ބްރޮޑްކާސްޓިން ކަމިޝަނުގެ ދަތުރުފަތުރަށް ބަޖެޓް ހޯދުމަށް ފިނޭންސަށް ހުށައަޅަން ކޮމެޓީއިން އެދެފި
16 އެޕްރީލު 2019 | އަންގާރަ 17:41ރެގިއުލޭޓަރީ އޮތޯރިޓީގެ ފަރާތުން ގަވައިދާ ޚިލާފަށް ކުރަންޖެހޭ ކަންކަން ކުރަމުން ދާ ފަރާތެއް
ބޮރޮޑްކާސްޓިން ކަމިޝަނުގެ ބައެއް މެމްބަރުން
މޯލްޑިވްސް ބްރޮޑްކާސްޓިން ކަމިޝަން(އެމްބީސީ) އިން ރަށްރަށަށް ކުރަންޖެހޭ ދަތުރުފަތުރުގެ ޚަރަދަށް ބަޖެޓެއް ނެތް ކަމަށާއި އެކަމުގެ ސަބަބުން ކަމިޝަނުގެ ޒިންމާ އަދާކުރުމުގައި ހުރަސްތައް ކުރިމަތިވާތީ ބަޖެޓް ހޯދުމަށް މަޖިލީހަށް ހުށައެޅުމުން ފިނޭންސް މިނިސްޓްރީއަށް ހުށައެޅުމަށް މަޖިލީހުގެ މާލިއްޔަތު ކޮމެޓީއިން އެދެފިއެވެ.
އަންގާރަ ދުވަހު އޮތް ރައްޔިތުންގެ މަޖިލީހުގެ މާލިއްޔަތު ކޮމެޓީއަށް އެ މައްސަލަ ހުށައެޅުމުން ބަހުސް ކުރުމަށް ފުރުސަތު ހުޅުވާލުމުގެ ކުރިން ކޮމެޓީގެ މުގައްރިރު ކޮމަންޑޫ ދާއިރާ މެމްބަރު، އަހްމަދު ނާޝިދު (އޭޑީކޭ ނާޝިދު) ވިދާޅުވީ އެމްބީސީއަކީ ރެގިއުލޭޓަރީ އޮތޯރިޓީގެ ފަރާތުން ގަވައިދާ ޚިލާފަށް ކުރަންޖެހޭ ކަންކަން ކުރަމުންގެންދާ ފަރާތެއް ކަމަށެވެ. އަދި އެމްބީސީއަކީ އެކިއެކި ޓީވީ ސްޓޭޝަންތައް ބޮޑެތި އަދަދުތަކުން ޖޫރިމަނާ ކުރަމުން ގެންދާ ފަރާތެއް ކަމަށާއި އެއީ ރަށްރަށަށް ގޮސް ކޭބަލްޓީވީ ނެޓްވަރކްތައް ގެންގުޅެނީ ގަވައިދާ އެއްގޮތަށްތޯ ބަލައި ބޮޑެތި އަދަދުތަކުން ޖޫރިމަނާ ކުރާ ފަރާތެއް ކަމަށެވެ.
" އެމްބީސީގެ މަސްއޫލިއްޔަތުގެ ތެރޭގައި ރަށްރަށަށް ގޮސް އެތަންތަނުގައި އޮންނަ ކޭބަލްޓީވީގެ ނެޓްވަރކް ތަކާއި މި ކަންތައްތައް ކުރަނީ ގަވައިދުގައި ތޯ ބަލައި އަދި ބޮޑެތި ޖޫރިމަނާތައް ކުރަމުންދާތަން ވެސް އަޅުގަނޑުމެންނަށް އެބަފެނޭ. ރެވެނިއުތަކެއް ވެސް ހޯދާ ބްރޮޑްކާސްޓިން ކަމިޝަނަކީ ވަރަށް ބޮޑެތި ޖޫރިމަނާތަކާއެއްޗެހި އެކިއެކި ޓީވީ ސްޓޭޝަންތައް ކުރަމުންދާ ފަރާތެއް. ދެން ރެގިއުލޭޓަރީ އޮތޯރިޓީގެ ފަރާތުން ގަވައިދާ ޚިލާފަށް ކުރަންޖެހޭ ކަންކަން ކުރަމުން ދާ ފަރާތެއް. އެވާހަކަ އެވިދާޅުވަނީ.. އެމީހުންގެ ބަޖެޓަށް އިތުރަށް ދަތުރުފަތުރުގެ ކަންކަމަށް ބަޖެޓް ހޯދުމަށް ލިޔުއްވާފައިވާ ސިޓީއެއްމީ"ނާޝިދު ވިދާޅުވިއެވެ.
އެމްބީސީގެ ހުށައެޅުމަށް ބަހުސް ކުރައްވަމުން ކުޅުދުއްފުށީ އުތުރު ދާއިރާގެ މެމްބަރު އަބްދުލްޣަފޫރު މޫސާ ވިދާޅުވީ މާލިއްޔަތު ކޮމެޓީއަށް ބަޖެޓު އިތުރުކުރަން ޖެހޭނީ ފިނޭންސް މިނިސްޓްރީއަށް ހުށައަޅައިގެން އެމިނިސްޓްރީއިން ގޮތެއް ކަނޑަނޭޅިއްޖެ ހިނދެއްގައި ކަމަށެވެ. އުސޫލްތައް އޮންނަނީ ސީދާ އެކޮމެޓީއަށް ހުށައަޅައިގެން ފިނޭންސްގެ ބަޖެޓަށް ވަންނަ ގޮތަކަށް ނޫން ކަމަށް ވިދާޅުވިއެވެ.
"އަޅުގަނޑަށް ފެންނަނީ އެބޭފުޅުންނަށް ދަންނަވަން ފިނޭންސަށް ހުށައަޅައިގެން ފިނޭންސުން ޖަވާބެއް ނުލިބިއްޖެނަމަ އަޅުގަނޑުމެންނަށް ހުށައެޅުމަށް. އޭރުން މިކަން ހިނގާނީ" ޣަފޫރު ވިދާޅުވިއެވެ.
ޣަފޫރުގެ ހުށައެޅުމަށް ގައްދޫ ދާއިރާގެ މެންބަރު އަޙްމަދު ރަޝީދާއި ފުވައްމުލަކު އުތުރު ދާއިރާގެ މެމްބަރ އަލީ ޝާހު ވަނީ ތާއީދު ކުރައްވާފައެވެ.
އެމްބީސީއިން މަޖިލީހަށް މިދިޔަ ޖެނުއަރީމަހުގެ 10 ވަނަ ދުވަހު ފޮނުވާފައިވާ ސިޓީގައި ބުނެފައިވަނީ އެކަމިޝަނަށް ގުޅުން ހުރި މަސައްކަތްތަކުގައި ވަކާލާތު ކުރުމަށް ރަށްރަށަށް ކުރަންޖެހޭ ދަތުރުފަތުރުގެ ޚަރަދުތަކާއި އެކަންކަމަށް ބޭނުންވާ ވަސީލަތްތަކަށް 2019 ވަނަ އަހަރުގެ އެމްބީސީއަށް ލިބިފައިވާ ބަޖެޓުގައި ހިމެނިފައި ނުވުމުން ކަމިޝަނުގެ ޒިންމާ އަދާކުރުމުގައި ހުރަސްތަކެއް ކުރިމަތިވާކަމަށެވެ.
އެމްބީސީއިން ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެތަކެއް ޓީވީ ސްޓޭޝަންތަކެއް ޖޫރިމަނާ ކޮށްފައެވެ. އޭގެ ތެރޭގައި އެކަމިޝަނުން އެންމެ ގިނައިން ޖޫރިމަނާ ކޮށްފައިވަނީ ރާއްޖެޓީވީއެވެ. ރާއްޖެޓީވީ އެކިފަހަރު މަތިން ޖޫރިމަނާކޮށް، އެޓީވީ ޖޫރިމަނާ ކުރި ޖުމްލަ އަދަދު ވަނީ 3.7 މިލިއަނަށް އަރާފައެވެ.
