބަބުންނެވެ. ސަރުކާރަށް މަޖިލީހުގައި އޮތް މެޖޯރިޓީ ބޭނުންކޮށްގެން ބޭނުންގޮތަކަށް ގާނޫނުތައްހަދައި އެކި މުއައްސަސާތަކުން އަމަލުކުރަމުން ދިޔަ ގޮތުގެ ސަބަބުން ޔާމީންގެ ވެރިކަމުގެ ފަސް އަހަރުވެސް ޕްރެސް ފްރީޑަމް އިންޑެކްސްގައި ރާއްޖެ ދިޔައީ ފަހަތަށެވެ.
ޔާމީންގެ ވެރިކަމުގައި އަބުރާ ބެހުން ޖިނާއީ ކުށެއްގެ ގޮތުގައި ކަނޑައަޅައި، 2016 ވަނަ އަހަރު ފާސްކުރި "އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ގާނޫނު" އަކީ ނޫސްވެރިކަމުގެ މިނިވަންކަން ގެއްލުމަށް ދިމާވި މައިގަނޑު އެއް ސަބަބުގެ ގޮތުގައި އެ ޖަމިއްޔާއިން ސިފަކޮށްފައި ވެއެވެ. އަދި ފުލުހުންގެ ފަރާތުން ނޫސްވެރިންނާއި މީޑީއާތަކަށް ކުރިމަތިވި ގޮންޖެހުންތަކާއި، ގާނޫނުތަކާއި، އިޖުރާއަތުތަކާ ޚިލާފަށް ނޫސްވެރިން ހައްޔަރުކޮށް ދައުވާ ކުރުމަކީ ރާއްޖޭގައި ނޫސްވެރިކަމަށް ކުރިމަތިވި އެންމެ ބޮޑު ގޮންޖެހުންތަކުގެ ގޮތުގައި ސިފަކޮށްފައި ވެއެވެ.
2013 ވަނަ އަހަރު ޔާމީން ވެރިކަމާއި ހާވާލުވެވަޑައިގެންނެވި އިރު ރާއްޖެ އޮތީ ލިސްޓުގެ 103 ވަނައިގައެވެ. 2018 އާއި ހަމަޔަށް ރާއްޖެވަނީ 17 ދަރަޖަ ދަށަށް ވެއްޓިފައެވެ.
ނޫސްވެރިކަމުގެ މިނިވަންކަން ނިގުޅައިގަނެ، މީޑިއާތައް ބަންދު ކުރުމުގެ ބާރު ލިބިދޭ ގޮތަށް އަބުރުގެ ގާނޫނު މަޖިލީހުން ފާސްކުރީ ދިވެހި ދައުލަތުގެ އެންމެ ބޮޑު ހިޔާނާތް، އެމްއެމްޕީއާރްސީގެ ކޮރަޕްޝަންގައި ސަރުކާރުގެ އިސްވެރިންގެ ބައިވެރިވުން އޮތް މިންވަރު މީޑިއާ އަށް ތިލަވެގެން އައި ދުވަސްވަރުއެވެ. ޕީޕީއެމްގެ ޕާލަމެންޓްރީ ގްރޫޕުގެ 47 މެމްބަރުންގެ ވޯޓާއެކު އެ ގާނޫނު މަޖިލީހުން ފާސްކުރީ 2016 ވަނަ އަހަރުގެ އޮގަސްޓު މަހުގެ 9 ވަނަ ދުވަހުއެވެ.
ނޫސްވެރިކަމުގެ މިނިވަންކަން ނެތް ގައުމުގެ ތެރޭގައި ރާއްޖެ ހިމެނުނު އިރު، ފާއިތުވެގެންދިޔަ 5 އަހަރަކީ އެކި ގޮތްގޮތުން ރާއްޖޭގެ މީޑިއާތަކާއި ނޫސްވެރިންނަށް ގޮންޖެހުންތަަކާ ކުރިމަތިލާންޖެހުނު އަހަރެކެވެ. އެގޮތުން ރާއްޖެޓީވީގެ ހަތަރު ނޫސްވެރިއެއްގެ މައްޗަށް ޖިނާއީ ދައުވާ ކުރުމާއި، އަބުރުގެ ގާނޫނު ފާސްކުރުމާއި، އެންމެ ގިނަ ދުވަސްވީ ނޫސް "ހަވީރު" ހުއްޓާލަންޖެހުމާއި، ނޫސްވެރިޔާ ރިލްވާން ގެއްލުވާލުމުގެ އިތުރުން ރަހުމު ކުޑަ ގޮތަކަށް މަރާލާފައިވާ ބްލޮގަރ ޔާމީން ރަޝީދު މަރާލުމުގެ ހާދިސާއަކީވެސް ޔާމީންގެ ވެރިކަމުގައި ހިނގައިގައިވާ ކަންތައްތަކެވެ.
ނޫސްވެރިކަމުގެ މިނިވަންކަން ރާއްޖޭގައި ގާއިމުކޮށްދިނުމަކީ ރައީސް އިބްރާހީމް މުހައްމަދު ސޯލިހުގެ ރިޔާސީ ވައުދެކެވެ. އެ ވައުދާ އެއްގޮތަށް ސަރުކާރުން މަޖިލީހަށް 14 ނުވެމްބަރު 2018 ގައި ހުށަހަޅައިގެން އަބުރުގެ ގާނޫނު ވަނީ 38 މެމްބަރުންގެ އަޢުލަބިއްޔަތުން އުވާލައިފަ އެވެ.
