ފަނޑިޔާރުންގެ މުސާރަ ބޮޑުކުރާކަށް ނުފެންނަ ކަމަށް މަޝްހޫރު ގާނޫނީ ވަކީލް އަދި ގެއްލުވާލާފައިވާ މީހުންނާއި މާރާލަފައިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ ރައީސް ހުސްނުއް ސުއޫދު ވިދާޅުވެއްޖެއެވެ. 

ޖުޑީޝަލް ސަރވިސް ކޮމިޝަން (ޖޭއެސްސީ) އިން ރައްޔިތުންގެ މަޖިލީހަށް ހުށައެޅި ހުށައެޅުން ފަނޑިޔާރުންގެ މުސާރަ ބޮޑު ކުރަން ގޮތް ނިންމުމަށް 19 ވަނަ މަޖިލީހަށް ފޮނުވުމަށް މާލިއްޔަތު ކޮމެޓީން ނިންމާފައި ވަނީ އެކޮމެޓީއަށް ހާޒިރުވެ ވަޑައިގަތް އަށް މެމްބަރުންގެ ތެރެއިން ފަސް މެމްބަރުންގެ އިއްތިފާގުންނެވެ. ކުރިން ބަންޑާރަ ނައިބުކަން ވެސް ފުރުއްވާފައިވާ ސުއޫދު ކުރެއްވި ޓްވީޓެއްގައި ވިދާޅުވީ ފަނޑިޔާރުންގެ މުސާރަ ބޮޑުކުރަން ނުފެންނަ ކަމަށާއި ކޯޓްތަކުގެ ވަސީލަތް ތަރައްގީކުރުން މާ މުހިންމު ކަމަށެވެ.

ފަނޑިޔާރުންގެ މުސާރަ ބޮޑުކޮށް އަލުން ރިވިއު ކުރަން ހުށައެޅި އިރު 2010 ވަނަ އަހަރުގެ ޑިސެމްބަރު މަހުން ފެށިގެން ރާއްޖޭގެ އުއްތަމަ ފަނޑިޔާރަށް މުސާރައިގެ ގޮތުގައި 73،125ރ. ލިބިލައްވައެވެ. އަދި ކާރުކޮޅު، މެޑިކަލް އިންޝިއުރެންސްގެ ގޮތުގައި 12،500ރ. މުސާރައިގެ އިތުރުން ލިބިލައްވައެވެ. އެންމެ ކުޑަ މުސާރައެއް ފަނޑިޔާރުންގެ ތެރެއިން ލިބިލައްވަނީ މެޖިސްޓްރޭޓަރުންނަށެވެ. އެއީ 23،450ރ. އެވެ. މެޖިސްޓްރޭޓަރުންނަށް ކާރުކޮޅު، މެޑިކަލް އިންޝިއުރެންސްގެ ގޮތުގައި ލިބިލައްވަނީ 4،750ރ. އެވެ.

ފަނޑިޔާރުންގެ މުސާރަ އާއި އިނާޔަތް ރައީސުލްޖުމްހޫރިއްޔާގެ މުސާރައާއި ރައްޔިތުންގެ މަޖިލީހުގެ މެމްބަރުންގެ މުސާރަ އަދި ދައުލަތުގެ އެހެނިހެން މުއައްސަސާތަކުގެ މުސާރަ ކަނޑައަޅައި ފާސްކޮށްފައި ވަނީ 28 ޑިސެމްބަރު 2010 ގައި ރައްޔިތުންގެ މަޖިލީހުންނެވެ. އޭގެ ފަހުން މުސާރަ ރިވިއު ކޮށްފައެއް ނުވެއެވެ.